ସୁପ୍ରିମକୋର୍ଟର ମୁଖ୍ୟ ବିଚାରପତି ହେବେ ଉଦୟ ଉମେଶ ଲଳିତ, ରାଷ୍ଟ୍ରପତି ଲଗାଇଲେ ମୋହର
କନକ ବ୍ୟୁରୋ : ସୁପ୍ରିମକୋର୍ଟର ମୁଖ୍ୟ ବିଚାରପତି ଭାବେ ଉଦୟ ଉମେଶ ଲଳିତକୁ ନିଯୁକ୍ତି ଦିଆଯାଇଛି । ଏବେ ମୁଖ୍ୟ ବିଚାରପତି ଥିବା ଜଷ୍ଟିସ ଏନଭି ରମନ୍ନାଙ୍କ ସୁପାରିଶ ଉପରେ ମୋହର ମାରିଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ । ଜଷ୍ଟିସ ଲଳିତ ଦେଶର ୪୯ ତମ ମୁଖ୍ୟ ବିଚାରପତି ଭାବେ ନିଯୁକ୍ତ ହୋଇଛନ୍ତି । ସେପଟେ ମୁଖ୍ୟ ବିଚାରପତି ଥିବା ଜଷ୍ଟିସ ଏନଭି ରମନ୍ନା ଚଳିତମାସ ୨୬ ତାରିଖରେ ଅବସର ନେଉଥିବାରୁ ୨୭ ତାରିଖ ଦିନ ଜଷ୍ଟିସ ଉମେଶ ଉଦୟ ଲଳିତ ମୁଖ୍ୟ ବିଚାରପତି ଭାବେ ଶପଥ ନେବେ ।
Kanak News is now on WhatsApp
Join and get latest news updates delivered to you via WhatsApp
କହିରଖୁ କି ଜଷ୍ଟିସ ଲଳିତ ମୁସଲମାନ ସଂପ୍ରଦାୟର ତିନ୍ ତଲାକ ଭଳି ପ୍ରଥା ଉପରେ ଗୁରୁତ୍ୱପୂର୍ଣ୍ଣ ରାୟ ଦେବା ସହ ଅନେକ ଐତିହାସିକ ରାୟ ଦେଇ ଚର୍ଚ୍ଚାରେ ଥିଲେ । ୟୁ ୟୁ ଲଳିତ ଏଭଳି ଦ୍ୱିତୀୟ ମୁଖ୍ୟ ବିଚାରପତି ହେବାକୁ ଯାଉଛନ୍ତି ଯେ କି ସୁପ୍ରିମକୋର୍ଟ ବାରରୁ ସିଧା ସଳଖ ପଦୋନ୍ନତି ପାଇ ମୁଖ୍ୟ ବିଚାରପତି ହୋଇଛନ୍ତି । ତାଙ୍କ ପୂର୍ବରୁ ଜଷ୍ଟିସ ଏସ ଏମ ଶିକରୀ ୧୯୬୪ ମାର୍ଚ୍ଚ ମାସରେ ଶୀର୍ଷ ଅଦାଲତ ପୀଠରୁ ସିଧା ସଳଖ ପଦୋନ୍ନତି ପାଇଥିବା ପ୍ରଥମ ବିଚାରପତି । ସେ ଜାନୁଆରୀ ୧୯୭୧ ମସିହାରେ ପ୍ରଧାନ ବିଚାରପତି ଭାବେ ମନୋନ୍ନିତ ହୋଇଥିଲେ ।
ହେଲେ ସବୁଠାରୁ ବଡ କଥା କି ସେ ମାତ୍ର ୭୪ ଦିନ ପାଇଁ ଏହି ପଦରେ ରହିବେ । ଏହାର କାରଣ ହେଉଛି ଜଷ୍ଟିସ ଲଳିତ ନଭେମ୍ବର ୮ ତାରିଖରେ ଅବସର ନେବାକୁ ଯାଉଛନ୍ତି । ଜଷ୍ଟିସ ୟୁୟୁ ଲଳିତ ସୁପ୍ରିମକୋର୍ଟର ସେହି କଲେଜିୟମର ନେତୃତ୍ୱ ନେବେ ଯେଉଁ କଲେଜିୟମରେ ଜଷ୍ଟିସ ଡିୱାଇ ଚନ୍ଦ୍ରଚୁଡ, ଜଷ୍ଟିସ କୌଲ, ଜଷ୍ଟିସ ନଜୀର ଓ ଜଷ୍ଟିସ ଇନ୍ଦୀରା ବାନାର୍ଜୀ ସାମିଲ ହେବେ । ହେଲେ ଜଷ୍ଟିସ ଇନ୍ଦୀରା ବାନାର୍ଜୀ ସେପ୍ଟେମ୍ବର ୨୩ ତାରିଖରେ ଅବସର ନେଉଥିବାରୁ ତାଙ୍କ ସ୍ଥାନରେ ଜଷ୍ଟିସ ଏମ କେ ଜୋସେଫ ସାମିଲ ହେବେ ।
ସେପଟେ ଜଷ୍ଟିସ ୟୁୟୁ ଲଳି ନଭେମ୍ବର ୮ ତାରିଖରେ ଅବସର ନେବା ପରେ ଜଷ୍ଟିସ ଡିୱାଇ ଚନ୍ଦ୍ରଚୁଡ ତାଙ୍କ ସ୍ଥାନରେ ମୁଖ୍ୟ ବିଚାରପତି ଆସନରେ ବସିବେ । ତାଙ୍କର କାର୍ଯ୍ୟକାଳ ମାତ୍ର ୨ ବର୍ଷ ରହିବ । ସୂଚନା ଥାଉକି ଜଷ୍ଟିସ ୟୁ ୟୁ ଲଳିତ ହେଉଛନ୍ତି ସୁପ୍ରିମକୋର୍ଟର ଦ୍ୱିତୀୟ ମୁଖ୍ୟ ବିଚାରପତି । ଯେ କି, ସିଧାସଳଖ ବାରରୁ ସୁପ୍ରିମକୋର୍ଟର ବିଚାରପତି ଭାବେ ଚୟନ କରାଯାଇଥିଲା । ତାଙ୍କ ପୂର୍ବରୁ ଜଷ୍ଟିସ ଶିକରୀ ବାରରୁ ସୁପ୍ରିମକୋର୍ଟର ବିଚାରପତି ଭାବେ ନିଯୁକ୍ତ ହୋଇ ଶେଷରେ ମୁଖ୍ୟ ବିଚାରପତି ଭାବେ ଅବସର ନେଇଥିଲେ ।