କନକ ବ୍ୟୁରୋ: ଟ୍ରେନରେ ଯିବା ଆସିବା କରୁଥିବା ଯାତ୍ରୀଙ୍କ ପାଇଁ ଆସିଛି ଖୁସି ଖବର । ଏଣିକି ଟିକେଟ୍ କାଟିନଥିଲେ ବି ଟ୍ରେନରେ ଯାତ୍ରା କରିପାରିବେ ସାଧାରଣ ଲୋକ । ଯଦି ଆପଣ ଟ୍ରେନରେ ଯିବା ପାଇଁ ସିଟ୍ ରିଜର୍ଭ କରିନାହାଁନ୍ତି । ଆଉ ଟିକେଟ୍ କାଟି ନାହାଁନ୍ତି । ତେବେ ବିଲକୁଲ ବ୍ୟସ୍ତ ହୁଅନ୍ତୁ ନାହିଁ । ଆପଣ ଏବେ ବିନା କୌଣସି ଅସୁବିଧାରେ ଟ୍ରେନରେ ଯାତ୍ରା କରିପାରିବେ । ଏଥିପାଇଁ ଏବେ ନୂଆ ନିୟମ ଆଣିଛି ଇଣ୍ଡିଆନ ରେଲୱେ ।
Kanak News is now on WhatsApp
Join and get latest news updates delivered to you via WhatsApp
ଆପଣଙ୍କ ପାଖରେ ରିଜର୍ଭେସନ ଟିକେଟ୍ ନଥିଲେ ବି କେବଳ ପ୍ଲାଟଫର୍ମ ଟିକେଟକୁ ନେଇ ଆପଣ ଟ୍ରେନ୍ ଯାତ୍ରା କରିପାରିବେ । ତେବେ ଟ୍ରେନ ଚଢିବା ପରେ ଆପଣଙ୍କୁ ତୁରନ୍ତ ଟିଟିଇଙ୍କ ସହିତ ସମ୍ପର୍କ କରିବାକୁ ପଡିବ । ଟିଟିଇଙ୍କ ସହ ସମ୍ପର୍କ କରିବା ପରେ ଆପଣ ତାଙ୍କୁ ନିଜର ଗନ୍ତବ୍ୟ ସ୍ଥଳ ବିଷୟରେ କହିବେ । ଏହାପରେ ଟିଟିଇ ଆପଣଙ୍କ ପାଇଁ ଟ୍ରେନ୍ ଟିକେଟ୍ କରିଦେବେ ।
ଅନେକ ସମୟରେ ଲୋକମାନେ ଟିକେଟ୍ କରିନପାରି, ଟ୍ରେନ ଯାତ୍ରାରେ ଅସୁବିଧା ଭୋଗିଥାନ୍ତି । ଏବେ କିନ୍ତୁ ଆଉ ସେପରି କିଛି ଅସୁବିଧା ଭୋଗିବାକୁ ପଡିବନି । ଆପଣ କେବଳ ପ୍ଲାଟଫର୍ମ ଟିକେଟ୍ ନେଇ ଟ୍ରେନରେ ଚଢିବା ପରେ , ଟିଟିଇଙ୍କ ସାହାଯ୍ୟରେ ଟିକେଟ୍ କରିପାରିବେ । ତା ସହିତ ଟ୍ରେନରେ ସିଟ୍ ଖାଲି ଥିଲେ, ଟିଟିଇ ଯାତ୍ରୀ ଜଣଙ୍କୁ ଗୋଟିଏ ସିଟ୍ ବି ଦେଇପାରିବେ । ଯଦି ବି ଟ୍ରେନରେ ସିଟ୍ ଖାଲିନଥିବ, ଏହାପରେ ମଧ୍ୟ ଆପଣ ସେହି ଟ୍ରେନରେ ଯାତ୍ରା କରିପାରିବେ । ଏହି ସୁବିଧା ପାଇଁ ଯାତ୍ରୀ ଜଣଙ୍କୁ କେବଳ ଟିକେଟ୍ ବାଦ୍ ୨୫୦ ଟଙ୍କା ପେନାଲଟି ଚାର୍ଜ ଦେବାକୁ ପଡିବ ।
କରୋନା ସମୟରେ ସଂକ୍ରମଣକୁ ଦେଖି ଦେଶରେ ଅନେକ ଟ୍ରେନ୍ ସେବା ବାତିଲ ହୋଇଯାଇଥିଲା । ଏବେ ଏହି ସେବା ସବୁ ପୁଣି ଆରମ୍ଭ ହୋଇଛି । ଯାତ୍ରୀମାନେ ପୂୂର୍ବଭଳି ପୁଣି ଟ୍ରେନରେ ଯିବା ଆସିବା ଆରମ୍ଭ କରିଥିବାବେଳେ, ସେମାନଙ୍କୁ ସେବା ଯୋଗାଉଛି ଇଣ୍ଡିଆନ୍ ରେଲୱେ । ଖାଲି ସେତିକି ନୁହେଁ, ଏବେ ପ୍ଲାଟଫର୍ମ ଟିକେଟ ଦାମ ବି କମାଇ ଦିଆଯାଇଛି । ମହାମାରୀ ସମୟରେ ଯେଉଁ ପ୍ଲାଟଫର୍ମ ଟିକେଟକୁ ୫୦ ଟଙ୍କାକୁ ବଢାଇ ଦିଆଯାଇଥିଲା । ଏବେ ତାକୁ ପୁଣି କମାଇ ଦିଆଯାଇଛି । ପୂର୍ବଭଳି ଏବେ ଯାତ୍ରୀମାନେ କେବଳ ୧୦ ଟଙ୍କା ଦେଇ ପ୍ଲାଟଫର୍ମ ଟିକେଟ୍ କିଣିପାରିବେ ବୋଲି ରେଳ ବିଭାଗ ଘୋଷଣା କରିଛି । ସେହିଭଳି ମହାମାରୀ ସମୟରେ ଟ୍ରେନରେ ରନ୍ଧା ଖାଦ୍ୟ ବନ୍ଦ ଥିବାବେଳେ ଏବେ ଏହାକୁ ପୁଣି ଆରମ୍ଭ କରାଯାଇଛି । ଯାତ୍ରୀମାନେ ଏଣିକି ଟ୍ରେନରେ ରନ୍ଧାଖାଦ୍ୟ ପାଇପାରିବେ ।