ପୁଣି ବାଇଡେନଙ୍କ ଟିମ୍ ରେ ଚମକିଲେ ଭାରତୀୟ ମହିଳା । ‘କର୍ମଚାରୀ ପରିଚାଳନା କାର୍ଯ୍ୟାଳୟ’ ର ମୁଖ୍ୟ ହେଲେ କିରଣ ଆହୁଜା
କନକ ବ୍ୟୁରୋ : ‘କର୍ମଚାରୀ ପରିଚଳାନ କାର୍ୟ୍ୟାଳୟ’ର ମୁଖ୍ୟ ଭାବେ ଭାରତୀୟ-ଆମେରିକୀୟ ଓକିଲ ତଥା ଅଧିକାରକର୍ମୀ କିରଣ ଆହୁଜାଙ୍କୁ ଯୁକ୍ତରାଷ୍ଟ୍ର ଆମେରିକାର ରାଷ୍ଟ୍ରପତି ଜୋ’ ବାଇଡେନ୍ ମନୋନୀତ କରିଛନ୍ତି। ଏହି କାର୍ୟ୍ୟାଳୟ ଆମେରିକାର ଦୁଇ ନିୟୁତରୁ ଅଧିକ ବେସାମରିକ ସରକାରୀ କର୍ମଚାରୀଙ୍କୁ ପରିଚାଳନା କରେ। ଯୁକ୍ତରାଷ୍ଟ୍ର ଆମେରିକା ସରକାରରେ ଏହି ଶୀର୍ଷ ପଦବୀ ମଣ୍ଡନ କରିବାରେ ୪୯ ବର୍ଷୀୟ ଆହୁଜା ପ୍ରଥମ ଭାରତୀୟ-ଆମେରିକୀୟ ହେବେ ବୋଲି ସିନେଟ୍ ସୁନିଶ୍ଚିତ କରିଛି।
Kanak News is now on WhatsApp
Join and get latest news updates delivered to you via WhatsApp
୨୦୧୫ରୁ ୨୦୧୭ ପର୍ୟ୍ୟନ୍ତ ଆହୁଜା ‘ଯୁକ୍ତରାଷ୍ଟ୍ର ଆମେରିକା କର୍ମଚାରୀ ପରିଚାଳନା କାର୍ୟ୍ୟାଳୟ’ରେ କର୍ମଚାରୀଙ୍କ ମୁଖ୍ୟ ଭାବେ କାର୍ୟ୍ୟ କରିଥିଲେ। ସାଧାରଣ ସେବା ଏବଂ ଲାଭରହିତ/ଦାତବ୍ୟ କ୍ଷେତ୍ର ନେତୃତ୍ୱରେ ତାଙ୍କର ଦୁଇ ଦଶନ୍ଧିରୁ ଊର୍ଦ୍ଧ୍ୱ ଅଭିଜ୍ଞତା ରହିଛି। ସମ୍ପ୍ରତି ଆହୁଜା ‘ଫିଲାନ୍ଥ୍ରୋପି ନର୍ଥେଓ୍ଵଷ୍ଟ୍’ର ମୁଖ୍ୟ କାର୍ୟ୍ୟନିର୍ବାହୀ ଅଧିକାରିଣୀ ଭାବେ କାର୍ୟ୍ୟରତ। ଏହି ପ୍ରତିଷ୍ଠାନ ହେଉଛି ଦାତବ୍ୟ ପ୍ରତିଷ୍ଠାନଗୁଡ଼ିକର ଏକ ଆଞ୍ଚଳିକ ନେଟ୍ଓ୍ଵାର୍କ।
ଯୁକ୍ତରାଷ୍ଟ୍ର ଆମେରିକାର ନ୍ୟାୟିକ ବ୍ୟବସ୍ଥାରେ ଆହୁଜା ପ୍ରଥମେ ଜଣେ ‘ସିଭିଲ୍ ରାଇଟ୍ସ୍’ ଓକିଲ ଭାବେ କ୍ୟାରିୟର୍ ଆରମ୍ଭ କରିଥିଲେ। ୨୦୦୩ରୁ ୨୦୦୮ ପର୍ୟ୍ୟନ୍ତ ସେ ‘ନ୍ୟାସ୍ନାଲ୍ ଏସିଆନ୍ ପାସିଫିକ୍ ଆମେରିକାନ୍ ଉଇମିନ୍ସ୍ ଫୋରମ୍’ର ପ୍ରତିଷ୍ଠାତା ନିର୍ଦେଶିକା ଭାବେ କାର୍ୟ୍ୟ କରିଥିଲେ। ଏହାଛଡ଼ା, ଓବାମା-ବାଇଡେନ୍ ପ୍ରଶାସନରେ ସେ ‘ଏସିଆନ୍ ଆମେରିକାନ୍ସ୍ ଆଣ୍ଡ୍ ପାସିଫିକ୍ ଆଇଲ୍ୟାଣ୍ଡର୍ସ’ ସଂକ୍ରାନ୍ତ ହ୍ଵାଇଟ୍ ହାଉସ୍ର ଉପକ୍ରମରେ କାର୍ୟ୍ୟନିର୍ବାହୀ ନିର୍ଦେଶିକା ଭାବେ ୬ ବର୍ଷ ବିତାଇ ଥିଲେ। ଜର୍ଜିଆର ସାଭାନ୍ନାରେ ପ୍ରତିପାଳିତ ପ୍ରବାସବାସିନୀ ଆହୁଜା ସ୍ଲେପ୍ମ୍ୟାନ୍ କଲେଜ୍ରୁ ରାଜନୀତି ବିଜ୍ଞାନରେ ସ୍ନାତକ ଏବଂ ଜର୍ଜିଆ ବିଶ୍ୱବିଦ୍ୟାଳୟରୁ ଆଇନରେ ଡିଗ୍ରି ହାସଲ କରିଛନ୍ତି।