ଭାରତରେ ଆମେରିକା ରାଷ୍ଟ୍ରପତିଙ୍କ ଝିଅ ! ବିଶ୍ୱ ଉଦ୍ୟେଗ ସମ୍ମିଳନୀରେ ଯୋଗଦେବେ ଇଭାଙ୍କା ଟ୍ରମ୍ପ
କନକ ବ୍ୟୁରୋ: ଭାରତରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଝିଅ ଇଭାଙ୍କା ଟ୍ରମ୍ପ । ବିଳମ୍ବିତ ରାତିରେ ହାଇଦ୍ରାବାଦରେ ପହଁଚିଛନ୍ତି । ଅଷ୍ଟମ ଗ୍ଲୋବାଲ ଏଂଟରପ୍ରେନୁଅରସିପ ସମ୍ମିଟ ବା ବିଶ୍ୱ ଔଦ୍ୟୋଗିକ ସମ୍ମିଳନୀରେ ସେ ଯୋଗଦେବେ । ଏଥିପାଇଁ ଆମେରିକା ଗସ୍ତ ସମୟରେ ତାଙ୍କୁ ଆମନ୍ତ୍ରଣ କରିଥିଲେ ପ୍ରଧାନମନ୍ତ୍ରୀ ମୋଦି । ନୂଆଦିଲ୍ଲୀ ଓ ନ୍ୟୁୟର୍କର ମିଳିତ ସହଭାଗିତାରେ ଆୟୋଜିତ ହେଉଥିବା ଏହି ବିଶ୍ୱ ସମ୍ମିଳନୀରେ ୧୭୦ଟି ଦେଶରୁ ପ୍ରାୟ ୧୫ଶହ ଶିଳ୍ପପତି ଓ ବିଭିନ୍ନ ଶିଳ୍ପସଂସ୍ଥାର ପ୍ରତିନିଧି ଯୋଗଦେବେ । ଏବଂ ଆମେରିକା ପ୍ରତିନିଧି ଦଳର ନେତୃତ୍ୱ ନେବେ ଇଭାଙ୍କା ଟ୍ରମ୍ପ ।
Kanak News is now on WhatsApp
Join and get latest news updates delivered to you via WhatsApp
ବ୍ୟବସାୟିକ କ୍ଷେତ୍ରରେ ମହିଳା ପ୍ରତିନିଧିତ୍ୱକୁ ଦର୍ଶାଉଥିବା ଏହି ବିଶ୍ୱ ସମ୍ମିଳନୀର ଥିମ ରହିଛି ‘ଓମେନ ଫାଷ୍ଟ, ପର୍ସପରିଟି ଫର ଅଲ’ । ତେବେ ସମ୍ମିଳନୀ ଆରମ୍ଭ ହେବା ପୂର୍ବରୁ ପ୍ରଧାନମନ୍ତ୍ରୀ ମୋଦିଙ୍କୁ ସାକ୍ଷାତ କରିବେ ଇଭାଙ୍କା ଟ୍ରମ୍ପ । ଚଳିତ ଥରର ବିଷୟବସ୍ତୁ ରହିଛି – ‘ପ୍ରଥମେ ମହିଳା, ସମସ୍ତଙ୍କ ସମୃଦ୍ଧି’ ଏବଂ ପ୍ରଥମ ଥର ଲାଗି ଏଥିରେ ସର୍ବାଧିକ ୫୨.୨ ପ୍ରତିଶତ ମହିଳା ଅଂଶଗ୍ରହଣ କରୁଛନ୍ତି । ଏପରିକି ଆଫଗାନିସ୍ତାନ, ସାଉଦି ଆରବ ଏବଂ ଇସ୍ରାଏଲ ସମେତ ୧୦ରୁ ଅଧିକ ମୁସ୍ଲିମ ରାଷ୍ଟ୍ରର କେବଳ ମହିଳା ଉଦ୍ୟୋଗୀମାନେ ଯୋଗଦେଇ ବିଭିନ୍ନ ଅଧିବେଶନ ଏବଂ କର୍ମଶାଳାରେ ଉଦବୋଧନ ଦେବାର କାର୍ଯ୍ୟକ୍ରମ ରହିଛି । ମଙ୍ଗଳବାର ଅପରାହ୍ନ ସାଢ଼େ ୪ଟାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସମ୍ମିଳନୀ ଉଦଘାଟନ କରି ପ୍ରଥମେ ଅଭିଭାଷଣ ରଖିବା ପରେ ତେଲେଙ୍ଗାନା ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ ଏବଂ ଇଭାଙ୍କା ଟ୍ରମ୍ପ୍ ଉଦବୋଧନ ଦେବେ । ଭାରତର ବୈଦେଶିକ ବ୍ୟାପାର ମନ୍ତ୍ରୀ ସୁଷମା ସ୍ୱରାଜ ଏବଂ ପ୍ରତିରକ୍ଷା ମନ୍ତ୍ରୀ ନିର୍ମଳା ସୀତାରମଣ ମଧ୍ୟ ଏଥିରେ ଯୋଗ ଦେବାର କାର୍ଯ୍ୟକ୍ରମ ରହିଛି।
ଭାରତୀୟ ପ୍ରତିରକ୍ଷା ମନ୍ତ୍ରୀ ନିର୍ମଳା ସୀତାରମଣ ଓ ଆଇସିଆଇସିଆଇ ସିଇଓ ଚନ୍ଦା କୋଚରଙ୍କୁ ମଧ୍ୟ ସାକ୍ଷାତ କରିବେ ଇଭାଙ୍କା ଟ୍ରମ୍ପ । ଗ୍ଲୋବାଲ ଏଂଟରପ୍ରେନୁଅର ସମ୍ମିଟରେ ଇଭାଙ୍କାଙ୍କ ଅଭିଭାଷଣ ପରେ ସମ୍ବୋଧିତ କରିବେ ପ୍ରଧାନମନ୍ତ୍ରୀ ମୋଦି । ଆମେରିକାର ପ୍ରାୟ ୩ଶହ ୫୦ ଉଦ୍ୟୋଗପତିଙ୍କ ପ୍ରତିନିଧିତ୍ୱ କରିବେ ଇଭାଙ୍କା ଟ୍ରମ୍ପ । ଏବଂ କୌଣସି ବିଶ୍ୱସ୍ତରର ସମ୍ମିଳନୀରେ ପ୍ରଥମଥର ଲାଗି ଆମେରିକାକୁ ପ୍ରତିନିଧିତ୍ୱ କରିବେ ଇଭାଙ୍କା । ଯାହା ବ୍ୟବସାୟ ଓ ନିବେଶ କ୍ଷେତ୍ରରେ ମହିଳାଙ୍କ ଭାଗିଦାରିକୁ ମଜଭୂତ କରିବ ବୋଲି କୁହାଯାଉଛି ।
ଇଭାଙ୍କାଙ୍କ ପାଇଁ ହାଇଦ୍ରାବାଦରେ ନିରାପତ୍ତା ବ୍ୟବସ୍ଥାକୁ କଡ଼ାକଡ଼ି କରାଯାଇଛି । ସହରରୁ ଭିକାରୀମାନଙ୍କୁ ତଡ଼ି ଦିଆଯାଇଛି । ଇଭାଙ୍କାଙ୍କ ପାଇଁ ୧୦ ହଜାର ନିରାପତ୍ତା ଯବାନଙ୍କୁ ମୁତୟନ କରାଯାଇଛି । ଟ୍ରମ୍ପ ଆମେରିକାର ରାଷ୍ଟ୍ରପତି ପଦ ଗ୍ରହଣ କରିବା ପରେ ଇଭାଙ୍କାର ଏହା ହେବ ପ୍ରଥମ ବଡ଼ ଧରଣର ବିଦେଶ ଗସ୍ତ। ଟ୍ରମ୍ପଙ୍କ ବଡ଼ ଝିଅ ୩୬ ବର୍ଷୀୟା ଇଭାନା ହେଉଛନ୍ତି ହ୍ଵାଇଟ୍ ହାଉସର ଅନ୍ୟତମ ଉପଦେଷ୍ଟା ।