ଇଂଜେକ୍ସନ ଅଭାବରୁ ବିଶାଖାପାଟଣାରେ ଘରୋଇ ହସ୍ପିଟାଲରେ ଜୀବନ ମରଣ ସହ ଲଢେଇ କରୁଛନ୍ତି ବ୍ରହ୍ମପୁରର ପରିବାର । ଦୁଇ ଦିନ ଧରି ସିଡିଏମଓଙ୍କୁ ଅନୁରୋଧ ପରେ ବି ମିଳୁନି ଟୋସିଲିଜୁମାବ ଇଂଜେକ୍ସନ ।
କନକ ବ୍ୟୁରୋ: ଅକ୍ସିଜେନ ପରେ ଏବେ ଔଷଧ ଅଭାବ । ଇଂଜେକସନ ପାଇଁ ଅଟକିଛି ଜୀବନ । ଇଂଜେକସନ ଅଭାବରୁ ବିଶାଖାପାଟଣା ଘରୋଇ ହସ୍ପିଟାଲରେ ଜୀବନ ମରଣ ସହ ସଂଗ୍ରାମ କରୁଛନ୍ତି ବ୍ରହ୍ମପୁରର ଗୋଟିଏ ପରିବାରର ୪ ଜଣ ସଦସ୍ୟ । ବ୍ରହ୍ମପୁର ଗାନ୍ଧିନଗର ନିବାସୀ ଉତ୍ତମ ନାୟକ, ତାଙ୍କର ୬୦ ବର୍ଷୀୟ ବାପା ଭଗବାନ ନାୟକ, ମା ସାବିତ୍ରୀ ନାୟକ ଓ ଭଉଣୀ ପ୍ରତିଭା କୋଭିଡ ଆକ୍ରାନ୍ତ ହୋଇ ବିଶାଖାପଟଣା ଇଣ୍ଡସ ହସ୍ପିଟାଲରେ ଚିକିତ୍ସାଧୀନ ରହିଛନ୍ତି । ତେବେ ଉତ୍ତମ ନାୟକଙ୍କ ଅବସ୍ଥା ସଙ୍କଟାପନ୍ନ ଥିବାରୁ ତାଙ୍କ ଜୀବନ ବଂଚେଇବା ପାଇଁ ଟୋସିଲିଜୁମାବ ଇଂଜେକସନ ଆବଶ୍ୟକତା ରହିଛି । ଆଉ ଏହି ଇଂଜେକସନର ଅଭାବ ଯୋଗୁ ଏହାର ବ୍ୟବହାର ବା ବିକ୍ରିକୁ ନିଜ ନିୟନ୍ତ୍ରଣରେ ରଖିଛି ସ୍ୱାସ୍ଥ୍ୟ ବିଭାଗ । ତେବେ ଏହି ଇଂଜେକସନ ଲାଗି ହସ୍ପିଟାଲ କର୍ତୃପକ୍ଷ ବିଶାଖପାପାଟଣା ସିଡିଏମଓଙ୍କୁ ଲିଖିତ ଭାବେ ଜଣାଇ ଥିଲେ ହେଁ ଗତ ଦୁଇ ଦିନ ଧରି କୌଣସି ସୁଫଳ ମିଳିନାହିଁ ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଉତ୍ତମଙ୍କ ସମ୍ପର୍କୀୟ ହାତରେ ପ୍ରେସ୍କ୍ରିପଶନ୍ ଧରି ବିଶାଖାପାଟଣାର ଗଳି କନ୍ଦି ବୁଲି ଥିଲେ ହେଁ ଇଂଜେକସନ ମିଳୁନାହିଁ । ଏପରି ସ୍ଥିତିରେ ପରିବାରର ଜୀବନ ବଂଚାଇବା ପାଇଁ ଉଭୟ ଆନ୍ଦ୍ର ଓ ଓଡିଶା ସରକାରଙ୍କୁ ଆକୁଳ ନିବେଦନ କରିଛନ୍ତି ରୋଗୀଙ୍କ ସମ୍ପର୍କୀୟ । ସେହିପରି ରେମିଡିସିଭିର ପରି ଇଂଜେକସନର କଳା ବଜାରୀ ସହ ଏହାର ଗୋଟିଏ ଭାଇଲ ୨୫ ରୁ ୩୦ ହଜାର ଟଙ୍କାରେ ବିଶାଖାପଟଣାରେ ବିକ୍ରି ହେଉଥିବା ଚର୍ଚ୍ଚା ହେଉଛି ।