ବାଲି ମାଫିଆଙ୍କ ଦୌରାତ୍ମ୍ୟ : ସରକାରୀ ଜିଲ୍ଲାପାଳଙ୍କୁ ଆକ୍ରମଣ; ଭାଙ୍ଗିଲେ ଗାଡି, ଛଡାଇ ନେଲେ ମୋବାଇଲ୍

କନକ ବ୍ୟୁରୋ : ସହକାରୀ ଜିଲ୍ଲାପାଳଙ୍କୁ ବାଲି ମାଫିଆଙ୍କ ଆକ୍ରମଣ । ଗାଡି ଭଙ୍ଗା ରୁଜା କରିବା ସହିତ ମୋବାଇଲ ଛଡାଇ ନେଇଛନ୍ତି ମାଫିଆ । କାମାକ୍ଷାନଗର ସହକାରୀ ଜିଲ୍ଲାପାଳ ମଦନ ମୋହନ ଜେନାଙ୍କୁ ଭୂବନ ମୃଦଙ୍ଗା ବିଦ୍ୟାଳୟ ନିକଟରେ ଅଟକାଇ ଦୁର୍ବୃତ୍ତ ଆକ୍ରମଣ କରିଥିଲେ । ଘଟଣା ଅନୁସାରେ ବାଲି ଚାଲାଣ କରୁଥିବା ୨ଟି ଟ୍ରାକ୍ଟରକୁ ସହକାରୀ ଜିଲ୍ଲାପାଳ ଓ ତାଙ୍କ ଟିମ୍ ରାସ୍ତାରେ ଅଟକାଇଥିଲେ । ଗାଡି ଦୁଇଟିର ନମ୍ବର ନଥିବା ବେଳେ ଏନେଇ ମହୁଲପାଳ ରାଜସ୍ୱ ଅଧିକାରୀଙ୍କୁ ଜଣାଯାଇଥିଲା । ଆରଆଇଙ୍କ ଆସିବାରେ ବିଳମ୍ବ ହେବାରୁ କିଛି ସମୟ ଯାଏ ଗାଡି ଅଟକ ରଖାଯାଇଥିଲା ।

ସେପଟେ ଜରିମାନା ଭୟରେ ବାଲି ମାଫିଆ ଗାଡିରୁ ବାଲି ଅନଲୋଡ କରିବାରେ ଲାଗିଥିଲେ । ଏହି ସମୟରେ ଟିମରେ ଥିବା ଜଣେ କର୍ମଚାରୀ ସମସ୍ତ ଘଟଣାର ଭିଡ଼ିଓ ରେକର୍ଡିଂ କରିଥିଲେ । ଯାହାପାଇଁ ବାଲି ମାଫିଆ ଉତକ୍ଷିପ୍ତ ହୋଇ ଭଙ୍ଗାରୁଜା ଆରମ୍ଭ କରିଦେଇଥିଲେ । ମାଡ ମାରିବା ସହିତ ସହକାରୀ ଜିଲ୍ଲାପାଳଙ୍କ ଫୋନ୍ ଛଡାଇନେଇ ଫେରାର ହୋଇଯାଇଥିଲେ । ଆହତ ଅବସ୍ଥାରେ ତାଙ୍କୁ ମେଡିକାଲରେ ଭର୍ତ୍ତି କରାଯାଇଥିବା ବେଳେ ଘଟଣା ନେଇ ଥାନାରେ ମାମଲା ରୁଜୁ ହୋଇଛି । ସେପଟେ ମାଫିଆ ନେଇଯାଇଥିବା ମୋବାଇଲ ଉଦ୍ଧାର କରାଯାଇ ଜିଲ୍ଲାପାଳଙ୍କୁ ଫେରସ୍ତ କରାଯାଇଛି ।