ଶ୍ରୀଲଙ୍କା ବମ ବିସ୍ଫୋରଣ ପାଇଁ ନିଜକୁ ଦାୟୀ କଲା ISIS । ଆତ୍ମଘାତୀ ଆକ୍ରମଣରେ ଗଲାଣି ୩୦୦ ଜୀବନ, ମୃତକଙ୍କ ମଧ୍ୟରେ ୧୦ ଭାରତୀୟ ସାମିଲ
ଶ୍ରୀଲଙ୍କାରେ ଆତ୍ମଘାତୀ ଆକ୍ରମଣ ପାଇଁ ନିଜକୁ ଦାୟୀ କଲା ଇସଲାମିକ ଷ୍ଟେଟ । ଏନେଇ ଏକ ଗଣମାଧ୍ୟମ ପକ୍ଷରୁ ସୂଚନା ଦିଆଯାଇଛି । ଏହି ଆତ୍ମଘାତୀ ଆକ୍ରମଣରେ ଲଗାତାର ମୃତକଙ୍କ ସଂଖ୍ୟା ବଢିଚାଲିଛି । ଏହି ବିସ୍ଫୋରଣରେ ମୃତକଙ୍କ ସଂଖ୍ୟା ମଙ୍ଗଳବାର ସୁଦ୍ଧା ୩୦୦ରେ ପହଞ୍ଚିଲାଣି । ରବିବାର ଇଷ୍ଟର ପର୍ବ ଚାଲୁଥିବା ବେଳେ ଦେଶର ୮ଟି ସ୍ଥାନରେ ସିରିୟଲ ବମ ବିସ୍ଫୋରଣ ହୋଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଏହି ବିସ୍ଫୋରଣରେ ପ୍ରାୟ ୧୦ ଜଣ ଭାରତୀୟ ମୃତ୍ୟୁବରଣ କରିଥିବା ବେଳେ ମୋଟ ୪୫ ଜଣ ବିଦେଶୀଙ୍କର ମୃତ୍ୟୁ ହୋଇଛି । ଆକ୍ରମଣ ପରେ ଶ୍ରୀଲଙ୍କା ସଂସଦରେ ଜରୁରୀକାଳୀନ ଅଧିବେଶନ ଡକାଯାଇଛି । ପୂରା ଦେଶରେ ଶୋକର ଛାୟା ଖେଳି ଯାଇଥିବା ବେଳେ ୫୦୦ରୁ ଅଧିକ ଲୋକ ଆହତ ହୋଇଛନ୍ତି । ତେଣୁ ମୃତ୍ୟୁ ସଂଖ୍ୟା ବୃଦ୍ଧି ପାଇପାରେ ବୋଲି ଅନୁମାନ କରାଯାଉଛି ।
ଇଷ୍ଟର ଉତ୍ସବ ପାଳନ କରାଯାଉଥିବା ବେଳେ ଶ୍ରୀଲଙ୍କାରେ ସିରିଜ ବୋମା ବିସ୍ଫୋରଣ ହୋଇଥିଲା । ଆଉ ଏତେ ବଡ ଆକ୍ରମଣ ପାଇଁ ସରକାର ବିଦେଶୀ ଆତଙ୍କବାଦୀଙ୍କୁ ଦାୟୀ କରିଥିଲା । ଏପରିକି ଗୁଇନ୍ଦା ରିପୋର୍ଟ ଅନୁଯାୟୀ ସ୍ଥାନୀୟ ଆତଙ୍କବାଦୀଙ୍କ ସହ ବିଦେଶୀ ଆତଙ୍କବାଦୀ ମାନେ ମିଶି ଏଭଳି କାଣ୍ଡ ଭିଆଇଛନ୍ତି । ତେଣୁ ପୂରା ଦେଶରେ ହାଇଆଲର୍ଟ ଜାରି କରାଯିବା ସହ କର୍ଫ୍ୟୁ ଲଗାଇଛନ୍ତି ସରକାର । ରବିବାର ବମ ବିସ୍ଫୋରଣ ପରେ ସୋମବାର ମଧ୍ୟ ୮୭ ଡୋଟେନେଟର ମିଳିଥିବା ସୂଚନା ମିଳିଛି । ତେଣୁ ଶ୍ରୀଲଙ୍କା ଉପରେ ଏବେ ପର୍ଯ୍ୟନ୍ତ ମଧ୍ୟ ବିପଦ ଟଳିନାହିଁ ।