କନକ ବ୍ୟୁରୋ : ଠିକ୍ ବ୍ଲକ୍ ଉପାଧ୍ୟକ୍ଷ ନିର୍ବାଚନ ପୂର୍ବରୁ ତିର୍ତୋଲ ବିଧାୟିକା ରାଜଶ୍ରୀ ମଲ୍ଲିକ ଆଣିଛନ୍ତି ସାଂଘାତିକ୍ ଅଭିଯୋଗ । ରଘୁନାଥପୁର ବ୍ଲକର ଉପାଧ୍ୟକ୍ଷ ପଦ ହାତେଇବା ପାଇଁ ଜଣେ ସମିତି ସଭ୍ୟଙ୍କୁ କରାଯାଇଛି ଅପହରଣ । ଆଉ ଏହି ସମଗ୍ର ଘଟଣାରେ ବରିଷ୍ଠ ନେତା ତଥା ଜିଲ୍ଲା ବିଜେଡି ସଭାପତି ବିଷ୍ଣୁ ଦାସ ଆଡକୁ ଇସାରା କରିଛନ୍ତି ତିର୍ତୋଲ ବିଧାୟିକା । ସିଧା ନାଁ ନେଇନାହାନ୍ତି ହେଲେ ଆଙ୍ଗୁଠି ଉଠିଛି ବିଷ୍ଣୁଙ୍କ ଆଡକୁ ।
Kanak News is now on WhatsApp
Join and get latest news updates delivered to you via WhatsApp
ତେବେ ଗଣମାଧ୍ୟମର ଚାପରେ ଆସି ଏହି ଦୁଇ ଜଣ ସମିତି ସଭ୍ୟଙ୍କୁ ଛାଡ଼ି ଦିଆଯାଇଥିବା କନକ ନ୍ୟୁଜକୁ ସେ ସୂଚନା ଦେଇଛନ୍ତି । ଏଥିସହ ଏହି ଦୁଇ ଅପହୃତଙ୍କ ଉପସ୍ଥିତିରେ ପୁରା ଷଡଯନ୍ତ୍ରର ଖୁଲାସା କରାଯିବ ବୋଲି ରାଜଶ୍ରୀ ମଲ୍ଲିକ କନକ ନ୍ୟୁଜକୁ ସୂଚନା ଦେଇଛନ୍ତି ।
ସେପଟେ ରାଜଶ୍ରୀଙ୍କ ଅଭିଯୋଗ ଶୁଣି ବିଷ୍ଣୁ ନିଆଁବାଣ । ଉଗାଳିଛନ୍ତି ଅଗ୍ନି । କହିଛନ୍ତି, ରାଜଶ୍ରୀ ନୂଆ ନୂଆ ରାଜନୀତି କରୁଛନ୍ତି । ଯଦି ଅଭିଯୋଗ ପ୍ରମାଣିତ ହୁଏ ସେ ରାଜନୀତିରୁ ସନ୍ୟାସ ନେବେ, ଆଉ ଭୁଲ ପ୍ରମାଣିତ ହେଲେ ବିଧାୟିକା କଣ କରିବେ? ଖାଲି ଏତିକି ନୁହେଁ, ପାଲଟା ଅଭିଯୋଗ କରିଛନ୍ତି, ରାଜଶ୍ରୀ ଅପହରଣରେ ଓସ୍ତାଦ ।
ବ୍ଲକ୍ ଅଧ୍ୟକ୍ଷ ପଦ ପାଇଁ ନିର୍ବାଚନ ବେଳେ ବି ଆସିଥିଲା ଅନୁରୁପ ଅଭିଯୋଗ । ଯେଉଁଥିରେ ବିଷ୍ଣୁ ଦାସଙ୍କ ପସନ୍ଦର ପ୍ରାର୍ଥୀଙ୍କୁ ଦୌଡ଼ରୁ ହଟାଇବା ପାଇଁ ଏମିତି ଏକ ଅପହରଣ ହୋଇଥିବା ଅଭିଯୋଗ ହୋଇଥିଲା । ଆଉ ଏହି ଦୁଇ କ୍ୟାମ୍ପର ଲଢେଇ ଜଗତସିଂହପୁର ରାଜନୀତିକୁ ସରଗରମ କରିଛି ।
ଦାମ ରାଉତ, ବିଷ୍ଣୁ ଦାସ ଏବଂ ରାଜଶ୍ରୀ ମଲ୍ଲିକ । ଜଗତସିଂହପୁର ରାଜନୀତିର ତିନି ଚର୍ଚ୍ଚିତ ଚେହେରା । ବିଜେଡି ସଂଗଠନର ମଙ୍ଗ ନିଜ ହାତରେ ନେବାକୁ ପରସ୍ପର ଭିତରେ ଛକାପଂଝା । ତେବେ ବଡ କଥା ହେଉଛି, ପଂଚାୟତ ନିର୍ବାଚନକୁ ନିରପେକ୍ଷ ଓ ଅବାଧ କରିବା ପାଇଁ ନିର୍ବାଚନ କମିଶନ ଅନବରତ ପ୍ରାୟ କରୁଥିବା ବେଳେ ରାଜ୍ୟର କୋଣଅନୁକୋଣରୁ ଆସୁଛି ଏଭଳି ଅପହରଣ ଅଭିଯୋଗ । ଏବଂ ଜଗତସିଂହପୁର ଜିଲ୍ଲାରୁ ଆସିଥିବା ଏହି ଅଭିଯୋଗ ବିଜେଡିର ଆଭ୍ୟନ୍ତିରଣ ରାଜନୀତିକୁ ସରଗରମ କରିଛି ।