କୁନି ବୟସରେ ସଂପର୍କର ସଂଜ୍ଞା ବୁଝାଇଦେଲା ବାଳକ …ମାଆର ସେବା ପାଇଁ ଭୁଲିଗଲା ଧୂଳିଖେଳ, ଛାଡିଦେଲା ପାଠପଢା…ରୋଷେଇ କରୁଛି, ନିଜ କଅଁଳ ହାତରେ ଦୃଷ୍ଟିହୀନା ମାଆକୁ ଖୁଆଇଦେଉଛି ଘେନୁ
ଚିକିତ୍ସା ପାଇଁ ଅର୍ଥ ସାଜିଛି ବାଧକ, ହୋଇପାରୁନି ଅସ୍ତ୍ରୋପଚାର
କନକ ବ୍ୟୁରୋ: ତୁ କେତେ ରାତି ମୋ ପାଇଁ ଅନିଦ୍ରା ହୋଇଥିବୁ ମାଆ.. ଏବେ ମୋ ପାଳି…୧୦ ବର୍ଷର କଅଁଳ ଶିଶୁଟିଏ ସିନା ହେଲେ ଏଇ ବୟସରେ ସେ ବୁଝିପାରିଛି ମାଆର ସେବାଠୁ ଏ ଦୁନିଆରେ ଆଉ ବଡ ସେବା କିଛି ନାହିଁ । ଖାସ୍ ଏଇଥିଲାଗି ସେ ଧୂଳି ଖେଳ ଛାଡି ସାଙ୍ଗସାଥିଙ୍କ ମେଳରେ ସ୍କୁଲ ନ ଯାଇ ନିଜ ପାଠପଢାରେ ଡୋରି ବାନ୍ଧିଦେଇଛି । ରୋଷେଇ କରୁଛି, ବାସନ ବି ମାଜୁଛି ଆଉ ନିଜ କଅଁଳ ହାତରେ ଅନ୍ଧୁଣୀ ମାଆକୁ ଖୁଆଇ ମଧ୍ୟ ଦେଉଛି । ପ୍ରତିମୁହୂର୍ତ୍ତରେ ମାଆର ପାଖେ ପାଖେ ରହି ତାର ସେବା କରି ଆସୁଛି ।
Kanak News is now on WhatsApp
Join and get latest news updates delivered to you via WhatsApp
କୋରାପୁଟ ଗୋଡିହଂଜର ପଂଚାୟତର ବନ୍ଧପଡା ଗାଁରେ ଘେନୁ ପଡାଲର ଘର । ଆଉ ଦୃଷ୍ଟିଶକ୍ତି ହରାଇଥିବା ଏହି ୪୫ ବର୍ଷୀୟ ମହିଳା ଜଣକ ହେଲେ ଘେନୁର ମାଆ ଡାଳିମ୍ବ ପଡାଲ । ପୂର୍ବରୁ ତାଙ୍କର ବେଶ୍ ହସ ଖୁସିର ଏକ ଛୋଟିଆ ସଂସାର ଥିଲା । ହେଲେ ତାଙ୍କର ଏହି ଖସ ଖୁସିର ସଂସାର ବେଶି ଦିନ ଚାଲିପାରିଲା ନାହିଁ । ଘେନୁକୁ ଯେତେବେଳେ ମାତ୍ର ୬ମାସ ହୋଇଥିଲା ସେହି ସମୟରେ ଅଣଜା ରୋଗରେ ଆକ୍ରାନ୍ତ ହୋଇ ଡାଳିମ୍ବଙ୍କର ସ୍ୱାମୀ ଆରପାରିକୁ ଚାଲିଗଲେ । ଆଉ ଏହାର କିଛି ଦିନ ପରେ ଉଚ୍ଚରକ୍ତ ଚାପରେ ଶିକାର ହୋଇ ଡାଳିମ୍ବ ମଧ୍ୟ ଭିନ୍ନକ୍ଷମ ପାଲଟିଗଲେ । ତେବେ ସାହି ପଡିଶାଙ୍କ ସହାୟତା କ୍ରମେ ସେ ଚିକିତ୍ସିତ ହେଲେ ଏବଂ ସୁସ୍ଥ ମଧ୍ୟ ହୋଇଗଲେ । ଆଉ କୁଲି ମଜୁରୀ କାମ କରି ପୁଅକୁ ପାଳି ଆସୁଥିଲେ ।
ହଠାତ୍ ୩ ବର୍ଷ ତଳେ ଡାଳିମ୍ବଙ୍କ ଆଖିକୁ କିଛି ଦିଶିଲା ନାହିଁ । ଡାକ୍ତରଙ୍କୁ ଦେଖାଇବା ପରେ ସେମାନେ କହିଲେ କି ଆଖି ନଷ୍ଟ ହୋଇଯାଇଛି ଏବଂ ଅସ୍ତ୍ରୋପଚାର କଲେ ହିଁ ଠିକ୍ ହୋଇପାରିବ ହେଲେ ଏଥିପାଇଁ ଟଙ୍କା ଦରକାର । ତେବେ ଚିକିତ୍ସା ପାଇଁ ପାଖରେ କୌଣସି ସମ୍ଭଳ ନଥିବାରୁ ଡାଳିମ୍ବ ଏବେ କେବଳ ଭାଗ୍ୟକୁ ଆଦରି ଘରେ ପଡିରହିଛନ୍ତି । ପାଖରେ କେହି ନଥିବାରୁ ଏକମାତ୍ର ଘେନୁ ହିଁ ଏବେ ଡାଳିମ୍ବଙ୍କ ଆଶାବାଡି ପାଲଟିଛି । ଆଉ ଅନ୍ଧୁଣୀ ମାଆର ସେବାରେ ନିଜକୁ ସମର୍ପି ଦେଇଛି । ଗାଧୋଇ ଦେବାଠାରୁ ଆରମ୍ଭ କରି ଖୁଆଇ ଦେବା ପର୍ଯ୍ୟନ୍ତ ଅନ୍ଧୁଣୀ ମାଆର ସବୁ କାମ ଅତି ଆଗ୍ରହର ସହ କରିଚାଲିଛି ଏହି କୁନି ବାଳକ ଜଣକ ।
ଅନ୍ୟପକ୍ଷରେ ଡାଳିମ୍ବଙ୍କୁ ମିଳୁଥିବା କେବଳ ବିଧବା ଭତ୍ତାରେ ଦୁଇ ପ୍ରାଣୀ ଚଳିବା ଅସମ୍ଭବ ହୋଇପଡିଛି । ଅନେକ ସମୟରେ ତ ଖାଇବାକୁ ନପାଇ କେବଳ ପାଣି ଗିଲାସେ ପିଇ ହିଁ ସେମାନଙ୍କୁ ନିଜ ଭୋକିଲା ପେଟକୁ ବୁଝାଇବାକୁ ପଡୁଛି । ତେବେ ବିଡମ୍ବନାର ବିଷୟ ଆଜି ପର୍ଯ୍ୟନ୍ତ ଏହି ଅସହାୟ ମାଆପୁଅଙ୍କ ଉପରେ ପ୍ରଶାସନର ନଜର ପଡିନି । ଯଦି ସରକାରଙ୍କ ତରଫରୁ କିଛି ସହାୟତା ମିଳିପାରନ୍ତା ତେବେ ହୁଏତ ଡାଳିମ୍ବ ପୁଣି ଥରେ ନୂଆ ଦୁନିଆ ଦେଖିପାରନ୍ତେ ଆଉ ଘେନୁ ପୁଣିଥରେ ସାଙ୍ଗସାଥିଙ୍କ ମେଳରେ ସ୍କୁଲ ଯାଇ ପାଠପଢି ନିଜ ଭବିଷ୍ୟତ ଗଢିପାରନ୍ତା ।