ପରଲୋକରେ ବିଶିଷ୍ଠ ଲେଖିକା ପଦ୍ମଶ୍ରୀ ବୀଣାପାଣି ମହାନ୍ତି : ଆଜି କଟକ ସତୀଚଉରାରେ ରାଷ୍ଟ୍ରୀୟ ସମ୍ମାନ ସହ ହେବ ଶେଷକୃତ୍ୟ
କନକ ବ୍ୟୁରୋ : ପରଲୋକରେ ବିଶିଷ୍ଟ ଗାଳ୍ପିକା ପଦ୍ମଶ୍ରୀ ବୀଣାପାଣି ମହାନ୍ତି । କଟକ ବାଦାମବାଡିସ୍ଥିତ ବାସଭବନରେ ଗତକାଲି ସନ୍ଧ୍ୟାରେ ତାଙ୍କର ପରଲୋକ ହୋଇଯାଇଛି । ମୃତ୍ୟୁବେଳକୁ ତାଙ୍କୁ ୮୫ ବର୍ଷ ବୟସ ହୋଇଥିଲା । ବିଣାପାଣୀଙ୍କ ବିୟୋଗରେ ସାରା ରାଜ୍ୟରେ ଶୋକର ଛାୟା ଖେଳିଯାଇଛି । କଟକ ସତୀଚଉରା ଠାରେ ଆଜି ସକାଳ ୧୦ ଟା ୩୦ ମିନିଟ୍ ସମୟରେ ତାଙ୍କର ଶେଷକୃତ୍ୟ ଅନୁଷ୍ଠିତ ହେବ । ରାଷ୍ଟ୍ରୀୟ ସମ୍ମାନ ସହ ତାଙ୍କର ଶେଷକୃତ୍ୟ ସମ୍ପନ୍ନ କରାଯିବ । ପାଟଦେଇ ଓ କସ୍ତୁରୀମୃଗ ଭଳି ସାହିତ୍ୟ କୃତି ବିଣାପାଣିଙ୍କ ପ୍ରସିଦ୍ଧି ଆଣିଦେଇଥିଲା ।
Kanak News is now on WhatsApp
Join and get latest news updates delivered to you via WhatsApp
ନିଜର କୃତି ପାଇଁ ୨୦୨୦ ମସିହାରେ ଭାରତ ସରକାରଙ୍କ ପକ୍ଷରୁ ତାଙ୍କୁ ପଦ୍ମଶ୍ରୀ ସମ୍ମାନରେ ସମ୍ମାନିତ କରାଯାଇଥିଲା । କ୍ଷୁଦ୍ରଗଳ୍ପ କସ୍ତୁରୀମୃଗ ଓ ସବୁଜ ଆରଣ୍ୟ ପାଇଁ ବୀଣାପାଣି ମହାନ୍ତି ୧୯୬୮ ମସିହାରେ ଓଡିଶା ସାହିତ୍ୟ ଏକାଡେମୀ ପୁରସ୍କାର ପାଇଥିଲେ । କ୍ଷୁଦ୍ରଗଳ୍ପ ପାଟଦେଇ ପାଇଁ ୧୯୯୦ ମସିହାରେ ବୀଣାପାଣି ମହାନ୍ତିଙ୍କୁ କେନ୍ଦ୍ର ସାହିତ୍ୟ ଏକାଡେମୀ ପୁରସ୍କାର ବି ମିଳିଥିଲା । ପାଟଦେଇକୁ ନେଇ ଦୂରଦର୍ଶନ ପକ୍ଷରୁ ୧୯୮୭ ମସିହାରେ ‘କଶମକସ୍’ ନାମରେ ସିରିଜ ବି ପ୍ରସ୍ତୁତ ହୋଇଥିଲା ।
ଏହାଛଡା ବିଷୁବ ପୁରସ୍କାର,ଅତିବଡି ଜଗନ୍ନାଥ ଦାସ ପୁରସ୍କାର ଓ ସାରଳା ପୁରସ୍କାର ଭଳି ଅନେକ ପୁରସ୍କାରରେ ସେ ସମ୍ମାନିତ ଓ ପୁରସ୍କୃତ ହୋଇଛନ୍ତି । ୧୯୫୯ ମସିହାରେ ରେଭେନ୍ସାରୁ ଅର୍ଥନୀତିରେ ସ୍ନାତକୋତର ହାସଲ କରିଥିଲେ ବୀଣାପାଣି ମହାନ୍ତି । ଏହାପରେ ବିଭିନ୍ନ କଲେଜରେ ସେ ଅଧ୍ୟାପନା କରି ୧୯୯୨ ମସିହାରେ କଟକ ଶୈଳବାଳା କଲେଜରୁ ଅବସର ନେଇଥିଲେ । ଏହି ପ୍ରଖ୍ୟାତ ଲେଖିକାଙ୍କ ଅନେକ କୃତି ଇଂରାଜୀ, ହିନ୍ଦୀ, କନ୍ନଡ, ମାଲାୟଲମ. ମରାଠୀ, ବଙ୍ଗାଳୀ, ଉର୍ଦ୍ଦୁ, ତେଲୁଗୁ ଓ ଋଷିଆ ଭାଷାରେ ଅନୁବାଦ ହୋଇଛି ।
ତାଙ୍କର କ୍ଷୁଦ୍ରଗଳ୍ପକୁ ନେଇ ‘ଅନ୍ଧକାରର ଛାଇ’ ନାମକ ଏକ ଫିଲ୍ମ ବି ପ୍ରସ୍ତୁତ ହୋଇଥିଲା, ଯାହାକୁ ଦର୍ଶକମାନେ ବେଶ ପ୍ରଶଂସା କରିଥିଲେ । ଋଷିଆର ପ୍ରସିଦ୍ଧ ଲୋକକଥାକୁ ସେ ଇଂରାଜୀରୁ ଓଡିଆକୁ ଅନୁବାଦ କରିଥିଲେ । ବୀଣାପାଣି ମହାନ୍ତି ୩ଟି ଉପନ୍ୟାସ ଓ ୧୬ରୁ ଅଧିକ କ୍ଷୁଦ୍ରଗଳ୍ପ ରଚନା କରିଛନ୍ତି । ସେହିଭଳି କିଛି ପତ୍ରିକାର ସମ୍ପାଦନା ଦାୟିତ୍ୱରେ ବି ଥିଲେ ।