ସାମନାକୁ ଆସିଲା ମାଲକାନଗିରିରେ ପିସି କାରବାର ନଗ୍ନ ରୂପ ! ଆଦିବାସୀଙ୍କୁ ଜମି ପଟ୍ଟା ଦେବାରେ ବି ପରସେଂଟେଜ୍ ମାଗୁଛନ୍ତି ଅଧିକାରୀ
କନକ ବ୍ୟୁରୋ : ଲାଂଚ ନଦେଲେ ମିଳୁନି ଜମି ପଟ୍ଟା । ଖୋଲାଖୋଲି ସରକାରୀ ବାବୁ ମାଗୁଛନ୍ତି ହାତ ଗୁଂଜା । ଟଙ୍କା ନଦେଲେ ତହସିଲ କିମ୍ବା ଆରଆଇ ଅଫିସରେ ଫାଇଲ ବି ଘୁଂଚୁନି । ମାଲକାନଗିରି ଜିଲ୍ଲା କାଳିମେଳା ତହସିଲ କାର୍ଯ୍ୟାଳୟର ଲାଂଚ କାରବାର ଏକ ଏକ୍ସକ୍ଲୁସିଭ ଚିତ୍ର ଲାଗିଛି କନକନ୍ୟୁଜ୍ ହାତରେ । ଜମି ଡିମାର୍କେସନ୍ ପାଇଁ କେମିତି ଟଙ୍କା ଲାଂଚ ମାଗୁଛନ୍ତି ଆରଆଇ ଏବଂ ଟଙ୍କା ନଦେଲେ ସିଧାସିଧା କାମ କରିବେ ନାହିଁ ବୋଲି ଧମକ୍ ବି ଦେଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଗୁପ୍ତ କ୍ୟାମେରାରେ କଏଦ ହୋଇଥିବା ଚିତ୍ର ହିଁ ବୟାନ କରୁଛି ହାତଗୁଂଜା ବା ଲାଂଚ କାରବାରର ଅସଲ ଚେହେରା । ଏଠି ଲାଂଚ ନଦେଲେ ମିଳେନି, ଜମିପଟ୍ଟା । ପିସି ନଦେଲେ ହଲେନି ଫାଇଲ । ଜମି ଡିମାର୍କେସନ୍ ପାଇଁ ୬ ହଜାର ଟଙ୍କା ଲାଂଚ ମାଗୁଥିବା ଆର୍ଆଇ, ଟଙ୍କା ନଦେଲେ କାମ କରିବେ ନି ବୋଲି ଧମକ୍ ବି ଦେଉଛନ୍ତି।
ଅଫିସ ବାହାରେ ଯେଉଁ ଚିତ୍ର, ଅଫିସର ଭିତରେ ସେହି ସମାନ ଚିତ୍ର । ରାଜସ୍ୱ ନିରୀକ୍ଷକଙ୍କ କାର୍ଯ୍ୟାଳୟର କିରାଣୀମାନେ ଛୋଟରୁ ଅତି ଛୋଟ କାମ ପାଇଁ ଲାଂଚ ନେଉଛନ୍ତି । ଯାହାର ପ୍ରମାଣ ହେଉଛି ଗୁପ୍ତ କ୍ୟାମେରାରେ କଏଦ ହୋଇଥିବା ଏହି ଚିତ୍ର । ଆଉ କାଳିମେଳା ତହସିଲ କାର୍ଯ୍ୟାଳୟରେ ଚାଲିଥିବା ଏହି ଦୁର୍ନୀତିର ପ୍ରତିବାଦରେ ଆନ୍ଦୋଳନକୁ ଓହ୍ଲାଇଛି କଂଗ୍ରେସ । ପ୍ରଦୀପ ମାଝୀଙ୍କ ନେତୃତ୍ୱରେ କଂଗ୍ରେସ କର୍ମୀମାନେ ଅଫିସକୁ ଧସେଇ ପଶିବା ସହ ତହସିଲଦାର ସନତ କୁମାର ନାୟକଙ୍କ ସମେତ ସମସ୍ତ କର୍ମଚାରୀଙ୍କୁ ଦୀର୍ଘ ୧୨ ଘଂଟା ଧରି ଅଟକ ରଖିଥିଲେ । ଜିଲ୍ଲାପାଳ ଖୋଦ୍ ଆସି ବୁଝାସୁଝା କରିବା ସହ କାର୍ଯ୍ୟାନୁଷ୍ଠାନର ପ୍ରତିଶ୍ରୁତି ଦେବା ପରେ ହଟିଛି ଆନ୍ଦୋଳନ ।
ସ୍ୱଚ୍ଛ ଶାସନର ନାରା ଦେଉଥିବା ନବୀନ ସରକାର, ଜିରୋ ଟଲରାନ୍ସର ଆହ୍ୱାନ ଦେଇଛନ୍ତି । ଏହାକୁ ନେଇ ରାଜରାସ୍ତାରୁ ବିଧାନସଭା ସବୁଠି ହୁଲୁସ୍ତୁଲ ହେଉଛି । ହେଲେ ଗ୍ରାଉଣ୍ଡ ଜିରୋରେ କ’ଣ ଘଟୁଛି, ତାର ପ୍ରମାଣ ହେଉଛି କାଳିମେଳା ତହସିଲ ଅଫିସରୁ ଆସିଥିବା ଏହି ଚିତ୍ର ।