ଏମିତି ବି ଆସେ ମୃତ୍ୟୁ : ନଦୀରେ ବୁଡି ୨ ଛାତ୍ରଙ୍କ ସଲୀଳ ସମାଧି, ଘରୁ ସ୍କୁଲ ବାହାରି ଅଧା ରାସ୍ତାରେ ଗାଧୋଇବାର ନେଉଥିଲେ ମଜା
କନକ ବ୍ୟୁରୋ : ମୃତ୍ୟୁ ଏମିତି ବି ଆସେ । ୬ଜଣ ସ୍କୁଲ ପିଲା ଘରୁ ସିଧା ସ୍କୁଲ ଯିବା କଥା । ହେଲେ ଅଧ ରାସ୍ତାରେ ରୋମାଂଚର ଅନୁଭୂତି ନେବା ପାଇଁ ନଦୀର ଆକର୍ଷଣରେ ଏମିତି ଆଗେଇ ଗଲେ ଯେ, ଆଉ ୨ଜଣ ଫେରି ପାରିଲେ ନାହିଁ । କୁଆଖାଇ ନଦୀରେ ଗାଧୋଇଥିବା ବେଳେ ହଠାତ୍ ପାଣି ସୂଅରେ ଭାସି ଯାଇଥିଲେ ୪ଜଣ । ଅଗ୍ନିଶମ ବିଭାଗର କର୍ମଚାରୀମାନେ ବହୁ ଖୋଜାଖୋଜି କରିବା ପରେ ୨ଛାତ୍ରଙ୍କ ମୃତଦେହ ଉଦ୍ଧାର କରାଯାଇଥିଲା । ମୃତ ଦୁଇଜଣ ଛାତ୍ର ହେଲେ ସଫିକ୍ ଦିଗଲ ଏବଂ ଜଗମୋହନ ସାହୁ । ଏମାନେ ଭୁବନେଶ୍ୱର ୟୁନିଟ୍-୯ ବାଳକ ବିଦ୍ୟାଳୟର ନବମ ଶ୍ରେଶୀ ଛାତ୍ର ।
Kanak News is now on WhatsApp
Join and get latest news updates delivered to you via WhatsApp
ସ୍କୁଲ ଯିବେ କହି ବହିବସ୍ତାନୀ ଧରି ବାହାରିଥିଲେ, ହେଲେ ସ୍କୁଲରେ ପହଂଚିବା ପୂର୍ବରୁ ଘଟିଗଲା ଏମିତି ଏକ ଅଘଟଣ, ଯାହା ଦୁଇଟି ପରିବାରର ହସଖୁସି ସଂପୂର୍ଣ୍ଣ ଉଜୁଡିଦେଲା । ବଢ଼ିଲା ପିଲାଙ୍କ ମୃତ ଦେହ ଦେଖିଲା ବେଳକୁ ଜନ୍ମ ଦେଇଥିବା ମା’ର ଛାତି କୋହରେ ଫାଟି ପଡୁଛି । ପରିବାର ଲୋକ ବି କ’ଣ କରିବେ ଭାବି ପାରୁ ନାହାଁନ୍ତି ।
ୟୁନିଟ୍ ୯ ବଏଜ୍ ହାଇସ୍କୁଲରେ ପାଠ ପଢୁଥିବା ୫ ଜଣ ଛାତ୍ର ସାଙ୍ଗ ହୋଇ ସ୍କୁଲ ବାହାରିଥିଲେ । ହେଲେ ସ୍କୁଲକୁ ଯିବା ପରିବର୍ତ୍ତେ ସେମାନେ ପହଂଚିଯାଇଥିଲେ କୁଆଖାଇ ନଦୀ କୁଳରେ । ଆଉ ଖୁସିମଜାରେ ନଦୀରେ ଗାଧୋଉଥିବା ବେଳେ ହଠାତ୍ ବନ୍ୟା ପାଣି ସୂଅରେ ଭାସିଗଲେ । ଚାହୁଁ ଚାହୁଁ ଚାରିଆଡେ ବ୍ୟାପିଗଲା ଖବର । ସ୍ଥାନୀୟ ମତ୍ସ୍ୟଜୀବୀଙ୍କ ସହ ଯୁଦ୍ଧକାଳୀନ ବେଗରେ ଉଦ୍ଧାରକାର୍ଯ୍ୟରେ ଲାଗି ପଡ଼ିଲେ ଅଗ୍ନଶମ ବିଭାଗର କର୍ମଚାରୀ । ହେଲେ ସେତେବେଳକୁ ବହୁତ ବିଳମ୍ବ ହୋଇସାରିଥିଲା । ଯେତେ ଚେଷ୍ଟା କଲା ପରେ ବି ସଫିକ୍ ଦିଗଲ ଏବଂ ଜଗମୋହନ ସାହୁଙ୍କୁ ବଂଚାଇବା ସଂଭବ ହୋଇନଥିଲା । ଏପଟେ ପିଲାମାନେ ସ୍କୁଲ ଆସିନଥିବା କହି, ପୁରା ଘଟଣାରୁ ହାତ ଝାଡି ଦେଇଛନ୍ତି ସ୍କୁଲ କର୍ତ୍ତୃପକ୍ଷ । ଏହି ଘଟଣା ସମସ୍ତଙ୍କୁ ସ୍ତବ୍ଧ କରି ଦେଇଥିବା ବେଳେ ସ୍କୁଲ ଛାଡୁଥିବା ସମସ୍ତ ଅଭିଭାବକଙ୍କ ପାଇଁ ଏକ ବଡ ଆହ୍ୱାନ ସୃଷ୍ଟି କରିଛି ।