୧୦ଟି ରାଜ୍ୟକୁ ସତର୍କ କଲେ ସରକାର । ୧୦%ରୁ ଅଧିକ ସଂକ୍ରମଣହାର ରହୁଥିବା ଜିଲ୍ଲା ଗୁଡିକରେ କଟକଣା କଡାକଡି କରିବାକୁ ନିର୍ଦ୍ଦେଶ ।
କନକ ବ୍ୟୁରୋ : ୧୦ଟି ରାଜ୍ୟରେ କରୋନା ସଂକ୍ରମଣ ଏବେ ବି ନିୟନ୍ତ୍ରଣକୁ ଆସିନାହିଁ । ଯାହାକୁ ନେଇ କେନ୍ଦ୍ର ସରକାର ରାଜ୍ୟ ଗୁଡିକୁ ସତର୍କବାଣୀ ଶୁଣାଇଛନ୍ତି । ୧୦ଟି ରାଜ୍ୟର ୪୬ଟି ଜିଲ୍ଲାରେ ଏବେ ବି କରୋନା ସଂକ୍ରମଣ ହାର ଅଧିକ ରହୁଛି । ଫଳରେ ରାଜ୍ୟଗୁଡିକୁ କଠୋର କୋଭିଡ କଟକଣା ପାଳନ କରିବାକୁ ପରାମର୍ଶ ଦେଇଛନ୍ତି କେନ୍ଦ୍ର ସରକାର ।
Kanak News is now on WhatsApp
Join and get latest news updates delivered to you via WhatsApp
ଯେଉଁ ୧୦ ରାଜ୍ୟକୁ କରୋନା ସଂକ୍ରମଣ ପାଇଁ ସତର୍କବାଣୀ ଶୁଣାଇଛନ୍ତି କେନ୍ଦ୍ର ସରକାର, ସେଥିରେ ଓଡ଼ିଶା ମଧ୍ୟ ରହିଛି । କେରଳ, ମହାରାଷ୍ଟ୍ର, କର୍ଣ୍ଣାଟକ, ତାମିଲନାଡୁ, ଓଡିଶା, ଆସାମ, ମିଜୋରାମ, ମେଘାଳୟ, ଆନ୍ଧ୍ରପ୍ରଦେଶ ଓ ମଣିପୁରକୁ କୋଭିଡ୍ କଟକଣା କଡ଼ାକଡ଼ି କରିବାକୁ କୁହାଯାଇଛି । କେନ୍ଦ୍ର ସରକାର କହିଛନ୍ତି, ୪୬ଟି ଜିଲ୍ଲାରେ ୧୦ ପ୍ରତିଶତ ଉପରେ ରହିଛି ସଂକ୍ରମଣ ହାର । ସଂକ୍ରମଣ ହାର ନିୟନ୍ତ୍ରଣକୁ ନଆସିଲେ ଏହା ଦେଶରେ ତୃତୀୟ ଲହର ଆଣିପାରେ ବୋଲି ଆଶଙ୍କା କରିଛି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ।
କିଛି ସପ୍ତାହ ହେବ ୪୬ ଟି ଜିଲ୍ଲାରେ ୧୦ ପ୍ରତିଶତ ଉପରେ ରହୁଛି ସଂକ୍ରମଣ ହାର ଏବଂ ଅନ୍ୟ ୫୩ଟି ଜିଲ୍ଲାରେ ୫ରୁ ୧୦ ପ୍ରତିଶତ ଭିତରେ ଟେଷ୍ଟ ପଜିଟିଭ୍ ରେଟ୍ ରହିଛି । କେନ୍ଦ୍ର ସ୍ୱାସ୍ଥ୍ୟ ସଚିବ ରାଜେଶ ଭୂଷଣଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ୪୬ଟି ରାଜ୍ୟରେ କରୋନା ସଂକ୍ରମଣ କାହିଁକି ଖସୁ ନାହିଁ, ଏନେଇ ଆଲୋଚନା କରାଯାଇଥିଲା । ଏହି ସବୁ ସ୍ଥାନରେ ୮୦ ପ୍ରତିଶତ ସକ୍ରିୟ ସଂକ୍ରମଣ ଘରୋଇ ସଂଗରୋଧରେ ରହୁଥିବାରୁ ସେମାନଙ୍କ ମନିଟର କରିବାକୁ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ପରାମର୍ଶ ଦେଇଛି ।
ସେହିପରି କରୋନାରେ ମୃତ୍ୟୁବରଣ କରିଥିବା ଲୋକଙ୍କ ମଧ୍ୟରୁ ୮୦ ପ୍ରତିଶତ ୪୫ ବର୍ଷରୁ ଉଦ୍ଧ୍ୱର୍ ବୟସ୍କ ରହିଥିବାରୁ ସେମାନଙ୍କ ଟିକାକରଣକୁ ତ୍ୱରାନ୍ୱିତ କରିବାକୁ କୁହାଯାଇଛି । ଦେଶରେ ଏବେବି କରୋନାର ଦ୍ୱିତୀୟ ଲହର ଶେଷ ହୋଇନାହିଁ । ଫଳରେ ଯେଉଁ ସବୁ ରାଜ୍ୟରେ ସଂକ୍ରମଣ ହାର ୧୦ ପ୍ରତିଶତ ଉପରେ ରହୁଛି, ସେମାନେ ସତର୍କ ନରହିଲେ ଦେଶରେ ତୃତୀୟ ଲହର ଆସିବାର ଆଶଙ୍କା ବୃଦ୍ଧି ପାଇବ ବୋଲି ଚିନ୍ତା ପ୍ରକଟ କରିଛନ୍ତି ସ୍ୱାସ୍ଥ୍ୟ ମନ୍ତ୍ରାଳୟ ।