ଥାନା ଭିତରେ ନାବାଳକଙ୍କୁ ଥାର୍ଡ ଡିଗ୍ରୀ ଅଭିଯୋଗ : ୩ ଦିନ ଧରି ନିସ୍ତୁକ ମାଡ଼ ମାରିବା ସହ ବିଦ୍ୟୁତ ଝଟକା ଦିଆଯାଇଥିବା ନେଇ ଅଭିଯୋଗ ଆଣିଲେ ଅଭିଭାବକ
ମାଲକାନଗିରିରେ ହୋମଗାର୍ଡଙ୍କ ଘରୁ ସୁନା ଓ ଟଙ୍କା ଚୋରୀ ଅଭିଯୋଗରେ ଗିରଫ ହୋଇଥିଲେ ନାବାଳକ
କନକ ବ୍ୟୁରୋ : ଥାନା ହାଜତରେ ନାବାଳକଙ୍କୁ ଥାର୍ଡ ଡିଗ୍ରୀ ଅଭିଯୋଗ । ପିଲାଙ୍କୁ ଥାନାରେ ତିନି ଦିନ ଧରି ନିସ୍ତୁକ ମାଡ ସହ ଇଲେକ୍ଟିକ୍ ଶକ ଦିଆ ଥିବା ଅଭିଯୋଗ ଆଣିଛନ୍ତି ଅଭିଭାବକ । ଏପରି ସାଂଘାତିକ ଅଭିଯୋଗ ଆସିଛି ମାଲକାନଗିରି ଜିଲ୍ଲା ଚିତ୍ରକୋଣ୍ଡା ଥାନାରୁ । ଅଭିଯୋଗ ମୁତାବକ ଗତ ୩ ଦିନ ପୁର୍ବେ ଚିତ୍ରକୋଣ୍ଡା ଥାନାର ଜଣେ ହୋମଗାର୍ଡଙ୍କ ଘରୁ କିଛି ସୁନା ଗହଣା ଓ ନଗଦ ୧୦ ହଜାର ଟଙ୍କା ଚୋରୀ ହୋଇଥିବା ଅଭିଯୋଗ ହୋଇଥିଲା । ଆଉ ଥାନା କର୍ମଚାରୀଙ୍କ ଘରୁ ଚୋରୀ ଅଭିଯୋଗ ପାଇ ମାମଲାକୁ ଅତି ଗୁରୁତର ସହ ନେଇ ୪ ନାବାଳକ ଅଭିଯୁକ୍ତଙ୍କୁ ଉଠାଇ ଆଣିଥିଲା ପୁଲିସ ।
Kanak News is now on WhatsApp
Join and get latest news updates delivered to you via WhatsApp
ଆଉ ତିନି ଦିନ ଧରି ଥାନାରେ ପିଲାଙ୍କୁ ପୁଲିସ ନିସ୍ତୁକ ମାଡ ମାରିବା ସହ ଅକଥନୀୟ ଅତ୍ୟାଚାର କରିଥିବା ଅଭିଯୋଗ କରିଛନ୍ତି ଅଭିଯୁକ୍ତ ଓ ତାଙ୍କ ପରିବାର ଲୋକେ । ପିଲାଙ୍କୁ ରାତି ତମାମ ମାଡ ମରାଯିବା ସହ ଇଲେକ୍ଟ୍ରିକ ଶକ୍ ଦିଆ ଯାଉଥିଲା । ଏବଂ ପୁଲିସ କର୍ମଚାରୀ ସହ ବାହାର ଲୋକେ ମଧ୍ୟ ଥାନା ଭିତରେ ପଶି ପିଲାଙ୍କୁ ମାଡ ମାରୁଥିବା ନେଇ ଅଭିଯୋଗ ହୋଇଛି । ପିଲାଙ୍କ ବୟସ ୧୩ ରୁ ୧୬ ହୋଇ ଥିବାରୁ ସମସ୍ତ ୪ ନାବାଳକଙ୍କୁ ଜୁଭେନାଇଲ ଜଷ୍ଟିସ ବୋର୍ଡ ନିକଟରେ ହାଜର କରାଇଛି ଚିତ୍ରକୋଣ୍ଡା ପୁଲିସ । ସେପଟେ ଥାନା ହାଜତରେ ଏପରି ଅକଥନିୟ ଅତ୍ୟାଚାର ନେଇ ଚାଇଲ୍ଡ ଲାଇନକୁ ପରିବାର ଲୋକେ ଜଣାଇଛନ୍ତି । ତେବେ ମାଡ ମରା ଘଟଣାକୁ ଖଣ୍ଡନ କରିଛନ୍ତି ଚିତ୍ରକୋଣ୍ଡା ଥାନା ଅଧିକାରୀ ।