ତେଲେଙ୍ଗାନା ସରକାରଙ୍କ ବଡ ଘୋଷଣା । ପ୍ରତି ଦଳିତ ପରିବାରଙ୍କ ବ୍ୟାଙ୍କ ଆକାଉଣ୍ଟକୁ ଦିଆଯିବ ୧୦ ଲକ୍ଷ ଟଙ୍କାର ସହାୟତା ରାଶି
କନକ ବ୍ୟୁରୋ : ରାଜ୍ୟର ଦଳିତ ଲୋକମାନଙ୍କୁ ଆର୍ଥିକ ସହାୟତା ନେଇ ତେଲେଙ୍ଗାନା ସରକାର ବଡ ଘୋଷଣା କରିଛନ୍ତି । ଦଳିତ ଲୋକମାନଙ୍କ ଜୀବନ ଶୈଳୀରେ ପରିବର୍ତ୍ତନ ଆଣିବାକୁ କେ.ସି.ଆର ସରକାର ପ୍ରତି ଦଳିତ ପରିବାରର ବ୍ୟାଙ୍କ ଆକାଉଣ୍ଟରେ ୧୦ ଲକ୍ଷ ଟଙ୍କା ଡିପୋଜିଟ୍ କରିବା ନେଇ ଘୋଷଣା କରିଛନ୍ତି । କୁହାଯାଇଛି କି, ଏହି ଯୋଜନାର ପ୍ରଥମ ପର୍ଯ୍ୟାୟରେ ୧୧,୯୦୦ ଲୋକଙ୍କୁ ଚିହ୍ନଟ କରାଯିବ ।
Kanak News is now on WhatsApp
Join and get latest news updates delivered to you via WhatsApp
ସରକାର ପ୍ରସ୍ତୁତ କରିଥିବା ଯୋଜନା ମୁତାବକ ରାଜ୍ୟର ୧୧୯ ବିଧାନସଭା କ୍ଷେତ୍ର ମଧ୍ୟରୁ ପ୍ରତିଟି ବିଧାନସଭା କ୍ଷେତ୍ରରୁ ୧୦୦ ଟି ଲେଖାଏଁ ଦଳିତ ପରିବାରକୁ ଚିହ୍ନଟ କରାଯିବ । ପ୍ରତି ପରିବାରର ଜଣେ ଲୋକକୁ ଚିହ୍ନଟ କରାଯାଇ ତାଙ୍କ ବ୍ୟାଙ୍କ ଆକାଉଣ୍ଟରେ ୧୦ ଲକ୍ଷ ଟଙ୍କା ଜମା କରାଯିବ ।
କହିରଖୁ କି ତେଲେଙ୍ଗାନା ସରକାରଙ୍କ ‘ରାୟଥୁ ବନ୍ଧୁ’ ଯୋଜନା ଭଳି ଏହି ଯୋଜନାରେ ବି ଚିହ୍ନଟ ହୋଇଥିବା ଲୋକଙ୍କ ବ୍ୟାଙ୍କ ଆକାଉଣ୍ଟକୁ ସିଧା ସଳଖ ଟଙ୍କା ପଠାଯିବ । ରବିବାର ଦିନ ମୁଖ୍ୟମନ୍ତ୍ରୀ କେ.ଚନ୍ଦ୍ରଶେଖର ରାଓ ଏକ କାର୍ଯ୍ୟକ୍ରମରେ ଦଳିତ ଅଧିକାର ଉପରେ ଚର୍ଚ୍ଚା କରିଥିଲେ । ଏହି କାର୍ଯ୍ୟକ୍ରମରେ ରାଜ୍ୟର ସମସ୍ତ ରାଜନୈତିକ ଦଳର ସଦସ୍ୟମାନେ ଉପସ୍ଥିତ ଥିଲେ । ଦଳିତ ଲୋକମାନଙ୍କୁ ଆର୍ଥିକ ସ୍ତରରେ ମଜବୁତ କରିବାକୁ ଏଭଳି ନିଷ୍ପତ୍ତି ନିଆଯାଇଥିବା କଥା କୁହାଯାଇଛି । ଏନେଇ ରାଜ୍ୟ କ୍ଷମତାରେ ଥିବା ଚନ୍ଦ୍ରଶେଖର ରାଓଙ୍କ ପାର୍ଟି ଟିଆରଏସ୍ ଦାବି କରିଛି ଏହି ଯୋଜନା ମାଧ୍ୟମରେ ଦଳିତ ଲୋକମାନଙ୍କର ଆର୍ଥିକ ବିକାଶ ହୋଇପାରିବ ।