ପିଲାଙ୍କ ଭବିଷ୍ୟତ ଗଢିବେ ହୃଦାନନ୍ଦ । ନିଜ ଗାଁ ସ୍କୁଲକୁ ପୋଷ୍ୟ ସ୍କୁଲ ଭାବେ ଗ୍ରହଣ କଲେ ୨୨ ବର୍ଷୀୟ ଯୁବ ଇଂଜିନିୟର ।
କନକ ବ୍ୟୁରୋ: ବୟସ ୨୨ କିନ୍ତୁ ତାଙ୍କ କାମ ଅନ୍ୟମାନଙ୍କ ପାଇଁ ଆଦର୍ଶ ହୋଇଛି । ଯାଜପୁର ଟୋଲକାନୀର ଯୁବ ଇଂଜିନିଅର ହୃଦାନନ୍ଦ ପୃଷ୍ଟି ନିଜ ଗାଁ ସ୍କୁଲକୁ ପୋଷ୍ୟ ସ୍କୁଲ ଭାବେ ଗ୍ରହଣ କରିଛନ୍ତି । ଏହି ସ୍କୁଲରେ ପଢୁଥିବା ସମସ୍ତ ୩୫୧ ଜଣ ପିଲାଙ୍କ ଭବିଷ୍ୟତ ଗଢିବାରେ ବଡଭାଇ ଭାବେ ସେ ଦାୟିତ୍ୱ ନେଇ ବେଶ୍ ଖୁସିଥିବା କହିଛନ୍ତି ହୃଦାନନ୍ଦ । ଏପଟେ ତାଙ୍କର ଏଭଳି କାମକୁ ପ୍ରଶଂସା କରିଛନ୍ତି ରାଜ୍ୟ ସରକାରଙ୍କ ମୋ ସ୍କୁଲ ଅଭିଯାନର ଅଧ୍ୟକ୍ଷା ।
Kanak News is now on WhatsApp
Join and get latest news updates delivered to you via WhatsApp
ନିଜ ଜନ୍ମମାଟି ପାଇଁ, ନିଜ ଗାଁ ସ୍କୁଲ ପାଇଁ କିଛି କରିବାର ଇଚ୍ଛା, ବାଟ ଦେଖାଇଛି ମୋ ସ୍କୁଲ ଅଭିଯାନ । ମୁଖ୍ୟମନ୍ତ୍ରୀ ଦେଇଥିବା ଆହ୍ୱାନରେ ପ୍ରେରଣା ପାଇଁ ଆଗକୁ ଆସିଛନ୍ତି ଜଣେ ଯୁବ ଇଂଜିନିଅର । ଯାଜପୁର ଜିଲ୍ଲା ଟୋଲକାନୀର ଝାଡେଶ୍ୱରୀ ସରକାରୀ ଉଚ୍ଚ ବିଦ୍ୟାଳୟର ପୂରାତନ ଛାତ୍ର ହୃଦାନନ୍ଦ ପୃଷ୍ଟି । ଏବେ ଏହି ଯୁବ ଇଂଜିନିଅର ଜଣକ ନିଜେ ପଢିଥିବା ସ୍କୁଲକୁ ପୋଷ୍ୟ ସ୍କୁଲ ଭାବେ ଗ୍ରହଣ କରିଛନ୍ତି ।
ସ୍ଥାନୀୟ ପିଲାଙ୍କ ପାଖରେ ପ୍ରତିଭା ଅଛି, କିନ୍ତୁ ଏହାକୁ ବିକଶିତ କରିବାର ମାଧ୍ୟମ ଅଭାବ ରହିଛି । ଏହାକୁ ଦୃଷ୍ଟିରେ ରଖି ହୃଦାନନ୍ଦ ସ୍କୁଲରେ ସ୍ମାର୍ଟ କ୍ଲାସରୁମ୍, ସବୁଜ ସୁନ୍ଦର ପରିବେଶ, ଆମ ପାଠାଗାର ଓ ସୁପର ୩୦ ବ୍ୟାଚ ଭଳି ବିଭିନ୍ନ କାର୍ଯ୍ୟକ୍ରମ ଆରମ୍ଭ କରିଛନ୍ତି । ମାତ୍ର ୨୨ ବର୍ଷ ବୟସ୍କ ହୃଦାନନ୍ଦଙ୍କ ଏଭଳି କାର୍ଯ୍ୟକୁ ଟୁଇଟ କରି ପ୍ରଶଂସା କରିଛି ରାଜ୍ୟ ସରକାରଙ୍କ ମୋ ସ୍କୁଲ ଅଭିଯାନ । ସେ ଏବେ ପ୍ରଥମରୁ ଦଶମ ଶ୍ରେଣୀ ପର୍ଯ୍ୟନ୍ତ ପଢୁଥିବା ସମସ୍ତ ୩୫୧ ଜଣ ଛାତ୍ରଛାତ୍ରୀଙ୍କ ଦାୟିତ୍ୱ ନେବା ସହ ସେମାନଙ୍କର ଉନ୍ନତି ପାଇଁ କାମ କରିବାକୁ ଅଂଟା ଭିଡିଛନ୍ତି । ହୃଦାନନ୍ଦଙ୍କ ଏହି କାମକୁ ପ୍ରଶଂସା କରିଛି ମୋ ସ୍କୁଲ । ଏଥିପାଇଁ ତାଙ୍କୁ ଧନ୍ୟବାଦ ଦେବା ସହ, ତାଙ୍କର ଏଭଳି କାମ ଅନ୍ୟମାନଙ୍କ ପାଇଁ ଉଦାହରଣର ସୃଷ୍ଟି କରିବ ବୋଲି କହିଛନ୍ତି ମୋ ସ୍କୁଲ ଅଧ୍ୟକ୍ଷା । ଗଣମାଧ୍ୟମରେ ଅଭାବ ଅସୁବିଧାରେ ଥିବା ଖବର ପ୍ରସାରଣ ହେଲେ ସବୁ ବେଳେ ଆଗକୁ ବାହାରି ଆସନ୍ତି ଏହି ଯୁବ ଇଂଜିନିଅର ହୃଦାନନ୍ଦ ।