ମରିନା ବିଚରେ କରୁଣାନିଧିଙ୍କ ସମାଧି ସ୍ଥଳ ନେଇ ବିବାଦ: ଜାଗା ଦେବାପାଇଁ ତାମିଲନାଡୁ ସରକାର ଅରାଜି, ମାଡ୍ରାସ ହାଇକୋର୍ଟରେ ଶୁଣାଣି
କନକ ବ୍ୟୁରୋ: ଚେନ୍ନାଇର ମାରିନା ବିଚରେ ପରଲୋକଗତ ଡିଏମକେ ମୁଖ୍ୟଙ୍କ ସମାଧି ହେବ ନା ନାହଁ, ଏ ନେଇ ମାଡ୍ରାସ ହାଇକୋର୍ଟ ଆଉ କିଛି ସମୟ ପରେ ନିଷ୍ପତି ନେବ । ଏ ବାବଦରେ ହାଇକୋର୍ଟରେ ଶୁଣାଣି ଆରମ୍ଭ ହୋଇଛି । କରୁଣାଙ୍କ ମୃତ୍ୟୁ ପରେ ମାରିନା ବିଚରେ ଡିଏମକେ ସମାଧିସ୍ଥଳ କରିବାକୁ ଚାହିୁଁଛନ୍ତି କିନ୍ତୁ ତାମିଲନାଡୁ ସରକାର ଏହାକୁ ଅଗ୍ରାହ୍ୟ କରିଦେଇଛନ୍ତି । ଏହା ପରେ ମାମଲା ମାଡ୍ରାସ ହାଇକୋର୍ଟରେ ଯାଇ ପହଂଚିଛି । ତାମିଲନାଡୁ ସରକାର ଅନ୍ୟ ସ୍ଥାନରେ ସମାଧି ପାଇଁ ଜାଗା ଦେବାକୁ ରାଜି ଅଛନ୍ତି,କିନ୍ତୁ ଡିଏମକେ ମାରିନା ବିଚରେ ସମାଧି କରିବାକୁ ଚାହିୁଁଛି । ଆଉ ଏହାକୁ ନେଇ ବିବାଦ ସୃଷ୍ଟି ହୋଇଛି । ଗତକାଲି ଡିଏମକେ ମୁଖ୍ୟ ଏମ.କରୁଣାନିଧିଙ୍କ ୯୪ ବର୍ଷ ବୟସରେ ପରଲୋକ ହୋଇଥିଲା
Kanak News is now on WhatsApp
Join and get latest news updates delivered to you via WhatsApp
ସେପଟେ କରୁଣାନିଧିଙ୍କ ଅନ୍ତିମ ସଂସ୍କାର ଆଜି ଚେନ୍ନାଇରେ ହେବ । ଡିଏମକେ ମୁଖ୍ୟଙ୍କ ପାର୍ଥିବ ଶରୀରକୁ ବର୍ତମାନ ଚେନ୍ନାଇର ରାଜାଜୀ ହଲରେ ରଖାଯାଇଛି । ସେଠାରେ ବିଭିନ୍ନ ବର୍ଗର ଲୋକ ଓ ନେତା କରୁଣାଙ୍କୁ ଶେଷ ଦର୍ଶନ କରୁଛନ୍ତି । ଦିନ ଗୋଟାଏ ଯାଏଁ ଏହି ଶେଷଦର୍ଶନ ଚାଲିବ । ଶ୍ରଦ୍ଧାଞ୍ଜଳି ଦେବାକୁ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ କଂଗ୍ରେସ ସଭାପତି ରାହୁଲ ଗାନ୍ଧି ଚେନ୍ନାଇ ଯିବେ । ଅନ୍ୟପଟେ ତାଙ୍କର ଶେଷକୃତ୍ୟରେ ରାଜ୍ୟ ସରକାରଙ୍କ ପକ୍ଷରୁ ଅର୍ଥମନ୍ତ୍ରୀ ଶଶିଭୂଷଣ ବେହେରା ଓ ପୂର୍ବତନ ମନ୍ତ୍ରୀ ଦେବୀ ପ୍ରସାଦ ମିଶ୍ର ସାମିଲ ହେବେ ବୋଲି ଜଣାପଡିଛି । ରାଜ୍ୟସଭା ସାଂସଦ ସୌମ୍ୟରଂଜନ ପଟ୍ଟନାୟକ ଶୋକପ୍ରକାଶ କରି କହିଛନ୍ତି, କରୁଣାନିଧିଙ୍କ ଦେହାନ୍ତରେ ଗୋଟିଏ ଯୁଗର ଅବସାନ ଘଟିଛି । କରୁଣାନିଧିଙ୍କ ଦେହାନ୍ତରେ ଗଭୀର ଶୋକ ପ୍ରକାଶ କରିଛନ୍ତି ରାଷ୍ଟ୍ରପତି ରାମନାଥ କୋବିନ୍ଦ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଗତକାଲି ଦୀର୍ଘଦିନର ଅସୁସ୍ଥତା ପରେ କରୁଣାନିଧିଙ୍କ ଚେନ୍ନାଇରେ ପରଲୋକ ହୋଇଥିଲା ।
କରୁଣାନିଧି ବାବଦରେ କିଛି ରୋଚକ କଥା
କରୁଣାନିଧିଙ୍କ ଥିଲେ ୩ ଜଣ ପତ୍ନୀ । ପ୍ରଥମ ପତ୍ନୀ ପଦ୍ମାବତୀଙ୍କ ପରଲୋକ ହୋଇଯାଇଛି ଦ୍ୱିତୀୟ ପତ୍ନୀ ଦୟାଲୁ ଆମ୍ମାଲ ଓ ତୃତୀୟ ପତ୍ନୀ ରଜତି ଆମ୍ମାଲ । କରୁଣାନିଧିଙ୍କ ୩ ପୁଅ ଓ ଦୁଇ ଝିଅ ଅଛନ୍ତି । ଏମାନଙ୍କ ମଧ୍ୟରୁ ଦ୍ୱିତୀୟ ପତ୍ନୀ ଅର୍ଥାତ ଦୟାଲୁ ଅମ୍ମାଲଙ୍କ ଦୁଇ ପୁଅ ଆଲାଗିରି ଓ ଷ୍ଟାଲିନ ରାଜନୀତିରେ ସକ୍ରିୟ ଅଛନ୍ତି । ତୃତୀୟ ପତ୍ନୀ ଅର୍ଥାତ ରଜତି ଆମ୍ମାଲଙ୍କ ଝିଅ କାନିମୋଝିି ଏବେ ରାଜ୍ୟସଭା ସାଂସଦ । ଅନ୍ୟମାନେ ଚଳଚିତ୍ର ଓ ବ୍ୟବସାୟରେ ସକ୍ରିୟ ଅଛନ୍ତି । କରୁଣାନିଧି ବହୁ ବିବାଦର ନାୟକ । ଦୁର୍ନୀତି ପାଇଁ ସରକାରିଆ କମିଶନ ତାଙ୍କୁ ଦାୟୀ କରିଥିଲେ । ଦୁର୍ନୀତି ଓ ଷଡଯନ୍ତ୍ର ଅଭିଯୋଗରେ ଇନ୍ଦିରା ଗାନ୍ଧି କରୁଣା ସରକାରକୁ ବରଖାସ୍ତ ବି କରିଥିଲେ । ଦୁର୍ନୀତି ଅଭିଯୋଗରେ ୨୦୦୧ରେ ଗିରଫ ହୋଇଥିଲେ କରୁଣାନିଧି । ଏଲଟିଟିଇ ମୁଖ୍ୟ ପ୍ରଭାକରନଙ୍କ ସହ ସମ୍ପର୍କକୁ ନେଇ ବି ବିବାଦରେ ଥିଲେ ପରଲୋକଗତ ଡିଏମକେ ମୁଖ୍ୟ । ସେ ପ୍ରଭାକରନକୁ ନିଜ ବନ୍ଧୁ ବୋଲି କହି ବିବାଦକୁ ଆସିଥିଲେ ଓ ସମାଲୋଚନାର ଶୀକାର ବି ହୋଇଥିଲେ । ଏପରିକି ସେ ଏଲଟିଟିଇକୁ ପ୍ରୋତ୍ସାହନ ଦେଉଛନ୍ତି ବୋଲି ରାଜୀବ ଗାନ୍ଧି ହତ୍ୟାକାଣ୍ଡର ତଦନ୍ତ କରୁଥିବା ଜଷ୍ଟିସ ଜୈନ କମିଶନ ବି ଦୋଷାରପ କରିଥିଲେ । ଦକ୍ଷିଣ ଭାରତରେ ହିନ୍ଦୀକୁ ବିରୋଧ କରୁଥିଲେ କରୁଣାନିଧି । ହିନ୍ଦୀ-ହଟାଅ ଆନ୍ଦୋଳନରେ ସେ ନିଜକୁ ସାମିଲ କରିଥିଲେ । ସ୍କୁଲରେ ହିନ୍ଦି ବାଧ୍ୟତାମୂଳକ କରାଯିବାକୁ ବିରୋଧ କରୁଥିଲେ କରୁଣାନିଧି ।
ରାଜନୀତିର ଶିଖର ଛୁଇଁଥିବା କରୁଣାନିଧି ତାମିଲ ସାହିତ୍ୟରେ ନିଜ ଉଲ୍ଲେଖନୀୟ ଯୋଗଦାନ ପାଇଁ ଖୁବ୍ ପ୍ରସିଦ୍ଧ ଥିଲେ । କବିତା, ସଂଲାପ, ଉପନ୍ୟାସ, ଐତିହାସିକ ଉପନ୍ୟାସ, ମଂଚ ନାଟକ ଓ ଗୀତ ଲେଖିବାରେ ମାହିର ଥିଲେ କରୁଣାନିଧି । ତାମିଲ ଭାଷାରେ ଅନେକ ଲୋକପ୍ରୀୟ ପୁସ୍ତକର ରଚୟିତା ଥିଲେ ଏମ କରୁଣାନିଧି । ଏହା ବ୍ୟତୀତ କଳା ପ୍ରତି ମଧ୍ୟ ଥିଲା ତାଙ୍କର ଅହେତୁକ ଦୁର୍ବଳତା । ଖବର କାଗଜ ସମ୍ପାଦକ ଓ ପ୍ରଶାସକ ଭାବେ ମଧ୍ୟ କରୁଣାନିଧି ଥିଲେ ବିଶେଷ ଲୋକପ୍ରୀୟ । ଭାଷା ଆଧାରରେ ତାମିଲନାଡୁକୁ ଗୁରୁତ୍ୱ ଦେବା ତାଙ୍କୁ ଘରେ ଘରେ ଲୋକପ୍ରୀୟତା ଆଣି ଦେଇଥିଲା ।
ତାମିଲ ରାଜନୀତିର ଦୁଇ ମହାନ ତାରକା ଜୟଲଳିତା ଓ କରୁଣାନିଧି
ଉଭୟଙ୍କ ମଧ୍ୟରେ ଅନେକ ପ୍ରସଙ୍ଗକୁ ନେଇ ମତଭେଦ ଦେଖିବାକୁ ମିଳିଥିଲା । ଜୟଲଳିତା ଥିଲେ କଳାକାର । କରୁଣାନିଧି ଥିଲେ ଜଣେ କବି । ଲୋକପ୍ରିୟତା ଦୃଷ୍ଟିରୁ କେହି କାହାରିକୁ କମ୍ ନଥିଲେ । ଭଲ ବକ୍ତା ଭାବେ ମଧ୍ୟ କରୁଣାନିଧିଙ୍କ ରହିଥିଲା ସ୍ୱତନ୍ତ୍ର ପରିଚୟ । କୁହାଯାଏ ଅତିତରେ କରୁଣାନିଧିଙ୍କ କବିତା ଶୁଣିବାକୁ ଜୟଲଳିତା ମଧ୍ୟ ଅପେକ୍ଷା କରୁଥିଲେ । ତାମିଲ ରାଜନୀତି ସହ ଜଡିତ ଲୋକ ଖୁବ ଭଲ ଭାବରେ ଜାଣନ୍ତି ଯେ, ରାଜନୀତିକୁ ନେଇ ଉଭୟେ କିପରି ଶତ୍ରୁତା ରହିଥିଲା ।