ବିରାଟ-ବିସିସିଆଇ ବିବାଦରେ ମୁହଁ ଖୋଲିଲେ ବିଶ୍ୱବିଜେତା ଖେଳାଳୀ । କହିଲେ, ଗାଙ୍ଗୁଲି ନିଜ ଅନୁଭୂତିରୁ କିଛି ଶିଖିବା କଥା ।
କନକ ବ୍ୟୁରୋ : ଭାରତୀୟ କ୍ରିକେଟରେ ଏବେ ସବୁ କିଛି ଠିକ୍ ଚାଲିନାହିଁ । ବିରାଟ କୋହଲିଙ୍କ ସ୍ଥାନରେ ଟି-୨୦ ଓ ଦିନିକିଆ ଦଳର ଅଧିନାୟକ ଭାର ରୋହିତ ଶର୍ମାଙ୍କୁ ଦେଇଛି ବିସିସିଆଇ । ଆଉ ଏହାପରେ କୋହଲି-ବିସିସିଆଇ ମଧ୍ୟରେ ବୟାନବାଜି ଆରମ୍ଭ ହୋଇଛି । ଆଉ ଏହି ବୟାନବାଜି ଅନେକ ବିବାଦ ମଧ୍ୟ ଛିଡା କରିଛି । ବିସିସିଆଇ ସଭାପତି ସୌରଭ ଗାଙ୍ଗୁଲି କହିଥିଲେ ଯେ, କୋହଲିଙ୍କୁ ଟି-୨୦ ଅଧିନାୟକ ପଦ ନ ଛାଡିବାକୁ କୁହାଯାଇଥିଲା । କିନ୍ତୁ କୋହଲି ଏହାକୁ ଗ୍ରହଣ ନକରି ଟି-୨୦ ଅଧିନାୟକ ପଦ ଛାଡି ଦେଇଥିଲେ । ଆଉ ଏହି ପଦିଏ କଥା ଭାରତୀୟ କ୍ରିକେଟରେ ସବୁ କିଛି ଠିକ୍ ଚାଲିନାହିଁ ବୋଲି ସଂକେତ ଦେଇଥିଲା । ସାମ୍ବାଦିକ ସମ୍ମିଳନୀରେ କୋହଲିଙ୍କ ଏହି ବୟାନ ପରେ ସୌରଭ ଗାଙ୍ଗୁଲି କହିଥିଲେ ଯେ, ବିସିସିଆଇ ଏହି ମାମଲାକୁ ବୁଝିବ, ଏହି ଘଟଣା ଆମ ଉପରେ ଛାଡି ଦିଅନ୍ତୁ ।
Kanak News is now on WhatsApp
Join and get latest news updates delivered to you via WhatsApp
ଆଉ ଏସବୁ ଭିତରେ ୧୯୮୩ ବିଶ୍ୱକପ୍ ବିଜେତା ଟିମର ସଦସ୍ୟ ଥିବା କୀର୍ତ୍ତି ଆଜାଦ କହିଛନ୍ତି, ଏହି ମାମଲାରେ ଗାଙ୍ଗୁଲି ନିଜ ଅନୁଭୂତିରୁ କିଛି ଶିଖିବା କଥା ଓ କୋହଲିଙ୍କ ସହ ଆଲୋଚନା କରି ମାମଲାର ସମାଧାନ କରିବା କଥା । ଏହାପୂର୍ବରୁ ବିଶନ ସିଂ ବେଦୀ ଓ ସୁନୀଲ ଗାଭାସ୍କରଙ୍କୁ କିଭଳି ଅଧିନାୟକ ପଦରୁ ହଟାଯାଇଥିଲା ତାହା ସମସ୍ତେ ଜାଣନ୍ତି । ଭେଙ୍କଟ ରାଘବନ ଫ୍ଲାଇଟରେ ଥିବା ବେଳେ ତାଙ୍କୁ ଅଧିନାୟକ ପଦରୁ ହଟାଯାଇଥିବା ନେଇ ଜାଣିବାକୁ ମିଳିଥିଲା । ତେବେ ସୌରଭ ଗାଙ୍ଗୁଲିଙ୍କୁ ନିଜ ଅନୁଭବରୁ ଶିଖିବାର ଆବଶ୍ୟକତା ଥିଲା ।
ଗ୍ରେଗ୍ ଚାପେଲ ଯେତେବେଳେ ଭାରତୀୟ ଟିମର କୋଚ୍ ଥିଲେ ସେତେବେଳେ ଗାଙ୍ଗୁଲିଙ୍କୁ ଅଧିନାୟକ ପଦରୁ ହଟାଯାଇଥିଲା । ସେତେବେଳେ ଗାଙ୍ଗୁଲିଙ୍କୁ ସମର୍ଥନ କରିଥିବା କଥା କହିଛନ୍ତି କୀର୍ତ୍ତି । ତେଣୁ ନିଜ ଅନୁଭୂତିରୁ ଗାଙ୍ଗୁଲିଙ୍କୁ ଶିଖିବାର ଆବଶ୍ୟକତା ଥିଲା । ବିରାଟଙ୍କ ମାମଲା ସ୍ୱତନ୍ତ୍ର ନୁହେଁ, କିନ୍ତୁ ହଁ ସେ ଜଣେ ଶ୍ରେଷ୍ଠ ବ୍ୟାଟର ଓ କ୍ରିକେଟର । ତେଣୁ କୋହଲିଙ୍କ ସହ ଆଲୋଚନା କରି ପୂରା ବିବାଦର ସମାଧାନ କରିବା ଉଚିତ୍ ବୋଲି କହିଛନ୍ତି କୀର୍ତ୍ତି ।