କନକ ବ୍ୟୁରୋ: ଟି-୨୦ ବିଶ୍ୱକପରେ ଧମାଲ ମଚାଉଛନ୍ତି ଭାରତୀୟ କ୍ରିକେଟର ସୂର୍ଯ୍ୟକୁମାର ଯାଦବ । ସେ ମିଡିଲ ଅର୍ଡରରେ ଏବେ ଟିମ ଇଣ୍ଡିଆର ମେରୁଦଣ୍ଡ ପାଲଟିଛନ୍ତି । ସେ କେବଳ ଦ୍ରୁତ ରନ କରୁନାହାନ୍ତି ବରଂ ଆକର୍ଷଣୀୟ ସଟ୍ ଖେଳି ସମସ୍ତଙ୍କୁ ନିଜ ଦିୱାନା କରୁଛନ୍ତି । କେବଳ ଭାରତୀୟ ନୁହେଁ ପାକିସ୍ତାନୀଙ୍କ ଉପରେ ମଧ୍ୟ ସୂର୍ଯ୍ୟ ନିଜ ଯାଦୁ ଚଲାଇଛନ୍ତି । ସୂର୍ଯ୍ୟଙ୍କ ସଟର ଫ୍ୟାନ ହୋଇଛନ୍ତି ପୂର୍ବତନ ପାକିସ୍ତାନୀ କ୍ରିକେଟର ୱାସିମ ଆକ୍ରାମ ।
Kanak News is now on WhatsApp
Join and get latest news updates delivered to you via WhatsApp
ସୂର୍ଯ୍ୟଙ୍କ ପ୍ରଶଂସା କରି ଆକ୍ରାମ କହିଛନ୍ତି, ସୂର୍ଯ୍ୟ ଯେମିତି ଖେଳୁଛନ୍ତି ଲାଗୁଛି ସେ କୌଣସି ଅନ୍ୟ ଗ୍ରହରୁ ଆସିଛନ୍ତି । ସେ ଅନ୍ୟମାନଙ୍କଠାରୁ ପୂରା ଅଲଗା ଖେଳାଳି । ସେ କେବଳ ଜିମ୍ବାୱେ ନୁହେଁ ବରଂ ବିଶ୍ୱର ବଡ ବଡ ଟିମ ବିପକ୍ଷରେ ଆକ୍ରାଣାତ୍ମକ ଭାବେ ବ୍ୟାଟିଂ କରିଥାନ୍ତି । ସେହିପରି ୱାକାର ୟୁନିସ କହିଛନ୍ତି, ସୂର୍ଯ୍ୟଙ୍କ ବିପକ୍ଷରେ କୌଣସି ପ୍ଲାନ କରିବା ସମ୍ଭବ ନୁହେଁ । ବୋଲର କରିବ ତ କଣ କରିପାରିବ ।
ଟିମ ଇଣ୍ଡିଆର ସୁପର ୧୨ର ଶେଷ ମ୍ୟାଚ ଜିମ୍ବାୱେ ବିରୋଧରେ ଥିଲା । ଏହି ମ୍ୟାଚରେ ସୂର୍ଯ୍ୟ ଏକ ଧୂଆଁଧାର ଇଂନିସ ଖେଳିଥିଲେ । ଏଥିରେ ସେ ଏକ ଫୁଲ ଟସ ବଲକୁ ଫାଇନ ଲେଗ ଉପରେ ଛକା ମାରିଥିଲେ । ଏହି ଆକର୍ଷଣୀୟ ସଟକୁ ନେଇ ଏବେ ସେ ଚର୍ଚ୍ଚାରେ ରହିଛନ୍ତି । ଦେଶ ବିଦେଶ ଚାରିଆଡେ ତାଙ୍କ ସଟର ପ୍ରଶଂସା ହେଉଛି । କେବଳ ଜିମ୍ବାୱେ ନୁହେଁ ନେଦରଲାଣ୍ଡ, ଦକ୍ଷିଣ ଆଫ୍ରିକା ଓ ବାଂଲାଦେଶ ବିପକ୍ଷରେ ବି ସୂର୍ଯ୍ୟ ଚମତ୍କାର ଇଂନିସ ଖେଳିଥିଲେ । ଏହି ସଟ ପାଇଁ ତାଙ୍କୁ ଫ୍ୟାନମାନେ ମିଷ୍ଟର ୩୬୦ ବୋଲି କହୁଛନ୍ତି । ହେଲେ ସୂର୍ଯ୍ୟ ଏହାର ଜବାବ ରଖିଛନ୍ତି ଆଫ କହିଛନ୍ତି ଦୁନିଆରେ କେବଳ ଜଣେ ମିଷ୍ଟର ୩୬୦, ଆଉ ସେ ହେଉଛନ୍ତି ଡିଭିଲିୟର୍ସ ।
ଏହାସହ ୨୦୨୨ରେ ସୂର୍ଯ୍ୟ କୁମାର ଟି-୨୦ରେ ସବୁଠାରୁ ଅଧିକ ରନ କରିଥିବା ବ୍ୟାଟ୍ସମ୍ୟାନ ହୋଇଛନ୍ତି । ସେ ଚଳିତ ବର୍ଷ ଟି-୨୦ରେ ୧ ହଜାର ରନ ପୂରା କରିଛନ୍ତି । ଗୋଟିଏ ବର୍ଷରେ ୧ ହଜାର ରନ ପୂରା କରିଥିବା ସେ ପ୍ରଥମ ଭାରତୀୟ ମଧ୍ୟ ହୋଇଛନ୍ତି । ଗୋଟିଏ ପରେ ଗୋଟିଏ ଧୂଆଁଧାର ଇଂନିସ ଯୋଗୁଁ ସେ ଆଇସିସି ଟି-୨୦ ରାଙ୍କିଙ୍ଗରେ ଏକ ନମ୍ବର ସ୍ଥାନରେ ରହିଛନ୍ତି । କେବଳ ସେତିକିରେ ତାଙ୍କ ବ୍ୟାଟ ରୋକିନି ସେ ଚଳିତ ଟି-୨୦ ବିଶ୍ୱକପରେ ବିରାଟ କୋହଲିଙ୍କ ପରେ ଦ୍ୱିତୀୟ ସର୍ବାଧିକ ରନ କରିଛନ୍ତି ।
ସୂର୍ଯ୍ୟ କୁମାର ଯାଦବ ଏବେ ଭାରତୀୟ ଟିମ ପାଇଁ ସଙ୍କଟ ମୋଚକ ସାଜିଛନ୍ତି । ଯେତେବେଳେ ଟିମର ବିପର୍ଯ୍ୟୟ ଘଟିଥାଏ, ସେତେବେଳେ ମୈଦାନକୁ ଓହ୍ଲାଇଥାନ୍ତି ସୂର୍ଯ୍ୟ । ଆଉ ଧୂଆଁଧାର ବ୍ୟାଟିଂ କରି ଦଳକୁ ବିଜୟ ଦେଇଥାନ୍ତି । ଆଉ ଜିମ୍ବାୱେ ବିପକ୍ଷରେ ଆକର୍ଷଣୀୟ ସଟ ପାଇଁ ପାକିସ୍ତାନରେ ବି ସୂର୍ଯ ପ୍ରଶଂସିତ ହୋଇଛନ୍ତି ।