କନକ ବ୍ୟୁରୋ : ପ୍ରେମ କାହାଣୀ କେତେ ଭୟାନକ ହୋଇପାରେ ତାହା ଆପଣ କେବେହେଲେ କଳ୍ପନା କରିନଥିବେ । ଖୋର୍ଦ୍ଧା ଜିଲ୍ଲା ଜଙ୍କିଆ ଥାନା ଅଞ୍ଚଳରେ ଦେଖାଯାଇଛି ଏଭଳି ଏକ ଅଭାବନୀୟ ଘଟଣା । ଛୁରୀରେ ପ୍ରେମିକର ଆଖି ତାଡିନେଲେ ପ୍ରେମିକାର ପରିବାର ଲୋକେ । ଏହା ସହ ସମ୍ପୃକ୍ତ ପ୍ରେମିକକୁ ଜୀବନରୁ ଅକର୍ମଣ୍ୟ କରିଦେବା ଭଳି ମଧ୍ୟ ଉଦ୍ୟମ କରିଛନ୍ତି ପ୍ରେମିକାର ପରିବାର ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ଜଙ୍କିଆ ଥାନା ଅନ୍ତର୍ଗତ ଗୋଳାବାହି ପଞ୍ଚାୟତର ବ୍ରାହ୍ମଣ ସାହିରେ ରହୁଥିବା ୧୮ ବର୍ଷୀୟ ବିଶ୍ୱଜିତ ବେହେରା ସେହି ଗ୍ରାମର ଅନ୍ୟ ଏକ ସାହିର ଏକ ଝିଅକୁ ଦୀର୍ଘ ଦୁଇ ବର୍ଷ ହେବ ଭଲ ପାଇ ଆସୁଥିଲା । ଏହି ଭଲପାଇବା ଏକ ପାଖିଆ ନଥିଲା ବରଂ ସେହି ଝିଅ ମଧ୍ୟ ବିଶ୍ୱଜିତକୁ ଭଲପାଉଥିଲା । ଏପରିକି ଗତ ଦୁଇ ବର୍ଷ ତଳେ ଉଭୟ ୨ ଦିନ ପାଇଁ ଘରୁ ଫେରାର ମଧ୍ୟ ହୋଇଯାଇଥିଲେ । ଏନେଇ ଝିଅ ଘର ପକ୍ଷରୁ ଜଙ୍କିଆ ଥାନାରେ ଅଭିଯୋଗ କରାଯାଇଥିଲା । ଅଭିଯୋଗ ପାଇବା ପରେ ପୋଲିସ ତଦନ୍ତ କରିବା ସହ ଦୁଇଜଣଙ୍କୁ ଧରିବାରେ ସଫଳ ହୋଇଥିଲା । କିନ୍ତୁ ଉଭୟ ପୁଅ ଓ ଝିଅ ନାବାଳକ ଏବଂ ନାବାଳିକା ଥିବାରୁ ପୋଲିସ ଉଭୟ ପରିବାର ଲୋକଙ୍କୁ ବୁଝାଇ ସୁଝାଇ ଛାଡିଦେଇଥିଲା ।
ତେବେ ଦୀର୍ଘ ଦିନ ପରେ ସେହି ଶତ୍ରୁତା ପୁଣି ଦେଖାଦେଇଛି । ଏହି ଶତ୍ରୁତା ଯେ, ଦିନେ ଏତେ ଭୟଙ୍କର ହେବ ତାହା କେହି କଳ୍ପନା ମଧ୍ୟ କରନଥିଲେ । ଏବଂ ଗତ ୨୩ ତାରିଖ ରାତି ୧୦.୩୦ ସମୟରେ ସେହି ଝିଅ ବିଶ୍ୱଜିତକୁ ଗ୍ରାମର ମନ୍ଦିର ନିକଟକୁ ଡକାଇଥିଲା । ବିଶ୍ୱଜିତ ସେଠାରେ ପହଞ୍ଚିବା ପରେ ଝିଅର ବାପା ସମେତ ତାର ପରିବାରର ୫ଜଣ ମିଶି ଜୋରଜବରଦସ୍ତ ଭାବରେ ବିଶ୍ୱଜିତକୁ ବାନ୍ଧି ଘରକୁ ଟେକିନେଇଥିଲେ । ସେଠାରେ ତାକୁ ପ୍ରବଳ ମାଡ ମାରିବା ସହ ଗୋଡ ମଧ୍ୟ ଭାଙ୍ଗି ଦେଇଥିଲେ । ଏହା ପରେ ଲୁହା ରଡରେ ଆଖି ତାଡିଦେବାର ସମ୍ପୂର୍ଣ୍ଣ ଉଦ୍ୟମ କରିଥିଲେ ବୋଲି ବିଶ୍ୱଜିତ ଓ ପରିବାର ଲୋକେ ଅଭିଯୋଗ କରିଛନ୍ତି । ଅନ୍ୟପକ୍ଷରେ ପୋଲିସ ଏପର୍ଯ୍ୟନ୍ତ ଘଟଣାସ୍ଥଳରେ ପହଞ୍ଚିନାହିଁ ।