ପାକ୍ ସରକାରଙ୍କ ବିରୁଦ୍ଧରେ ଇମ୍ରାନଙ୍କ ପଦଯାତ୍ରା: ନିର୍ବାଚନ ଘୋଷଣା ଦାବିରେ ପଦଯାତ୍ରା, ସମର୍ଥକଙ୍କ ଗହଣରେ ଶକ୍ତି ପ୍ରଦର୍ଶନ
କନକ ବ୍ୟୁରୋ: ପାକିସ୍ତାନରେ ରାଜନୈତିକ ସଙ୍କଟ ଥମିବାର ନାଁ ନେଉନି । ଏହାରି ଭିତରେ ବିଭିନ୍ନ ମାମଲାରେ ଛନ୍ଦି ହୋଇପଡିଥିବା ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନ ଓ ତାଙ୍କ ପିଟିଆଇ ପକ୍ଷରୁ ଆରମ୍ଭ ହୋଇଛି ପଦଯାତ୍ରା । ଶହ ଶହ ସମର୍ଥକଙ୍କ ଗହଣରେ ଶକ୍ତି ପ୍ରଦର୍ଶନ କରିଛନ୍ତି ଇମ୍ରାନ । ନିକଟରେ ନିର୍ବାଚନ ଆୟୋଗ ଇମ୍ରାନ ଖାନଙ୍କ ଉପରେ କଟକଣା ଲଗାଇଥିଲେ । ଏହା ସତ୍ୱେ ନିରନ୍ତର ନିର୍ବାଚନ ଦାବି ପାଇଁ ସେ ଜିଦ ଧରିଛନ୍ତି । ଏଥିପାଇଁ ପାକ୍ ସରକାରଙ୍କୁ ମଧ୍ୟବର୍ତୀକାଳୀନ ନିର୍ବାଚନ କରିବାକୁ ଅନୁରୋଧ କରିବା ସହ ଆରମ୍ଭ କରିଛନ୍ତି ପଦଯାତ୍ରା । ଶୁକ୍ରବାର ଆରମ୍ଭ ହୋଇଥିବା ଏହି ପଦଯାତ୍ରା ନଭେମ୍ବର ୪ ଯାଏଁ ଚାଲିବ । ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେବା ପରଠୁ ଇମ୍ରାନ ସାଧାରଣ ନିର୍ବାଚନ କରିବାକୁ ଦାବି କରି ଆସୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ହେଲେ ସରକାର ଏହାକୁ ଉଦ୍ଦେଶ୍ୟ ମୂଳକ ଭାବେ କରୁନାହାନ୍ତି, କାରଣ ସରକାରଙ୍କୁ ପରାଜୟକୁ ଭୟ ରହୁଥିବା ନେଇ କହିଛନ୍ତି ଇମ୍ରାନ । ଆଉ ଏଥିପାଇଁ ନିଜ ଶକ୍ତି ଦେଖାଇବା ସହ ସରକାରଙ୍କ ବିରୋଧୀ ପଦଯାତ୍ରା ଆରମ୍ଭ କରିଛନ୍ତିି । ଲାହୋରରୁ ଇସଲାମାବାଦ ଯାଏ ଏହି ପଦଯାତ୍ରା ଚାଲିବ । ଏହାର ପ୍ରଭାବ ସରକାରଙ୍କ ଉପରେ ପଡ଼ିବ ଏବଂ ତୁରନ୍ତ ଦେଶରେ ସାଧାରଣ ନିର୍ବାଚନ ଘୋଷଣା କରିବେ ବୋଲି ସେ ଆଶାବାଦୀ ଅଛନ୍ତି ।
ସେପଟେ ଇମ୍ରାନଙ୍କ ପଦଯାତ୍ରା ପାଇଁ ସମ୍ପୂର୍ଣ୍ଣ ପ୍ରସ୍ତୁତ ରହିଛି ଶାହାବାଜ ସରିଫ ସରକାର । ଏହାକୁ ଦୃଷ୍ଟିରେ ରଖି ଇସଲାମାବାଦରେ ୧୩ ହଜାର ସୁରକ୍ଷାକର୍ମୀ ନିୟୋଜିତ କରାଯାଇଛି । ବିଭିନ୍ନ ସ୍ଥାନରେ ଫାୟାର ବିଗ୍ରେଡ ଗାଡ଼ି ସହ ସୁରକ୍ଷା କର୍ମୀଙ୍କୁ ମୁତୟନ କରାଯାଇଛି ।
ପଦଯାତ୍ରା ପୂର୍ବରୁ ଇମ୍ରାନଙ୍କୁ ବିରୋଧର ସାମ୍ନା କରିବାକୁ ପଡିଛି । ଗୁରୁବାର ଇମ୍ରାନ ଲାହୋର ବାର୍ ଆସୋସିଏସନ ଗସ୍ତ ବେଳେ ତାଙ୍କ ବିରୋଧରେ ଘଂଟା ଚୋର ନାରାବାଜି ଦେଇଥିଲେ ଅନେକ ଆଇନଜୀବୀ । ବିରୋଧୀ ଦଳର ଓକିଲମାନେ ଏହି ସ୍ଲୋଗାନ୍ ଦେଇଥିଲେ । ସେପଟେ ପାକ୍ ସେନା ମୁଖ୍ୟ ମଧ୍ୟ ପିଟିଆଇ ନେତା ଇମ୍ରାନଙ୍କ ବିରୋଧରେ କଡ଼ା ମନ୍ତବ୍ୟ ରଖିଛନ୍ତି । ଏକ କାର୍ଯ୍ୟକ୍ରମରେ ଇମ୍ରାନଙ୍କୁ ଦେଶଦ୍ରୋହ ବୋଲି ସମ୍ବୋଧନ କରିଛନ୍ତି ସେନା ମୁଖ୍ୟ ଜେନେରାଲ କମର ଜାଭେଦ ବାଜୱା ।
ପିଟିଆଇର ଏହି ପଦଯାତ୍ରାର ଉଦ୍ଦେଶ୍ୟ କେବଳ ନିର୍ବାଚନ ଘୋଷଣା ନେଇ କରାଯାଉଛି । ଏଥିରେ କୌଣସି ପ୍ରକାର ହିଂସା ଘଟାଇବା ଉଦ୍ଦେଶ୍ୟ ନୁହେଁ ବୋଲି କହିଛନ୍ତି ଇ୍ରମାନ ଖାନ୍ । ପଦଯାତ୍ରାରେ କୌଣସି ନିୟମ ଉଲ୍ଲଂଘନ ହେବ ନାହିଁ କିମ୍ବା ହାଇ ସିକ୍ୟୁରିଟି ଥିବା ରେଡ୍ ଆଲର୍ଟ ଅଂଚଳରେ ପ୍ରବେଶ କରିବେ ନାହିଁ ବୋଲି ଇମ୍ରାନ୍ ସ୍ପଷ୍ଟୀକରଣ ରଖିଛନ୍ତି ।