ଭାରତ ବିରୋଧରେ ଚୀନର ବଡ଼ ଚାଲ : ପେଙ୍ଗଙ୍ଗ ହ୍ରଦ ପାଖାପାଖି ତିଆରି କରୁଛି ବୃହତ ପୋଲ; ଉପଗ୍ରହ ଚିତ୍ରରୁ ଆସିଲା ତଥ୍ୟ
କନକ ବ୍ୟୁରୋ : ଭାରତ ଏବଂ ଚୀନ ମଧ୍ୟରେ ଲାଗି ରହିଥିବା ସୀମା ବିବାଦର ସମାଧାନ ହୋଇପାରି ନାହିଁ । ବିଶେଷ କରି ଲଦାଖ ଅଞ୍ଚଳରେ ସୀମା ସମସ୍ୟାର ସମାଧାନ ପାଇଁ ଉଭୟ ପକ୍ଷ ମଧ୍ୟରେ ବାରମ୍ବାର ସେନାସ୍ତରୀୟ ଆଲୋଚନା ହୋଇଥିଲେ ମଧ୍ୟ କୌଣସି ସୁଫଳ ମିଳିପାରିନାହିଁ । ଏଭଳି ସ୍ଥିତିରେ ଚୀନ ସୀମାକୁ ଲାଗି ବିଭିନ୍ନ ପ୍ରକଳ୍ପ ନିର୍ମାଣ କରିବା ସହିତ ଭିତ୍ତିଭୂମି ବିସ୍ତାର କରିବାରେ ଲାଗିଛି । ଏଭଳି ବିଷୟକୁ ନେଇ ସୀମା ପ୍ରସଙ୍ଗରେ ବାସ୍ତବରେ ଯେ ଚୀନ ସମାଧାନ ଚାହୁଁଛି ତାହା ସନ୍ଦେହ ସୃଷ୍ଟି କରିଛି ।
Kanak News is now on WhatsApp
Join and get latest news updates delivered to you via WhatsApp
ଉପଗ୍ରହ ଚିତ୍ରରୁ ମିଳିଥିବା ଅନୁଯାୟୀ, ଚୀନ ଲଦାଖର ପେଙ୍ଗଙ୍ଗ ହ୍ରଦ ନିକଟରେ ଏକ ଦ୍ୱିତୀୟ ବୃହତ ପୋଲ ନିର୍ମାଣ କରୁଛି । ଲଦାଖ ଏବଂ ତିବ୍ବତ ମଧ୍ୟରେ ପ୍ରାୟ ୧୩୫ କିମି ଦୀର୍ଘ ଏହି ହ୍ରଦ ରହିଥିବା ବେଳେ ଚୀନ ନିଜ ପଟରେ ଏହି ପୋଲ ନିର୍ମାଣ କରୁଛି । ଏହାଦ୍ୱାରା ଲଦାଖର ଖୁରନାଖ ଦୁର୍ଗ ଏବଂ ତିବ୍ୱତର ରୂପରେଖ ରୁଦୋଖ ମଧ୍ୟ ଦୂରତା ୪୦ରୁ ୫୦ କିମି ହ୍ରାସ ପାଇବ । ପୂର୍ବରୁ ଚୀନ ଏହି ଅଞ୍ଚଳରେ ଚୀନ ଏକ ପୋଲ ନିର୍ମାଣ କରିଥିବା ବେଳେ ଏହାକୁ ନେଇ ଭାରତ ପକ୍ଷରୁ ଉଦବେଗ ପ୍ରକାଶ କରାଯାଇଥିଲା ।
ହେଲେ ବାସ୍ତବରେ ଏହି ଦ୍ୱିତୀୟ ପୋଲ ହିଁ ଭାରତ ପାଇଁ ଅଧିକ ଉଦବେଗଜନକ ବୋଲି କୁହାଯାଉଛି । କାରଣ ଦ୍ୱିତୀୟ ପୋଲର ନିର୍ମାଣ ପାଇଁ ପ୍ରଥମ ପୋଲକୁ ଚାଇନା ସେନା ଉପଯୋଗ କରୁଛି । ପ୍ରଥମ ପୋଲ ତୁଳନାରେ ଦ୍ୱିତୀୟ ପୋଲ ଅଧିକ ମଜବୁତ ହୋଇଥିବାରୁ ଏହା ମାଧ୍ୟମରେ ଚୀନ ଟ୍ୟାଙ୍କ ସମେତ ଅନ୍ୟାନ୍ୟ ଯୁଦ୍ଧାସ୍ତ୍ର ପରିବହନ କରିବାକୁ ଲକ୍ଷ୍ୟ ରଖିଛି । ଯାହାକି ଭାରତ ପାଇଁ ଚିନ୍ତାର କାରଣ ହୋଇପାରେ ବୋଲି କୁହାଯାଉଛି ।