ସର୍ଜିକାଲ ଷ୍ଟ୍ରାଇକକୁ ପୂରିଲା ୬ ବର୍ଷ: ଯେବେ ଆତଙ୍କୀ ଗଡରେ ଆତଙ୍କ ରଚିଥିଲେ ଯବାନ, ମାଟିରେ ମିଶିଯାଇଥିଲେ ମୃତ୍ୟୁର ସୌଦାଗର
କନକ ବ୍ୟୁରୋ: ଥରି ଉଠିଥିଲା ଶତ୍ରୁ ଶିବିର, ଯେବେ ଆତଙ୍କୀ ଗଡରେ ଆତଙ୍କ ରଚିଥିଲେ ଯବାନ । ଶୂନଶାନ ରାତିରେ ପାକିସ୍ତାନ ମାଟିରେ ପାନେ ପାଇଥିଲେ ଆତଙ୍କବାଦୀ । ଖଣ୍ଡ ଖଣ୍ଡ ହୋଇ ମାଟିରେ ମିଶିଯାଇଥିଲେ ମୃତ୍ୟୁର ସୌଦାଗର । ରକ୍ତର ବଦଲା ରକ୍ତରେ ନେଇଥିଲା ହିନ୍ଦୁସ୍ତାନ । ଆଉ ବିଶ୍ୱ ଦେଖିଥିଲା ଭୟଙ୍କର ସର୍ଜିକାଲ ଷ୍ଟ୍ରାଇକ । ଆଜି ଭାରତୀୟ ଯବାନଙ୍କ ସେହି ସର୍ଜିକାଲ ଷ୍ଟ୍ରାଇକକୁ ପୂରିଛି ୬ ବର୍ଷ ।
Kanak News is now on WhatsApp
Join and get latest news updates delivered to you via WhatsApp
୧୮ ସେପ୍ଟେମ୍ବର ବିଳମ୍ବିତ ରାତିରେ ଉରି ଉତ୍ତର କାଶ୍ମୀରର ବାରାମୂଲା ଜିଲ୍ଲାରେ ସେନାର ବେସ କ୍ୟାମ୍ପ ଉପରେ ଆତ୍ମଘାତୀ ଆକ୍ରମଣ କରିଥିଲେ ଆତଙ୍କବାଦୀ । ସୈତାନ ଶତ୍ରୁ, ନିଦରେ ଶୋଇଥିବା ଆମ ଯବାନମାନଙ୍କୁ ହତ୍ୟା କରିଥିଲେ । ଶୋକରେ ବୁଡିଥିବା ଭାରତୀୟଙ୍କ ମନରେ ସେତେବେଳେ ଜୋସ ଭରିଥିଲା ଯେତେବେଳେ ପ୍ରଧାନମନ୍ତ୍ରୀ କହିଥିଲେ ବ୍ୟର୍ଥ ଯିବନି ଆମ ଯବାନଙ୍କ ବଳିଦାନ । ସବୁବେଳେ ଶାନ୍ତିରେ ବିଶ୍ୱାସ ରଖୁଥିବା ଭାରତ ଏବେ ଚୁପ ବସିବନି । କାରଣ ଏ ହେଉଛି ନୂଆ ଭାରତ । ଏ ଭାରତ ଶତ୍ରୁର ଘରେ ବି ପଶିବ, ଆଉ ବଳିଗାନର ବଦଲା ବି ନେବ ।
ଆତଙ୍କୀ ଦେଶରେ ସେଦିନ ଥିଲା ଆତଙ୍କର ରାତି । ବିଧ୍ୱଂସଲିଳା ରଚିଥିଲେ ବୀର ଯବାନ । ରକ୍ତର ବଦଲା ରକ୍ତରେ ନେଇଥିଲା ଭାରତ । ଉରି ଆକ୍ରମଣର ପାଲଟା ଜବାବ ଦେବାକୁ ଯାଇ ଅନ୍ଧାର ରାତିରେ ଆତଙ୍କୀ ଦେଶରେ ପଶି, ସୈତାନଙ୍କ ପାଇଁ ଷଡଯନ୍ତ୍ର ରଚିଥିଲେ ବୀର ଯବାନ । ପ୍ରଥମ ସର୍ଜିକାଲ ଷ୍ଟ୍ରାଇକ ପାଇଁ ସେପ୍ଟେମ୍ବର ୨୪ ତାରିଖରୁ ଭାରତୀୟ ସେନା କରିଥିଲେ ପ୍ଲାନ । ଆଉ ସେତେବେଳେ ପାକିସ୍ତାନ ଅଧିକୃତ କାଶ୍ମୀରରେ ଥିବା ଆତଙ୍କୀ ଶିବିରକୁ ଧ୍ୱସଂ କରିବାକୁ ଭାରତର ଘାତକ କମାଣ୍ଡୋମାନେ ସେପ୍ଟେମ୍ବର ୨୮, ୨୯ ମଧ୍ୟ ରାତିରେ କରିଥିଲେ ଭୟଙ୍କର ହାମଲା ଆଖି ପିଛୁଳାକେ ଘୋଟିଯାଇଥିଲା ଆତଙ୍କୀ ଦେଶ ଆକାଶରେ ଆତଙ୍କର କଳା ବାଦଲ ।
ଗୋଟିଏ ପରେ ଗୋଟିଏ ଆତଙ୍କୀ ଶିବିରକୁ ଧ୍ୱସଂ କରିଦେଇଥିଲେ ଆମ ବୀର ଯବାନ । ଖୋଜି ଖୋଜି ଜଣ ଜଣ କରି ଆତଙ୍କବାଦୀଙ୍କୁ ନିପାତ କଲେ । ଆତଙ୍କୀ ଦେଶରେ ଖେଳିଯାଇଥିଲା ଆତଙ୍କ । ପାଖାପାଖି ୨-୩ ଘଣ୍ଟାର ସର୍ଜିକାଲ ଷ୍ଟ୍ରାଇକ ପରେ ପିଓକେରେ ଥିବା ସବୁ ଆତଙ୍କୀ ଶିବିରକୁ ଧ୍ୱସଂ କରି ଭାରତ ମାଟିକୁ ଫେରିଆସିଥିଲେ ବୀର ଯବାନ ।
ସେହି ଭୟଙ୍କର ସର୍ଜିକାଲ ଷ୍ଟ୍ରାଇକକୁ ପୂରିଛି ୬ ବର୍ଷ । ଆଉ ବୀର ଯବାନଙ୍କ ବିଧ୍ୱଂସଲିଳାକୁ ଆଜି ବି ମନେ ରଖିଛି ସୈଦାନ ପାକିସ୍ତାନ । କେବଳ ପାକିସ୍ତାନ କାହିଁକି ସାରା ବିଶ୍ୱ ଦେଖିଥିଲା ଭାରତର ଶକ୍ତି । ସେବେଠାରୁ ସେପ୍ଟମ୍ବର ୨୯କୁ ସାହସୀ ବୀରଙ୍କ ପରାକ୍ରମ ଉଦ୍ଦେଶ୍ୟରେ ମନେ ରଖିଛି ଭାରତ । ଏହି ଦିନ ଆସିଲେ ପ୍ରତିଟି ଭାରତୀୟଙ୍କ ଛାତି ଗର୍ବରେ ଫୁଲି ଉଠେ । କାରଣ ବୀର ଯବାନଙ୍କ ବୀରତ୍ୱ ଅଧ୍ୟାୟ, ଇତିହାସର ସ୍ୱର୍ଣ୍ଣିମ ଅଧ୍ୟାୟରେ ଲିପିବଦ୍ଧ ହୋଇ ରହି ସାରିଛି ।