ଡେଙ୍ଗୁ ଆକ୍ରାନ୍ତଙ୍କ ପାଇଁ ବିପଦ ସାଜୁଛି ପ୍ଲେଟଲେଟ ଅଭାବ। ଗୁରୁତର ରୋଗୀଙ୍କୁ ସହାୟତାର ହାତ ବଢ଼ାଇଲା କମିଶନରେଟ ପୋଲିସ।
କନକ ବ୍ୟୁରୋ: ଭଦ୍ରକ ଜିଲ୍ଲାର କୁନି ପିଲାଟି ହସ୍ପିଟାଲ ବେଡରେ ବଞ୍ଚିବା ପାଇଁ ସଂଘର୍ଷ କରୁଥିବାବେଳେ କମିଶନରେଟ ପୋଲିସର ସହାୟତା ଯୋଗୁଁ ଏବେ ତା ସ୍ୱାସ୍ଥ୍ୟବସ୍ଥାରେ ସୁଧାର ଆସିଛି । ଡେଙ୍ଗୁ ରୋଗରେ ଆକ୍ରାନ୍ତ ହୋଇ ଦୁଇ ଦିନ ତଳେ ଆଇସିୟୁରେ ଥିବା ଏହି କୁନି ପିଲାର ଅବସ୍ଥା ବିଗିଡି ଯାଇଥିଲା । ଏହି ସମୟରେ ଚିକିତ୍ସା କରୁଥିବା ଡାକ୍ତର ଅଚାନକ କହିଥିଲେ ଅଧ ଘଣ୍ଟା ଭିତରେ ପ୍ଲେଟଲେଟ ଆବଶ୍ୟକ । ଏଥିପାଇଁ ଜଣେ ଡୋନର ଦରକାର । ଡାକ୍ତରଙ୍କ କଥା ଶୁଣି ପିଲାଟିର ବାପା ମୁଣ୍ଡରେ ହାତ ଦେଇଥିଲେ । ଏତେ ଶୀଘ୍ର ପ୍ଲେଟଲେଟ ଦେବା ପାଇଁ କେଉଁଠୁ ଡୋନର ଯୋଗାଡ କରିବେ ତାକୁ ଚିନ୍ତାରେ ପଡିଥିଲେ । ଏତିକିବେଳେ ଖବର ପାଇ ସହାୟତାର ହାତ ବଢ଼ାଇଥିଲା କମିଶନରେଟ୍ ପୋଲିସ । ଆଉ ପ୍ଲେଟଲେଟର ବ୍ୟବସ୍ଥା କରିଥିଲା । ପ୍ଲେଟଲେଟ ନେବା ପରେ ପିଲାଟିର ସ୍ୱାସ୍ଥ୍ୟବସ୍ଥା ପୂର୍ବ ଅପେକ୍ଷା ଭଲ ଥିବା କହିଛନ୍ତି ତାଙ୍କ ବାପା ।
Kanak News is now on WhatsApp
Join and get latest news updates delivered to you via WhatsApp
ଡେଙ୍ଗୁ ରୋଗରେ ଆକ୍ରାନ୍ତ ହୋଇ ଗୁରୁତର ହୋଇପଡୁଥିବା ରୋଗୀଙ୍କ ପାଇଁ ପ୍ଲେଟଲେଟ ଅଭାବ ଏକ ବଡ ସମସ୍ୟା ଭାବେ ଉଭା ହୋଇଛି । ଆଉ ଠିକ୍ ସମୟରେ ପ୍ଲେଟଲେଟ ନମିଳିଲେ ଜୀବନ ଯିବାର ଭୟ ରହିଛି । ଏହାକୁ ଅନୁଭବ କରିବା ପରେ କମିଶନରେଟ ପୋଲିସ ପକ୍ଷରୁ ପୋଲିସ କର୍ମଚାରୀଙ୍କଠାରୁ ପ୍ଲେଟଲେଟ୍ ସଂଗ୍ରହ କରାଯାଉଛି । ଏପରିକି ଆବଶ୍ୟକ ସ୍ଥଳେ ସଂଗେ ସଂଗେ ଯାଇ ପ୍ଲେଟଲେଟ ଦାନ କରୁଛନ୍ତି । ଯାହା ଅନେକଙ୍କ ଜୀବନ ବଞ୍ଚାଇବାରେ ସହାୟକ ହେଉଛି ।
ଜଣେ ସାଧାରଣ ମଣିଷର ପ୍ରତି ମାଇକ୍ରୋଲିଟର ରକ୍ତରେ ଦେଢ଼ ଲକ୍ଷରୁ ସାଢ଼େ ୪ଲକ୍ଷ ପର୍ଯ୍ୟନ୍ତ ପ୍ଲେଟଲେଟ ରହିବା ଆବଶ୍ୟକ । ସେହିପରି ଜଣେ ଛୋଟ ପିଲାର ରକ୍ତରେ ଦେଢ଼ ଲକ୍ଷରୁ ୩ଲକ୍ଷ ପର୍ଯ୍ୟନ୍ତ ପ୍ଲେଟଲେଟ ରହିବା ଆବଶ୍ୟକ । କିନ୍ତୁ ଡେଙ୍ଗୁ ସମୟରେ ପ୍ଲେଟଲେଟ୍ ସ୍ତର ଦ୍ରୁତ ଗତିରେ ହ୍ରାସ ପାଇଥାଏ । ଯାହା ଅତି ବିପଦଜନକ । ତେଣୁ ଏଭଳି ଏକ ସମୟରେ କମିଶନରେଟ ପୋଲିସ ସହାୟତାର ହାତ ବଢ଼ାଇଥିବାରୁ ପ୍ରଶଂସା କରାଯାଉଛି ।