ଝରାଫୁଲ ମୃତ୍ୟୁ ମାମଲାରେ ଏବେ ବି ଯାଜପୁର ପୋଲିସ ହାତରେ ଲାଗୁନି ତଥ୍ୟ । କହୁଛନ୍ତି , ତଦନ୍ତ ଚାଲିଛି …
କନକ ବ୍ୟୁରୋ: ରାଜଧାନୀରୁ ମହିଳାଙ୍କ ମୁଣ୍ଡବିହୀନ ଶବ ଉଦ୍ଧାର ଓ ରମାଦେବୀ ଛାତ୍ରୀ ଝରାଫୁଲଙ୍କ ମୃତ୍ୟୁ । ନିକଟରେ ଏହି ଦୁଇଟି ଅପରାଧ ଘଟଣା ସାରା ରାଜ୍ୟରେ ଚର୍ଚ୍ଚା ସୃଷ୍ଟି କରିଥିଲା । ଗୋଟିଏ ପଟେ ମୁଣ୍ଡ ନଥିବା ଶରୀରକୁ ଚିହ୍ନଟ କରି ଅପରାଧୀକୁ ଧରିବା ବଡ ଚ୍ୟାଲେଂଜ ଥିଲା । ଆଉ ଗୋଟିଏ ପଟେ ଅପରାଧୀ ପାଖରେ ଅଛି, ତାଠାରୁ ସତ ଉଗାଳିବା, ମୁଖ୍ୟ କାମ ଥିଲା । କିନ୍ତୁ ଓଲଟା ହେଲା । କଟାମୁଣ୍ଡ କାହାଣୀର ପର୍ଦ୍ଦାଫାସ ହେଲା , ହେଲେ ଝରାଫୁଲ କାହାଣୀ ଏବେ ବି ରହସ୍ୟ ଘେରରେ ।
Kanak News is now on WhatsApp
Join and get latest news updates delivered to you via WhatsApp
ଏହି ଘଟଣାରେ ଯାଜପୁର ପୁଲିସର ନେତୃତ୍ୱ ନେଉଛନ୍ତି ରାହୁଳ ପିଆର ଏବଂ ଝରାଫୁଲ ହତ୍ୟା ଘଟଣାର ତଦନ୍ତ ଦାୟିତ୍ୱ ନେଇଛନ୍ତି ବରିଷ୍ଠ ପୁଲିସ ଅଧିକାରୀ ତଥା ଏସଡିପିଓ ଚିନ୍ମୟ ନାୟକ , କିନ୍ତୁ ଫଳଘର ଶୂନ । ଚିନ୍ମୟ ନାୟକ ଗତ ୧୮ ଦିନ ହେଲାଣି ତଦନ୍ତ କଲେଣି । ପାଖରେ ମୁଖ୍ୟ ଅଭିଯୁକ୍ତ ବି ଅଛି । କିନ୍ତୁ ଝରାଫୁଲକୁ କିଏ ଓ କାହିଁକି ମାରିଲା, ପଚାରିଲେ କହନ୍ତି ତଦନ୍ତ ଚାଲିଛି ।
ଗତ ଜାନୁଆରୀ ୨୬ ତାରିଖ ରାତିରେ ଭୁବନେଶ୍ୱରର ଏକ ହୋଟେଲରେ ଏକୁଟିଆ ଝରାଫୁଲ ଓ ରାକେଶ ଥିଲେ । ସକାଳୁ ମୃତ ଦେହକୁ ଧରି ଶହେ କିଲୋମିଟର ଦୂରରେ ଯାଜପୁରରେ ଫିଙ୍ଗିଦେଲା ରାକେଶ । ରାକେଶ ତ ଧରାପଡିଲା, କିନ୍ତୁ ତାସହ ପୁଲିସର ଅପାରଗତା ବି ଧରାପଡିଲା । ଝରାଫୁଲ ମାମଲାରେ ପୁଲିସ ପାଖରେ ଅଭିଯୁକ୍ତ ଅଛି, ମୃତ ଝରାଫୁଲର ପୋଷ୍ଟମର୍ଟମ ରିପୋର୍ଟ ଅଛି, ଭିସେରା ରିପୋର୍ଟ ବି ଅଛି, ମୋବାଇଲ ଅଛି, କଲ୍ ରେକର୍ଡ ଅଛି.. ସବୁ ଅଛି । କିନ୍ତୁ ପୋଲିସ ପାଖରେ ତଥ୍ୟ ନାହିଁ । ଏଭଳି ପରିସ୍ଥିତିରେ ମାମଲା କମିଶନରେଟ୍ ପୁଲିସକୁ ହସ୍ତାନ୍ତର କରିବାକୁ ବିଭିନ୍ନ ମହଲରେ ଦାବି ହୋଇଛି ।