ୟୁଏଇରେ ଭାରତୀୟଙ୍କ ସ୍ୱପ୍ନ ସାକାର। ଉଦଘାଟିତ ହେଲା ଭବ୍ୟ ମନ୍ଦିର।
କନକ ବ୍ୟୁରୋ: ୟୁଏଇରେ ରହୁଥିବା ୩୫ ଲକ୍ଷ ଭାରତୀୟ ଏବଂ ଦୁବାଇରେ ରହୁଥିବା ୨୦ ଲକ୍ଷ ଭାରତୀୟଙ୍କୁ ମିଳିଛି ମନ୍ଦିର । ଇସଲାମିକ ଦେଶ ୟୁନାଇଟେଡ୍ ଆରବ ଏମିରେଟ୍ସ ବା ୟୁଏଇରେ ଖୋଲିଲା ବହୁ ପ୍ରତୀକ୍ଷିତ ହିନ୍ଦୁ ମନ୍ଦିର । ପବିତ୍ର ବିଜୟାଦଶମୀ ଅବସରରେ ଏହି ନୂଆ ହିନ୍ଦୁ ମନ୍ଦିରର ଶୁଭାରମ୍ଭ ହୋଇଛି । ୟୁଏଇରେ ବିଭିନ୍ନ ଧର୍ମର ଲୋକଙ୍କୁ ଏକାଠି କରିବା ସହ ସହନଶୀଳତା, ଶାନ୍ତି ଓ ସୌହାର୍ଦ୍ଦ୍ୟର ଏହା ଏକ ଶକ୍ତିଶାଳୀ ପ୍ରତୀକ ବୋଲି କୁହାଯାଉଛି । ଏମିରେଟସର ଜେବଲ ଅଲ୍ଲୀ କରିଡରରେ ଥିବା ଏହି ମନ୍ଦିରକୁ ଅକ୍ଟୋବର ୪ ତାରିଖରେ ଭକ୍ତଙ୍କ ବିଧିବଦ୍ଧ ଭାବେ ଖୋଲାଯାଇଛି । ଏଥିରେ ୭ଟି ଚର୍ଚ୍ଚ, ଗୋଟିଏ ମନ୍ଦିର ଓ ଗୋଟିଏ ଗୁରୁଦ୍ୱାର ସମେତ ମୋଟ ୯ଟି ଧାର୍ମିକପୀଠ ରହିଛି ।
Kanak News is now on WhatsApp
Join and get latest news updates delivered to you via WhatsApp
ଦୁବାଇରେ ଏହି ହିନ୍ଦୁ ମନ୍ଦିରର ନିର୍ମାଣ କେତେ ଦ୍ରୁତ ଗତିରେ ହୋଇଛି, ୫୦ ସେକେଣ୍ଡର ଭିଡିଓରେ ସ୍ପଷ୍ଟ ଦେଖିବାକୁ ମିଳୁଛି । ମାତ୍ର ତିନି ବର୍ଷ ଭିତରେ ନିର୍ମିତ ହୋଇଛି ଏହି ମନ୍ଦିର । ମନ୍ଦିର ନିର୍ମିତ ହେଲା ପରେ ଯେଉଁଭଳି ଦୃଶ୍ୟ ଦେଖିବାକୁ ମିଳିଛି, ତାହା କୌଣସି ସ୍ୱପ୍ନ ପୂରଣ ହେବା ଠାରୁ କମ୍ ନୁହେଁ । ମନ୍ଦିର ଭିତରେ ୧୦୫ଟି ଘଣ୍ଟି ଭକ୍ତଙ୍କ ପାଇଁ ରଖାଯାଇଛି । ଦକ୍ଷିଣ ଭାରତୀୟ ଦେବାଦେବୀ କଳାପଥରରେ ନିର୍ମିତ ହୋଇଛନ୍ତି । ମନ୍ଦିର ଭିତରେ ଭଗବାନ ଶିବଙ୍କ ମୂର୍ତ୍ତି ଦୃଷ୍ଟି ଆକର୍ଷଣ କରୁଛି । ଏହାବ୍ୟତୀତ ଅନ୍ୟ ୧୫ ଭଗବାନ ମଧ୍ୟ ବିରାଜମାନ କରିଛନ୍ତି । ଭଗବାନ ଗଣେଶ, ଶ୍ରୀକୃଷ୍ଣ, ମହାଲକ୍ଷ୍ମୀ ଓ ଦକ୍ଷିଣ ଭାରତୀୟ ଦେବତା ଗୁରୁ ଆୱରପ୍ପନ ଏବଂ ଆୟପ୍ପନଙ୍କ ସ୍ଥାପନା ହୋଇଛି । ମନ୍ଦିର ପ୍ରାଙ୍ଗଣର ପିଲାରରେ ଥିବା ଗଛ, ଫୁଲ, ହାତୀ ଓ ଘଣ୍ଟିକୁ ରାଜସ୍ଥାନର କାରିଗରମାନେ ପ୍ରସ୍ତୁତ କରିଛନ୍ତି ।
ମନ୍ଦିର ଭିତରକୁ ପ୍ରବେଶ ପାଇଁ ରେଜିଷ୍ଟ୍ରେସନ କରିବାକୁ ପଡ଼ିବ । ଭକ୍ତମାନେ ଅନଲାଇନ୍ ଜରିଆରେ ଆବେଦନ କରିପାରିବେ । ସେପ୍ଟେମ୍ବରରେ ପାଖାପାଖି ୨ଲକ୍ଷ ଲୋକେ ରେଜିଷ୍ଟ୍ରେସନ୍ କରିଥିଲେ । ଚଳିତ ବର୍ଷ ଶେଷ ସୁଦ୍ଧା ଏଠାରେ ଏକ ବିଶାଳ କମ୍ୟୁନିଟି ହଲ୍ ନିର୍ମାଣ କରାଯିବ । ଯାହାଦ୍ୱାରା ହିନ୍ଦୁ ବିବାହ, ନାମକରଣ ଓ ଯଜ୍ଞ ଆଦି କରାଯାଇପାରିବ । ମନ୍ଦିର ପାଖରେ ଏକ ବଡ଼ ରୋଷଶାଳା ରହିଛି, ଯେଉଁଠାରେ ଖାଦ୍ୟପାନୀୟ ଆଦି ବ୍ୟବସ୍ଥା ରହିଛି । ସେପଟେ ଆବୁଧାବିରେ ୮୮୮ କୋଟି ଟଙ୍କା ବ୍ୟୟରେ ଦ୍ୱିତୀୟ ଭବ୍ୟ ହିନ୍ଦୁ ମନ୍ଦିରର ଆରମ୍ଭ ହୋଇସାରିଛି । ୨୦୧୫ରେ ପ୍ରଧାନମନ୍ତ୍ରୀ ମୋଦୀ ଯେତେବେଳେ ୟୁଏଇ ଗସ୍ତ କରିଥିଲେ, ସେତେବେଳେ ହଜାର ବର୍ଷ ଧରି ତିଷ୍ଠିବାକୁ ଥିବା ଏହି ମନ୍ଦିର ନିର୍ମାଣର ଘୋଷଣା କରିଥିଲା ୟୁଏଇ ସରକାର ।