ମେକ୍ ଇନ୍ ଓଡ଼ିଶାକୁ ନେଇ ମହା-ପଲିଟିକ୍ସ : ବିରୋଧୀ କହିଲେ, ଶିଳ୍ପ ଅନୁକୂଳ ବାତାବରଣ ଯୋଗାଇବାରେ ବିଫଳ ସରକାରଙ୍କ ଇଭେଂଟ ଭିତ୍ତିକ କାର୍ଯ୍ୟକ୍ରମ
ରାଜ୍ୟରେ ଶିଳ୍ପ ପ୍ରତିଷ୍ଠା ପାଇଁ କିପରି ବାତାବରଣ ରହିଛି, ତାକୁ ସୋ’ କେସ୍ କରିବାକୁ ଯାଉଛନ୍ତି ରାଜ୍ୟ ସରକାର ।
କନକ ବ୍ୟୁରୋ : ଆସନ୍ତାକାଲିଠୁ ଭୁବନେଶ୍ୱରରେ ଆରମ୍ଭ ହେଉଛି ମେକ ଇନ୍ ଓଡିଶା କନକ୍ଲେଭ । କନକ୍ଲେଭରେ ଦେଶ ବିଦେଶର ପ୍ରାୟ ୮୦୦ ଶିଳ୍ପ ସଂସ୍ଥାର ପ୍ରତିନିଧିମାନେ ଯୋଗଦେବେ । ୫ ଦିନ ପର୍ଯ୍ୟନ୍ତ ଚାଲିବାକୁ ଥିବା ଏହି କନକ୍ଲେଭ ପାଇଁ ରାଜ୍ୟ ସରକାର ଜୋରସୋର ପ୍ରସ୍ତୁତିରେ ଲାଗିପଡିଥିବାବେଳେ ସରକାରଙ୍କ ଉପରେ ବର୍ଷିଛନ୍ତି ବିରୋଧୀ । ଶିଳ୍ପ ଅନୁକୂଳ ବାତାବରଣ ଯୋଗାଇଦେବାରେ ରାଜ୍ୟ ସରକାରଙ୍କ ବିଫଳକୁ ନେଇ ବିଜେପି ପ୍ରଶ୍ନ କରିଥିବା ବେଳେ ନିର୍ବାଚନ ପୂର୍ବରୁ ଏପରି ଧୂଆଁବାଣ କରାଯାଇଥିବା କଂଗ୍ରେସ କହିଛି ।
Kanak News is now on WhatsApp
Join and get latest news updates delivered to you via WhatsApp
କାଲିଠାରୁ ଆରମ୍ଭ ହେବାକୁ ଥିବା ଏହି ମେଗା ଇଭେଂଟ ପାଇଁ ଭୁବନେଶ୍ୱର ଜନତା ମଇଦାନରେ ହୋଇଛି ବ୍ୟାପକ ଆୟୋଜନ । ରାଜ୍ୟରେ ଶିଳ୍ପ ପ୍ରତିଷ୍ଠା ପାଇଁ କିପରି ବାତାବରଣ ରହିଛି, ତାକୁ ସୋ’ କେସ୍ କରିବାକୁ ଯାଉଛନ୍ତି ରାଜ୍ୟ ସରକାର । ଏହି କନକ୍ଲେଭରେ ଦେଶ ବିଦେଶର ପ୍ରାୟ ୮୦୦ ଶିଳ୍ପ ସଂସ୍ଥାର ପ୍ରତିନିଧି ଯୋଗ ଦେବେ । ଶିଳ୍ପପତି, ନିବେଶକମାନଙ୍କର ଏହା ହେବ ମହାସମାଗମ । ରିଲାଏନ୍ସ ଇଣ୍ଡଷ୍ଟ୍ରିଜ୍ ମୁଖ୍ୟ ମୁକେଶ ଅମ୍ବାନୀ, ଗୌତମ ଆଦାନି, କୁମର ମଙ୍ଗଳମ ବିର୍ଲା, ଆନନ୍ଦ ମହିନ୍ଦାଙ୍କ ଭଳି ଦେଶର ବଡ଼ ବଡ଼ ଶିଳ୍ପ ଟାଇକୁନ୍ ମଧ୍ୟ ସାମିଲ ହେବେ ଏହି ଶିଳ୍ପ ମହାକୁମ୍ଭରେ । ପ୍ରାୟ ଅଢେଇ ଲକ୍ଷ କୋଟିର ପୁଂଜି ନିବେଶ ପ୍ରସ୍ତାବ ହାସଲ କରିବାକୁ ଲକ୍ଷ୍ୟ ରଖିଛନ୍ତି ସରକାର ।
ମେକ୍ ଇନ୍ ଓଡ଼ିଶା କନକ୍ଳେଭ ପାଇଁ ରାଜ୍ୟ ସରକାର ବେଶ ଉତ୍ସାହିତ ଥିବାବେଳେ ବର୍ଷିଛନ୍ତି ବିରୋଧୀ । ବିଜେପି ସାଧାରଣ ସଂପାଦକ ଭୃଗୁ ବକ୍ସିପାତ୍ର କହିଛନ୍ତି, ଇଜ୍ ଅଫ୍ ଡୁଇଙ୍ଗ ବିଜିନେସରେ ଫେଲ ମାରିଛି ଓଡ଼ିଶା । ଶିଳ୍ପ ଅନୁକୂଳ ବାତାବରଣ ଯୋଗାଇଦେବାରେ ବିଫଳ ହୋଇଛନ୍ତି ସରକାର । ସେହିପରି ପିସିସି ସଭାପତି ନିରଂଜନ ପଟ୍ଟନାୟକ କହିଛନ୍ତି, ନିର୍ବାଚନକୁ ଦୃଷ୍ଟିରେ ରଖି ରାଜ୍ୟ ସରକାର ଧୂଆଁବାଣ କରୁଛନ୍ତି । ଏହାର ଜବାବରେ ବିଜେଡି କହିଛି ଅଭ୍ୟାସଗତ ନିନ୍ଦୁକ ପାଲଟି ଯାଇଛନ୍ତି ବିରୋଧୀ ।
୫ ଦିନ ଧରି ଚାଲିବ ଏହି ଶିଳ୍ପ ମହାକୁମ୍ଭ । ନିବେଶକ ସମ୍ମିଳନୀ ହେବା ସହ ଏଥିରେ ଓଡ଼ିଶାର କଳା ସଂସ୍କୃତି, ଐତିହ୍ୟ ଓ ପର୍ଯ୍ୟଟନ କ୍ଷେତ୍ରର ମଧ୍ୟ ପ୍ରଦର୍ଶନୀ କରାଯିବ । ୨୦୧୬ରେ ଆୟୋଜିତ ମେକ୍ ଇନ୍ ଇଣ୍ଡିଆ କନକ୍ଲେଭରେ ପ୍ରାୟ ୨ ଲକ୍ଷ କୋଟି ଟଙ୍କା ପୁଂଜି ନିବେଶ ପ୍ରସ୍ତାବ ଆସିଥିବା ଦାବି କରିଥିଲେ ସରକାର । ଏଥର ଏହି ପରିମାଣ ବୃଦ୍ଧି ହେବ ବୋଲି ଆଶା କରାଯାଉଛି ।