ଦେଶ ପାଇଁ ବିଦେଶରେ ଗୌରବ ସାଉଣ୍ଟିଲେ କର୍ଣ୍ଣାଟକର ଝିଅ ରଶ୍ମୀ ସାମନ୍ତ । ଜିତିଲେ ଅକ୍ସଫୋର୍ଡ ଛାତ୍ର ସଂଘର ଅଧ୍ୟକ୍ଷ ପଦ
କନକ ବ୍ୟୁରୋ : ଏବେ ଦେଶର ମହିଳା ମାନେ ଆଉ ପଛରେ ନାହାନ୍ତି । ଯାହାର ପ୍ରମାଣ ଦୈନିକ ଗଣମାଧ୍ୟମରେ ପ୍ରକାଶ ପାଉଛି । ଆମେରିକାର ଜୋ- ବାଇଡେନଙ୍କ ଟିମ୍ ରେ ସାମିଲ ହୋଇଛନ୍ତି ଅନେକ ଭାରତୀୟ ମହିଳା । ଏହା ସହ ଆମେରିକାର ଉପରାଷ୍ଟ୍ରପତି ଭାବେ ବି ଜଣେ ଭାରତୀୟ ବଂଶୋଦ୍ଭବ ମହିଳା କମଳା ହାରିସ୍ ନିର୍ବାଚିତ ହେବା ପରେ ଆମେ ନିଜକୁ ଗୌରବାନ୍ୱିତ ମନେ କରୁଥିଲୁ । ହେଲେ ଏହି ଗୌରବର ପୃଷ୍ଟାରେ ପୁଣି ନାମ ଲେଖାଇଛନ୍ତି ଜଣେ ଭାରତୀୟ ଛାତ୍ରୀ ।
Kanak News is now on WhatsApp
Join and get latest news updates delivered to you via WhatsApp
କର୍ଣ୍ଣାଟକ ରାଜ୍ୟର ଝିଅ ରଶ୍ମୀ ସାମନ୍ତ ଅକ୍ସଫୋର୍ଡ ବିଶ୍ୱ ବିଦ୍ୟାଳୟରେ ଛାତ୍ର ସଂଗଠନର ଅଧ୍ୟକ୍ଷ ଭାବେ ନିର୍ବାଚିତ ହୋଇଛନ୍ତି । ରଶ୍ମୀ ହେଉଛନ୍ତି ପ୍ରଥମ ଭାରତୀୟ ମହିଳା ଯେ କି ଇଂଲଣ୍ଡର ଅକ୍ସଫୋର୍ଡ ବିଶ୍ୱ ବିଦ୍ୟାଳୟ ଛାତ୍ରସଂଘ ନିର୍ବାଚନରେ ଅଧ୍ୟକ୍ଷ ଭାବେ ନିର୍ବାଚିତ ହୋଇଛନ୍ତି । ରଶ୍ମୀ ମଣିପାଲ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜିର ପୂର୍ବତନ ଛାତ୍ରୀ ।
ଅକ୍ସଫୋର୍ଡ ୟୁନିଭରସିଟ୍ ଅଧିକାରୀଙ୍କ ୱେବସାଇଟର ସୂଚନା ମୁତାବକ ରଶ୍ମୀ ସାମନ୍ତଙ୍କ ବିରୋଧରେ ଏହି ନିର୍ବାଚନରେ ଅନ୍ୟ ୩ ଜଣ ପ୍ରାଥୀ ହୋଇଥିଲେ । ହେଲେ ରଶ୍ମୀଙ୍କୁ ସର୍ବାଧିକ ଭୋଟ ମିଳିଛି । ଏହି ପଦ ପାଇଁ ମୋଟ ୩୭୦୮ ଟି ଭୋଟ ପଡିଥିଲା । ଯାହା ମଧ୍ୟରୁ ରଶ୍ମୀଙ୍କୁ ୧,୯୬୬ ଖଣ୍ଡ ଭୋଟ ମିଳିଛି ।
ରଶ୍ମୀ ସାମନ୍ତ ଅକ୍ସଫୋର୍ଡ ବିଶ୍ୱବିଦ୍ୟାଳୟରେ ଲିନ୍ କେୟାର କଲେଜରେ ଏନର୍ଜି ସିଷ୍ଟମ ପାଠ୍ୟକ୍ରମ ପାଇଁ ଏମଏସସି କରୁଛନ୍ତି । ସେ ଚଳିତ ନିର୍ବାଚନରେ ମୁଖ୍ୟତ ୪ ଟି ସମସ୍ୟା ଉପରେ ଫୋକସ କରିଥିଲେ । ଯାହାକୁ ନେଇ ତାଙ୍କୁ ଏଭଳି ସଫଳତା ମିଳିଛି । ଏହି ୪ ଟି ସମସ୍ୟା ମଧ୍ୟରୁ ୨ ଟି ପ୍ରମୁଖ ସମସ୍ୟାକୁ ସେ ଛାତ୍ର ଛାତ୍ରୀଙ୍କ ଆଗରେ ରଖିଥିଲେ । ପ୍ରଥମଟି ବିଶ୍ୱବିଦ୍ୟାଳୟ ଭିତରେ ଥିବା ସବୁ ସାମ୍ରାଜ୍ୟବାଦୀ ନେତାଙ୍କ ପ୍ରତିମା ହଟାଯାଉ ଓ କରୋନା ମହାମାରୀ ସମ୍ପୂର୍ଣ୍ଣ ଶେଷ ନହେବା ଯାଏ ପିଲାମାନଙ୍କ ଠାରୁ ଦେୟ ଆଦାୟ ବନ୍ଦ କରାଯାଉ । ଏହି ସମସ୍ୟାକୁ ସେ ଏତେ ସଠିକ୍ ଢଙ୍ଗରେ ଉପସ୍ଥାପନ କରିଥିଲେ କି ଯାହା ତାଙ୍କୁ ଏଭଳି ସଫଳତା ଦେଇଛି ।
ରଶ୍ମୀଙ୍କ ବାପା ଦିନେଶ ସାମନ୍ତ ଜଣେ ବ୍ୟବସାୟୀ ଓ ମା ବତ୍ସଲା ଜଣେ ଗୃହିଣୀ ଅଟନ୍ତି । ରଶ୍ମୀ ମଣିପାଲ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି (୨୦୧୬-୨୦୨୦) ମଧ୍ୟରେ ସ୍ନାତୋକ ଛାତ୍ରୀ ଥିଲେ । ସେ ମଣିପାଲ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜିରେ ଛାତ୍ରସଂଘର ଟେକ୍ନୋଲୋଜି ସଚିବ ପଦରେ ବି ଅବସ୍ଥାପିତ ହୋଇଥିଲେ ।