ମାଲକାନଗିରିରେ ପ୍ରସ୍ତାବିତ ସିମେଣ୍ଟ କାରଖାନାକୁ ବିରୋଧ : ଘଂଚ ଜଂଙ୍ଗଲରେ ଏକାଠି ହେଲେ ୮ ପଂଚାୟତର ହଜାର ହଜାର ଆଦିବାସୀ
ଜୀବିକା ହରାଇବା ଆଶଙ୍କାରେ ପ୍ରତିବାଦ; କହିଲେ. କମ୍ପାନୀ ହାତରେ ଟେକି ଦେବୁନାହିଁ ନିଜ ଜଂଗଲ ଜମି
କନକ ବ୍ୟୁରୋ : ପ୍ରସ୍ତାବିତ ସିମେଣ୍ଟ କାରଖାନାକୁ ବିରୋଧ କରି ଆଦିବାସୀଙ୍କ ପ୍ରଜାମେଳି । ମାଲକାନଗିରି ଜିଲ୍ଲାରେ ପ୍ରସ୍ତାବିତ ସିମେଣ୍ଟ କାରଖାନାକୁ ବିରୋଧ କରି ପୁଣି ଘଂଚ ଜଂଗଲରେ ଏକାଠି ହୋଇଛନ୍ତି ୮ଟି ପଂଚାୟତର ହଜାର ହଜାର ଲୋକେ । ମାଲକାନଗିରି ଜିଲ୍ଲାର କୋତାମାଟେରୁ ଅଂଚଳରେ ଡାଲମିଆ କମ୍ପାନୀ ପକ୍ଷରୁ ଏକ ସିମେଣ୍ଟ କାରଖାନା ସ୍ଥାପନ କରାଯିବା ନେଇ ଦୀର୍ଘ ଦିନ ଧରି ପ୍ରସ୍ତାବ ରହିଛି ।
Kanak News is now on WhatsApp
Join and get latest news updates delivered to you via WhatsApp
ଏହି ଜଙ୍ଗଲ ସେମାନଙ୍କର ମାଆ ସଦୃଶ୍ୟ। କେଉଁ କାଳରୁ ଏହି ଜଙ୍ଗଲ ସେମାନଙ୍କୁ ବଞ୍ଚାଇ ରଖିଥିବା ଏମାନେ କହନ୍ତି । ଏହି ଜଙ୍ଗଲକୁ ନଷ୍ଟ କରାଗଲେ ସେମାନେ ଆଉ ବଞ୍ଚିପାରିବେ ନାହିଁ ବୋଲି ଆଶଙ୍କା କରି ସମସ୍ତେ ଏକତ୍ରୀତ ହୋଇ ସିମେଣ୍ଟ ଫ୍ୟାକ୍ଟ୍ରିକୁ ବିରୋଧ କରିଛନ୍ତି । ମାଲକାନଗିରି ଜିଲ୍ଲା ସଦର ମହକୁମା ଠାରୁ ମାତ୍ର ୨୫ କିଲୋମିଟର ଦୁରରେ ରହିଛି ଏହି ସ୍ଥାନଟି । ଏହି ସ୍ଥାନର ଜଳ, ଜଙ୍ଗଲ ଓ ଜମି ଉପରେ ଏମାନଙ୍କର ହକ୍ ରହିଛି । ଏମାନେ କାହିଁ କେଉଁ କାଳରୁ ଏହି ଜଙ୍ଗଲ ଉପରେ ନିର୍ଭର କରି ଜୀବିକା ନିର୍ବାହ କରୁଛନ୍ତି । ତେବେ ଏହି ଜଙ୍ଗଲ ଉପରେ ବିଶେଷକରି ପଡିଆ ବ୍ଲକର ମାଟେରୁ, ନିଲିଗୁଡା ଏବଂ ମାଲକାନଗିରି ବ୍ଲକର ଶିଖପାଲୀ, ମାଟାପାକା ଓ ତଣ୍ଡାପାଲୀ ପଞ୍ଚାୟତର ହଜାର ହଜାର ଲୋକ ନିର୍ଭର କରୁଛନ୍ତି ।
ତେବେ ଡାଲମିଆଁ ନାମକ ଏକ ସଂସ୍ଥା ଏଠାରେ ସିମେଣ୍ଟ ଫ୍ୟାକ୍ଟ୍ରି କରିବା ନେଇ ଜୋରଦାର ଉଦ୍ୟମ କରୁଥିବା ବେଳେ ଏହାକୁ ଏବେ ସ୍ଥାନୀୟ ଲୋକେ ବିରୋଧ କରିବା ସହ ଜୀବନ ଥିବା ପର୍ଯ୍ୟନ୍ତ ଏଠାରେ କୌଣସି ଫ୍ୟାକ୍ଟ୍ରି ନିର୍ମାଣ କରାଇ ଦେବୁ ନାହିଁ ବୋଲି ଧମକ ଦେଇଛନ୍ତି । ସରକାରଙ୍କର ଏଭଳି ନୀତିକୁ ବିରୋଧ କରିବା ସହ ଆଗାମୀ ଦିନରେ ଏହି ପଞ୍ଚୋଟି ପଞ୍ଚାୟତର ସମସ୍ତ ଭୋଟର ଭୋଟ ବର୍ଜନ କରିବାକୁ ବାଧ୍ୟ ହେବୁ ବୋଲି ଚେତାବନୀ ମଧ୍ୟ ଦିଆଯାଇଛି । ଲୋକେ ନିଜର ପାରମ୍ପାରିକ ଅସ୍ତ୍ରଶସ୍ତ୍ର ଧରି ଏହି ପ୍ରଜାମେଳୀରେ ଗର୍ଜିଥିଲେ । ସେମାନେ ନା ସରକାରଙ୍କର କଥା ଶୁଣିବେ ନା କମ୍ପାନିର ଲୋଭକୁ ଆଦରିବେ ବୋଲି ସଫା ସଫା କହିଛନ୍ତି । କୌଣସି ପ୍ରଲୋଭନରେ ସେମାନେ ପଡିବେ ନାହିଁ ବୋଲି କହିଛନ୍ତି। ଆମକୁ ଆମର ଜଙ୍ଗଲ ବଡ, ଟଙ୍କା ନୁହେଁ ବୋଲି କହିଛନ୍ତି । ଏହା ପୂର୍ବରୁ ମଧ୍ୟ ବହୁ ଥର ଲୋକେ ଏକତ୍ରୀତ ହୋଇ ଏହି ଫ୍ୟାକ୍ଟ୍ରି ବିରୋଧରେ ସ୍ବରତ୍ତୋଳନ କରିସାରିଛନ୍ତି ।
ଅନ୍ୟ ଦିଗରେ ଫ୍ୟକ୍ଟ୍ରି ନିର୍ମାଣ ନେଇ କମ୍ପାନି ଏଠାରେ ଗ୍ରାମ ସଭା କରିବା ନେଇ ଯୋଜନା କରୁଥିବା ଜଣାପଡିଛି। ଲୋକଙ୍କୁ ବୁଝାସୁଝା କରିବା ପାଇଁ ମଧ୍ୟ ପ୍ରୟାସ ଜାରି ରଖିଥିବା ଜଣାପଡିଛି । ତେବେ ଏନେଇ ସରକାର କି ପଦକ୍ଷେପ ନେଉଛନ୍ତି ତାହା ଦେଖିବାକୁ ବାକି ରହିଲା । ଆଗକୁ ନିର୍ବାଚନ ଥିବାରୁ ହୁଏତ ସରକାର ଏବେ କୌଣସି ଏଭଳି ପଦକ୍ଷେପ ନେବେ ନାହିଁ ଯାହା ନିର୍ବାଚନରେ ପ୍ରଭାବ ପକାଇବ । କିନ୍ତୁ ଲୋକେ ନିର୍ବାଚନ ପରେ ମଧ୍ୟ ନିଜ ଜିଦରୁ ଟଳିବେ ନାହିଁ ବୋଲି କହିଛନ୍ତି। ତେବେ ଆଗକୁ ଏହା କେଉଁ ଦିଗକୁ ଯାଉଛି ତାହା ଦେଖିବାକୁ ବାକି ରହିଲା ।