ନାଗାଲାଣ୍ଡବାସୀ ଦେଖାଇଲେ ଏକତାର ବଳ । ଖାଇରେ ଖସିପଡିଥିବା ଟ୍ରକକୁ ବାଉଁଶ ଓ ଦଉଡି ସାହାଯ୍ୟରେ ଟାଣି ଆଣିଲେ ।

244

କନକ ବ୍ୟୁରୋ : ଏକତା ହିଁ ବଳ । ଏହି କଥାକୁ ଆଉ ଥରେ ପ୍ରମାଣ କରିଛନ୍ତି ନାଗାଲାଣ୍ଡର ଲୋକେ । ପୂର୍ବୋତର ରାଜ୍ୟ ନାଗାଲାଣ୍ଡରେ ଏକ ଘାଟି ରାସ୍ତାରେ ଯାଉଥିବା ବେଳେ ଟ୍ରକଟି ଖାଇ ଭିତରକୁ ଖସି ପଡିଥିଲା । ଗାଁଲୋକେ ସାହସିକତାର ପରିଚୟ ଦେଇ ବିନା କୌଣସି ମେସିନର ସାହାଯ୍ୟ ନନେଇ ନିଜେ ଏକାଠି ହୋଇ ଏହାକୁ ଖାଇ ଭିତରୁ ଉପରକୁ ଟାଣି ଆଣିଛନ୍ତି । ବାଉଁଶ ଓ ଦଉଡି ସାହାଯ୍ୟରେ ଶତାଧିକ ଲୋକେ ଟ୍ରକଟିକୁ ଟାଣି ରାସ୍ତା ଉପରକୁ ନେଇ ଆସିଛନ୍ତି ।

ବିଜେପି ମୁଖପାତ୍ର ମୋହୁନଲ୍ୟୁମୋ କିକୋନ ଏହି ଘଟଣାର ଭିଡିଓଟିକୁ ଟ୍ୱିଟ କରିବା ପରେ ଏହା ଭାଇରାଲ ହେବାରେ ଲାଗିଛି । ଏହି ଭିଡିଓଟି ନାଗାଲାଣ୍ଡର କେଉଁ ସ୍ଥାନରେ ସେ ନେଇ ଅଧିକ ତଥ୍ୟ ମିଳିପାରିନାହିଁ । ତେବେ ମିଳିଥିବା ସୂଚନା ଅନୁସାରେ ଅଦା ଭର୍ତି ଏହି ଟ୍ରକ ଦୁର୍ଘଟଣାଗ୍ରସ୍ତ ହେବା ପରେ ଖାଇରେ ପଡିଯାଇଥିଲା । ଯେଉଁଥିରେ ଡ୍ରାଇଭର ଓ ହେଲପର ସାମାନ୍ୟ ଆହତ ହୋଇଥିଲେ । ଟ୍ରକଟି ଖାଇରେ ଫସିଯାଇଥିଲା ଏବଂ ଏହାକୁ କ୍ରେନର ସାହାଯ୍ୟ ନନେଇ ବାହାର କରିବା ଅସମ୍ଭବ ଥିଲା । ସେହି ଅଂଚଳରେ କୌଣସି କ୍ରେନ ନଥିବାରୁ ଲୋକେ ନିଜ ଉଦ୍ୟମରେ ଏହାକୁ ବାହାର କରିବା ପାଇଁ ମନସ୍ତ କରିଥିଲେ । ଏବଂ ବାଉଁଶ ଓ ଦଉଡି ସାହାଯ୍ୟରେ ଟ୍ରକଟିକୁ ଟାଣି ଏହାକୁ ରାସ୍ତା ଉପରକୁ ନେଇ ଆସିଥିଲେ ।

ଭାଇରାଲ ହୋଇଥିବା ଏହି ଭିଡିଓରେ ସ୍ପଷ୍ଟ ଭାବେ ଦେଖିବାକୁ ମିଳୁଛି କିପରି ଶତାଧିକ ଗାଁଲୋକେ ଟ୍ରକକୁ ଟାଣି ଟାଣି ରାସ୍ତାକୁ ନେଇ ଆସିଛନ୍ତି । ଗାଁଲୋକଙ୍କ ଉତ୍ସାହ ଆଗରେ ସବୁକିଛି ହାର ମାନିଛି ଏବଂ ଏମାନେ ନିଜ ପ୍ରୟାସରେ ସଫଳ ହୋଇଛନ୍ତି ।

Comments are closed.