ପାକିସ୍ତାନ ସାମ୍ନାରେ ୩୩୭ ରନର ବିଶାଳ ବିଜୟ ଲକ୍ଷ୍ୟ ରଖିଲା ବିରାଟ ବାହିନୀ । ମାଞ୍ଚେଷ୍ଟର ମୈଦାନରେ ଚମକିଲେ ହିଟମ୍ୟାନ୍
କନକ ବ୍ୟୁରୋ : ପାକିସ୍ତାନ ବିପକ୍ଷରେ ବିରାଟ ବାହିନୀର ଦମଦାର ପ୍ରଦର୍ଶନ । ରୋହିତଙ୍କ ଶତକ, ବିରାଟ ଓ ରାହୁଲଙ୍କ ଅର୍ଦ୍ଧଶତକ ବଳରେ ପାକିସ୍ତାନ ସାମ୍ନାରେ ୩୩୭ ରନର ବିଶାଳ ବିଜୟ ଲକ୍ଷ୍ୟ ରଖିଲା ଟିମ୍ ଇଣ୍ଡିଆ । ଭାରତର ପ୍ରାରମ୍ଭିକ ଯୋଡି ଦମଦାର ଆରମ୍ଭ କରିଥିବା ବେଳେ ପାକିସ୍ତାନ ବୋଲରଙ୍କୁ ନିର୍ଧୁମ ପିଟିଥିଲେ । ଓପନିଂ ପାର୍ଟନରସିପରେ ୧୩୬ ରନ ହାସଲ କରିଥିଲା ବିରାଟ ବ୍ରିଗେଡ ।
Kanak News is now on WhatsApp
Join and get latest news updates delivered to you via WhatsApp
ତେବେ ମଧ୍ୟକ୍ରମରେ ବ୍ୟାଟିଂ ବିପର୍ଯ୍ୟୟ ଫଳରେ ଟିମ ଇଣ୍ଡିଆ ୩୦୦ ରନ କରିଥିଲେ ମଧ୍ୟ ବଡ ସ୍କୋର କରିବାରେ ବିଫଳ ହୋଇଥିଲା । ମ୍ୟାଚ୍ ଶେଷ ଆଡକୁ ବର୍ଷା ହେବା କାରଣରୁ କିଛି ସମୟ ପାଇଁ ଖେଳରେ ବାଧା ସୃଷ୍ଟି ହୋଇଥିଲା । ତେବେ ବର୍ଷା ଛାଡିବା ପରେ ଖେଳ ଆରମ୍ଭ ହୋଇଥିଲା । ଆଉ ପୂର୍ବ ସ୍କୋରରେ ମାତ୍ର ୩୧ ରନ ଯୋଡିବା ସହ ୫ ୱିକେଟ ବିନିମୟରେ ୩୩୬ ରନ କରିବାକୁ ସକ୍ଷମ ହୋଇଥିଲା ଭାରତ ।
ଏହାପୂର୍ବରୁ ପାକିସ୍ତାନ ଟସ୍ ଜିତି ପ୍ରଥମେ ବୋଲିଂ ନିଷ୍ପତି ନେଇଥିଲା । ତେବେ ଭାରତୀୟ ଓପନିଂ ଯୋଡି ଆଗରେ ମୁଣ୍ଡ ନୁଆଇଁଥିଲେ ପାକ୍ ବୋଲର । ୨୩ ଓଭର ପର୍ଯ୍ୟନ୍ତ ୱିକେଟ ହାସଲ କରିପାରିନଥିଲେ ପାକ୍ ବୋଲର । ତେବେ ଏହାପରେ ପାକିସ୍ତାନ ବୋଲର ମାପଚୁପ ବୋଲିଂ କରିବା ସହ ଭାରତ ଉପରେ ଚାପ ସୃଷ୍ଟି କରିବାରେ ସକ୍ଷମ ହୋଇଥିଲେ । ପାକିସ୍ତାନ ପକ୍ଷରୁ ମହମ୍ମଦ ଅମୀର ୧୦ ଓଭରରେ ୪୭ ରନ୍ ଦେବା ସହ ୩ ୱିକେଟ ହାତେଇଥିବା ବେଳେ ୱାହବ ରିଆଜ ଓ ଇମାଦ ୱାସିମ ଗୋଟିଏ ଲେଖାଏଁ ୱିକେଟ ହାସଲ କରିଛନ୍ତି ।