କିଏ ଏହି ଅବୁ ବକର ଅଲ୍ ବାଗଦାଦି ? କେମିତି ବିଶ୍ୱକୁ ଏକ ଦଶନ୍ଧି ଧରି ଥରହର କରି ରଖିଥିଲା ଏହି ଦୁର୍ଦ୍ଦଶ ଆତଙ୍କବାଦୀ ?
କନକ ବ୍ୟୁରୋ : ଅବୁ ବକର ଅଲ୍ ବାଗଦାଦି । ଏହି ନାଁ ହିଁ ତାର ପରିଚୟ । ଏହି ନାଁ ଏତେ ପରିଚିତ ଯେ ତାକୁ ପରିଚୟ ଦେବା ପାଇଁ ଅନ୍ୟ କୌଣସି ଅବଧାରଣର ଆବଶ୍ୟକତା ନାହିଁ । ସାରା ବିଶ୍ୱକୁ ଆତଙ୍କବାଦର ଭୟାବହତା ସଂପର୍କରେ ପରିଚିତ କରିଥିଲା ଏହି ନାଁ । ସିରିଆ, ଇରାକ, ଇରାନ ସମେତ ଆମେରିକା, ୟୁରୋପୀୟ ମହାସଂଘକୁ ଆତଙ୍କିତ କରିଥିଲା ଅବୁ ବକର ଅଲ ବଗଦାଦି । ବିଶ୍ୱକୁ ଏକ ଦଶନ୍ଧି ଧରି ଥରହର କରି ରଖିଥିବା ଏହି ବଗଦାଦି, ବଗଦାଦି ସାଜିଲା କିପରି? ଏହା ହୁଏତ ସମସ୍ତଙ୍କୁ ଜଣାନଥିବ ।
Kanak News is now on WhatsApp
Join and get latest news updates delivered to you via WhatsApp
ସାରା ବିଶ୍ୱକୁ ଏକ ଇସଲାମ ସାମ୍ରାଜ୍ୟରେ ସାମିଲ କରିବାର ସ୍ୱପ୍ନ ଦେଖୁଥିବା ଆତଙ୍କବାଦୀ ସଂଗଠନ ଆଇଏସଆଇଏସର ମୁଖିଆ ଥିଲା ବାଗଦାଦି । ଆଉ ସେହି ସ୍ୱପ୍ନକୁ ପୁରଣ କରିବା ପାଇଁ ମସଜିଦର ମୌଲବୀରୁ ଆତଙ୍କବାଦୀ ପାଲଟିଯାଇଥିଲା ଅବୁବକର ଅଲ ବାଗଦାଦି ।
ସଦ୍ଦାମ ହୁସୈନଙ୍କ ପରେ ବଗଦାଦି । ଇରାକରେ ପଡିିଲା ଆଇଏସର ମୂଳଦୁଆ । ବାଗଦାଦି ନିହତ ପରେ ପୁଣି ଚର୍ଚ୍ଚାକୁ ଫେରିଛି ଆଇଏସଆଇଏସ । କଣ ଏହି ଆଇଏସଆଇଏସ ବା ଆଇଏସ । ଏହି ଆତଙ୍କବାଦୀ ସଂଗଠନ କେଉଁଠୁ ଆସିଲା ? କିଏ ଏହାକୁ ଆଣିଲା ? କାହିଁକି ଆଣିଲା? ଏସବୁ ପ୍ରଶ୍ନର ଉତ୍ତର ପାଇଁ ଆପଣଙ୍କୁ ସଦ୍ଦାମ ହୁସୈନଙ୍କ ଇରାକକୁ ମନେ ପକାଇବାକୁ ପଡିବ । ଏକ ଲମ୍ବା ଯୁଦ୍ଧ ପରେ ସଦ୍ଦାମଙ୍କ ପଞ୍ଝାରୁ ଇରାକକୁ ମୁକ୍ତ କରି ସ୍ୱଦେଶ ଫେରିଯାଇଥିଲେ ଆମେରିକୀୟ ସୈନ୍ୟ । ସେତେବେଳେ ଇରାକରେ ମୁଣ୍ଡ ଟେକିଥିଲା ଅବୁ ବକର ଅଲ୍ ବଗଦାଦି । ଏକ ମସଜିଦର ମୌଲବି ଥିବା ବଗଦାଦି ପ୍ରଥମେ ଅଲକାଏଦା ପାଇଁ କାମ କରୁଥିଲା । ଇରାକ ଓ ସିରିଆର ଅଲକାଏଦା ଗ୍ରୁପର ମୁଖିଆ ହେବା ପରେ ସଂଗଠନର ନାଁ ୨୦୧୩ ମସିହାରେ ବଦଳାଇ ରଖିଥିଲା ଇସଲାମିକ ଷ୍ଟେଟ୍ ଅଫ ଇରାକ୍ ଆଣ୍ଡ ସିରିଆ- ଆଇଏସଆଇଏସ ।
୨୦୧୩ ମସିହାରେ ଆଇଏସଆଇଏସ ଗଠନ ପରେ ଅବୁ ବକର ଅଲ ବଗଦାଦି ଆଉ ପଛକୁ ଫେରିନଥିଲା । ମାତ୍ର ଗୋଟିଏ ବର୍ଷ ଭିତରେ ଆଇଏସଆଇଏସର ଜିହାଦୀଙ୍କ ଜରିଆରେ ଇରାକ ଓ ସିରିଆର ବହୁ ବଡ ବଡ ସହରକୁ କବଜା କରି ନିଜକୁ ଖଲିଫା ଘୋଷଣା କରିଥିଲା ବଗଦାଦି ।
୨୦୧୩ ମସିହାରେ ଆଇଏସଆଇଏସ ଗଠନ ପରେ ଇରାକରେ ପ୍ରଭାବ ବିସ୍ତାର ଆରମ୍ଭ କରିଥିଲା ବଗଦାଦି । ସଦ୍ଦାମ ହୁସୈନଙ୍କ ସେନାର କମାଣ୍ଡର ଓ ସୈନ୍ୟଙ୍କୁ ନେଇ ଆଇଏସ ସେନା ଗଠନ କରାଯାଇଥିଲା । ଏଥିରେ ସାମିଲ ହେବା ପାଇଁ ଦେଶ ବିଦେଶରୁ ବହୁ ଯୁବକ ଇରାକ ଓ ସିରିଆ ଯାଇ ବଗଦାଦିର ଯୋଦ୍ଧା ସାଜିଥିଲେ । ୨୦୧୪ ମସିହାରେ ମାତ୍ର ଗୋଟିଏ ବର୍ଷ ଭିତରେ ସିରିଆର ରକ୍କା, ପାମୟେରା, ଦିୟର ହଜୌର, ହସାକ୍କା, ଏଲୋପ୍ପୋ, ହାମ୍ସ ଓ ୟାରମୁକ ଭଳି ସହରକୁ କବଜା କରିଥିଲା ଦୁର୍ଦ୍ଦଶ ଆଇଏସଆଇଏସ ।
ସେହିପରି ଇରାକର ମସଲନ ରମାଦି, ଅନବାର, ତିକରିତ, ମୌସୁଲ ଓ ଫାଲୁଜା ଭଳି ବଡ ସହରକୁ ନିଜ କବଜାକୁ ନେଇ ଇସଲାମିକ୍ ସାମ୍ରାଜ୍ୟ ଆରମ୍ଭ କରିଥିଲା ବଗଦାଦି । ଯେଉଁଠି କେବଳ ସରିଆ ଆଇନ ଚଳୁଥିଲା । ୨୦୧୪ ମସିହାରେ ମୋସୁଲର ଅଲନୁରି ମସଜିଦରେ ଭାଷଣ ଦେଇ ବଗଦାଦି ନିଜକୁ ଖଲିଫା ଘୋଷଣା କରିଥିଲା । ଏହା ଥିଲା ସାରା ଦୁନିଆ ଆଗରେ ବଗଦାଦିର ପ୍ରଥମ ଭାଷଣ ।
ସିରିଆରୁ ବାଗଦାଦି ଯୁଗର ଅନ୍ତ । ନିହତ ହେଲା ଦୁର୍ଦ୍ଦଶ ଆତଙ୍କବାଦୀ । ୨୦୧୪ ମସିହାର ଶେଷ ଓ ୨୦୧୫ ମସିହା ପରଠୁ ଆଇଏସଆଇଏସ ବିରୋଧୀ ଅଭିଯାନ ଆରମ୍ଭ କରିଥିଲେ ପାଶ୍ଚାତ୍ୟ ରାଷ୍ଟ୍ର । ଆମେରିକା, ରୁଷ ଭଳି ଶକ୍ତିଶାଳୀ ରାଷ୍ଟ୍ର ବଗଦାଦିର ନିପାତ ପାଇଁ ଇରାକ ଓ ସିରିଆକୁ ସେନା ପଠାଇଥିଲେ । ଦୀର୍ଘ ଦିନର ଯୁଦ୍ଧ ଭିତରେ ବଗଦାଦିର ମୃତ୍ୟୁ ଖବର ଅନେକ ଥର ଆସିଛି, ଆଉ କିଛି ଦିନ ପରେ ଭିଡିଓ ଜାରି କରି ସେ ଜୀବିତ ଥିବା ନେଇ ବିଶ୍ୱକୁ ପ୍ରମାଣ ଦେଉଥିଲା । ବାରମ୍ବାର ମୃତ୍ୟୁକୁ ମାତ ଦେଇ ଆସୁଥିବା ଏହି ମୃତ୍ୟୁର ସୌଦାଗର ଅକ୍ଟୋବର ୨୭ରେ ଆମେରିକା ସେନା ହାତରେ କୁକୁର ଭଳି ନିହତ ହୋଇଛି ।