ଚାଷୀ-ପୋଲିସ ସଂଘର୍ଷ ପରେ ବନ୍ଦ ହେଲା ଇଣ୍ଟରନେଟ୍ ସେବା । ଦିଲ୍ଲୀ-ଏନସିଆରର ଅନେକ ଅଞ୍ଚଳରେ ଇଣ୍ଟରନେଟ୍ ସେବା ସାମୟିକ ଭାବେ ବନ୍ଦ ହୋଇଛି ।
କନକ ବ୍ୟୁରୋ : ଦେଶର ରାଜଧାନୀ ଦିଲ୍ଲୀରେ ଚାଷୀ ଟ୍ରାକ୍ଟର ରାଲିରେ ହିଂସା ଘଟିବା ପରେ ଦିଲ୍ଲୀ-ଏନସିଆରର ଅନେକ ଅଞ୍ଚଳରେ ଇଣ୍ଟରନେଟ ସେବା ବନ୍ଦ କରାଯାଇଛି । ଏହି ଅଞ୍ଚଳଗୁଡ଼ିକ ମଧ୍ୟରେ ସିଙ୍ଗୁ ସୀମା, ଟିକରି ସୀମା, ଗାଜିପୁର ସୀମା, ମୁବାରକା ଚୌକ ଏବଂ ନାଙ୍ଗଲୋଇ ଆଦି ରହିଛି । ଏସବୁ ଅଞ୍ଚଳରେ ଇଣ୍ଟରନେଟ୍ ସେବାକୁ ସାମୟିକ ଭାବେ ବନ୍ଦ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ସରକାରଙ୍କ ଦ୍ୱାରା ଜାରି ଏହି ନିର୍ଦ୍ଦେଶ ଅନୁଯାୟୀ, ମଙ୍ଗଳବାର ରାତି ୧୨ଟା ପର୍ଯ୍ୟନ୍ତ ଇଣ୍ଟରନେଟ୍ ସେବା ବନ୍ଦ ରହିବ । ତେବେ କେନ୍ଦ୍ର ସରକାର କିମ୍ବା ରାଜ୍ୟ ସରକାରଙ୍କ ଗୃହ ସଚିବ ଇଣ୍ଟରନେଟ୍ ସେବା ଉପରେ ପ୍ରତିବନ୍ଧକ ଲଗାଇବାକୁ ନିର୍ଦ୍ଦେଶ ଦେଇଥାଆନ୍ତି । ଏହି ଆଦେଶ ଏସପି କିମ୍ବା ତଦୁର୍ଦ୍ଧ୍ୱ ପଦବୀର ଜଣେ ଅଧିକାରୀଙ୍କ ମାଧ୍ୟମରେ ପଠାଯାଇଥାଏ । ଏହାପରେ ଅଧିକାରୀ ସେବା ପ୍ରଦାନକାରୀଙ୍କୁ ଇଣ୍ଟରନେଟ୍ ସେବାକୁ ବନ୍ଦ କରିବାକୁ କହିଥାଆନ୍ତି ।
ଯେକୌଣସି ଆନ୍ଦୋଳନ, ଦଙ୍ଗା ଏବଂ ହିଂସାତ୍ମକ ଘଟଣା ସମୟରେ ପୁଲିସ-ପ୍ରଶାସନକୁ ସେହି ଅଞ୍ଚଳର ଇଣ୍ଟରନେଟ୍ ସେବା ବନ୍ଦ କରିବାର ଅଧିକାର ରହିଛି । ଏହା ଏଥିପାଇଁ କରାଯାଇଥାଏ କି ଇଣ୍ଟରନେଟ ସେବା ଦ୍ୱାରା କୌଣସି ପ୍ରକାର ଗୁଜବ, ମିଥ୍ୟା ଖବର ଓ ଭୁଲ ବାର୍ତ୍ତା ପ୍ରଚାର ନକରାଯାଉ । ଯଦି କିଛି ଗୁଜବ ବା ମିଥ୍ୟା ଖବର ପ୍ରଚାର ହୋଇଯାଏ ତେବେ ପରିସ୍ଥିତି ଖରାପ ହେବାର ସମ୍ଭାବନା ରହିଥାଏ । ଏଭଳି ପଦକ୍ଷେପ ସୁରକ୍ଷା ଏବଂ ଶାନ୍ତି ବଜାୟ ରଖିବା ପାଇଁ ନିଆଯାଇଥାଏ । ଏଥିସହିତ ଲୋକମାନେ ଭୁଲ ତଥ୍ୟ ଆଧାରରେ ଭୟଭୀତ ହେବ ନାହିଁ ।