ଭାରତ-ଅଷ୍ଟ୍ରେଲିଆ ବର୍ଡର ଗାଭାସ୍କର ଟ୍ରଫି : ଗିଲଙ୍କ ଶତକ ବଳରେ ଲଢିଲା ଟିମ୍ ଇଣ୍ଡିଆ; ଚତୁର୍ଥ ଦିନରେ ଦଳର ପ୍ରଦର୍ଶନ ଉପରେ ନଜର
କନକ ବ୍ୟୁରୋ : ଭାରତ-ଅଷ୍ଟ୍ରେଲିଆ ବର୍ଡର ଗାଭାସ୍କର ଟ୍ରଫି । ଗିଲଙ୍କ ଶତକ ବଳରେ ଲଢିଲା ଟିମ୍ ଇଣ୍ଡିଆ । ଅଷ୍ଟ୍ରେଲିଆର ପ୍ରଥମ ପାଳି ୪୮୦ ରନ୍ ଜବାବରେ ତୃତୀୟ ଦିନ ସୁଦ୍ଧା ରୋହିତ ଶର୍ମାଙ୍କ ଦଳ ୩ ୱିକେଟ୍ ବିନିମୟରେ ୨୮୯ ରନ୍ ସଂଗ୍ରହ କରିଛି । ତଥାପି ଭାରତ ଏବେ ୧୯୧ ରନ୍ ପଛରେ ଥିବାରୁ ବିପଦମୁକ୍ତ ହୋଇନାହିଁ ।
Kanak News is now on WhatsApp
Join and get latest news updates delivered to you via WhatsApp
ଆଇସିସି ବିଶ୍ବ ଟେଷ୍ଟ୍ ଚାମ୍ପିଅନସିପ୍ ଫାଇନାଲ୍ ପ୍ରବେଶ ଲାଗି ସିଧାସଳଖ ଯୋଗ୍ୟତା ଅର୍ଜନ କରିବା ପାଇଁ ଭାରତକୁ ଏହି ଟେଷ୍ଟ୍ ଜିତିବା ଜରୁରୀ ରହିଛି । ନ ହେଲେ ବି ଭାରତ ମ୍ୟାଚ୍ ଡ୍ର’ ରଖିବା ସହ ଶ୍ରୀଲଙ୍କା-ନ୍ୟୁଜିଲାଣ୍ଡ୍ ଟେଷ୍ଟ୍ ଶୃଙ୍ଖଳା ଫଳାଫଳକୁ ଅପେକ୍ଷା କରିବ । ଭାରତ ହାରିଗଲେ ବି ଶ୍ରୀଲଙ୍କା ଉଭୟ ଟେଷ୍ଟରେ ହାରିଲେ ହିଁ ଭାରତ ପାଇଁ ସୁଯୋଗ ରହିବ । ଚତୁର୍ଥ ଦିନରେ ଦଳର ପ୍ରଦର୍ଶନ ଉପରେ ନଜର ରହିଛି ।
ସେପଟେ, ନିଜ ନିଜ ପାଳି ଅବସରରେ ଭାରତୀୟ ଦଳ ଅଧିନାୟକ ରୋହିତ ଶର୍ମା ଏବଂ ପୂର୍ବତନ ଅଧିନାୟକ ବିରାଟ କୋହଲି ଦୁଇଟି ବ୍ୟକ୍ତିଗତ ମାଇଲଖୁଣ୍ଟ ଅତିକ୍ରମ କରିଛନ୍ତି । ରୋହିତ ଷଷ୍ଠ ଭାରତୀୟ ଭାବେ ଅନ୍ତର୍ଜାତୀୟ କ୍ରିକେଟ୍ରେ ୧୭,୦୦୦ ରନ୍ ପୂର୍ଣ୍ଣ କରିଥିଲେ। ୩୫ ରନ୍ କରିଥିବା ରୋହିତ ବ୍ୟକ୍ତିଗତ ଭାବେ ୨୧ ରନ୍ ବେଳେ ଏହି ମାଇଲଖୁଣ୍ଟ ସ୍ପର୍ଶ କରିଥିଲେ । ରୋହିତଙ୍କ ପୂର୍ବରୁ ଏହି କ୍ଲବ୍ରେ କେବଳ ସଚିନ ତେନ୍ଦୁଲକର, ବିରାଟ କୋହଲି, ରାହୁଲ ଦ୍ରାବିଡ଼, ସୌରଭ ଗାଙ୍ଗୁଲି, ମହେନ୍ଦ୍ର ସିଂହ ଧୋନି ସାମିଲ ଅଛନ୍ତି ।
୨୦୦୭ରେ ଆୟରଲାଣ୍ଡ ବିପକ୍ଷରେ ଦିନିକିଆ ମ୍ୟାଚ୍ ଖେଳି ଅନ୍ତର୍ଜାତୀୟ କ୍ରିକେଟ୍କୁ ଆସିଥିବା ରୋହିତ ଏପର୍ଯ୍ୟନ୍ତ ୨୪୧ ଦିନିକିଆରୁ ୯୭୮୨ ରନ୍ ଏବଂ ୧୪୮ ଟ୍ବେଣ୍ଟି-୨୦ ଅନ୍ତର୍ଜାତୀୟରୁ ୩୮୫୩ ରନ୍ ସଂଗ୍ରହ କରିଛନ୍ତି । ୪୯ତମ ଟେଷ୍ଟ୍ ଖେଳୁଥିବା ରୋହିତ ପ୍ରଥମ ପାଳି ସୁଦ୍ଧା ମୋଟ ୩୩୭୯ ରନ୍ ସଂଗ୍ରହ କରିଛନ୍ତି। ଦିନିକିଆ କ୍ରିକେଟ୍ରେ ଏକମାତ୍ର ଖେଳାଳି ଭାବେ ରୋହିତ ୩ଟି ଦ୍ବିଶତକ ହାସଲ କରିବାର ରେକର୍ଡ ମଧ୍ୟ ନିଜ ନାମରେ ରଖିଛନ୍ତି ।