ବିଜୟ ସହ ବିଶ୍ୱକପ ଅଭିଯାନ ଆରମ୍ଭ କଲା ବିରାଟ ବାହିନୀ । ଅପରାଜିତ ଶତକ ସହ ଦଳ ପାଇଁ ସଙ୍କଟମୋଚକ ସାଜିଲେ ହିଟମ୍ୟାନ୍ ରୋହିତ ଶର୍ମା ।
କନକ ବ୍ୟୁରୋ : ବିଜୟ ସହ ବିଶ୍ୱକପ ଅଭିଯାନ ଆରମ୍ଭ କଲା ବିରାଟ ବାହିନୀ । ସାଉଥହମ୍ପଟନରେ ବିଜୟର ଶୁଭାରମ୍ଭ କଲା ଟିମ୍ ଇଣ୍ଡିଆ । ଦକ୍ଷିଣ ଆଫ୍ରିକା ବିପକ୍ଷରେ ବିଶ୍ୱକପର ପ୍ରଥମ ମ୍ୟାଚରେ ବଡ ବିଜୟ ହାସଲ କରିଛି ମେନ୍ ଇନ୍ ବ୍ଲୁ । ରୋହିତଙ୍କ ଅପରାଜିତ ଶତକ ବଳରେ ବିଶ୍ୱକପର ପ୍ରଥମ ମ୍ୟାଚକୁ ୬ ୱିକେଟରେ ବାଜି ମାରିଛି ଟିମ୍ ଇଣ୍ଡିଆ ।
Kanak News is now on WhatsApp
Join and get latest news updates delivered to you via WhatsApp
୨୨୮ ରନର ପିଛା କରୁଥିବା ଟିମ୍ ଇଣ୍ଡିଆ ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହେବା ପରେ ଦଳ ପାଇଁ ସଙ୍କଟମୋଚକ ସାଜିଥିଲେ ରୋହିତ । ଦକ୍ଷିଣ ଆଫ୍ରିକା ବୋଲରଙ୍କୁ ଧୈର୍ଯ୍ୟର ସହ ମୁକାବିଲା କରି ଦିନିକିଆରେ ନିଜର ୨୩ ତମ ଶତକ ହାସଲ କରିଥିଲେ ରୋହିତ । ଆଉ ଏହାସହ ଭାରତକୁ ଦେଇଥିଲେ ବିଶ୍ୱକପର ପ୍ରଥମ ବିଜୟ ଭେଟି ।
ଏହାପୂର୍ବରୁ ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତି ନେଇଥିଲା ଦକ୍ଷିଣ ଆଫ୍ରିକା । ତେବେ ଭାରତୀୟ ବୋଲରଙ୍କ ଶାଣିତ ବୋଲିଂ ଆଗରେ ସମ୍ପୂର୍ଣ୍ଣ ମୁଣ୍ଡ ନୁଆଁଇଥିଲା ଦକ୍ଷିଣ ଆଫ୍ରିକା । ଖାସକରି ଚହଲଙ୍କ ଚମକରେ ଚକମା ଖାଇଥିଲା ଦକ୍ଷିଣ ଆଫ୍ରିକା । ମୋଟ ୪ ୱିକେଟ ସହ ଦକ୍ଷିଣ ଆଫ୍ରିକାର ବ୍ୟାଟିଂ ମେରୁଦଣ୍ଡକୁ ଭାଙ୍ଗିଥିଲେ ଚହଲ । ସେହିଭଳି ବୁମରା ଓ ଭୁବନେଶ୍ୱର ୨ଟି ଲେଖାଏଁ ୱିକେଟ ନେଇ ଦକ୍ଷିଣ ଆଫ୍ରିକାକୁ ବ୍ୟାକଫୁଟକୁ ଠେଲି ଦେଇଥିଲେ । ତେବେ ଶେଷ ଆଡକୁ ରବଡା ଓ ମୋରିସଙ୍କ ଲଢୁଆ ଇନିଂସ ଯୋଗୁଁ ଦକ୍ଷିଣ ଆଫ୍ରିକା ସମ୍ମାନଜନକ ୨୨୭ ରନ କରିବାକୁ ସକ୍ଷମ ହୋଇଥିଲା ।