କନକ ବ୍ୟୁରୋ: ୬ ତାରିଖ ଯାଏଁ ଚାଲିବାକୁ ଥିବା ବିଧାନସଭା ଅଧିବେଶନକୁ ୪ ଦିନ ପୂର୍ବର୍ରୁ ଅନିର୍ଦ୍ଦିଷ୍ଟକାଳ ଯାଏଁ ମୁଲତବି ଘୋଷଣା କରଛନ୍ତି ବାଚସ୍ପତି । ଦୁଇଟି ପର୍ଯ୍ୟାୟରେ ଅଧିବେଶନ ଚାଲିଥିଲା । ସରକାର ଗୃହରେ ଉପସ୍ଥାପିତ କରଥିବା ୩ଟି ବିଲକୁ ପ୍ରତ୍ୟାହାର କରିନେଇଛନ୍ତି । ଏଥିମଧ୍ୟରେ ରହିଛି ଓଡିଶା ଆପାର୍ଟମେଣ୍ଟ ବିଲ୍ । ଏହି ବିଲ୍ ଏଥର ବିଧାନସଭାରେ ପାରିତ ହେବାର ଥିଲା । ଗ୍ରାହକଙ୍କ ସ୍ୱାର୍ଥକୁ ଦୃଷ୍ଟିରେ ରଖି ଏହି ବିଲକୁ ଆଗତ କରିଥିଲେ ନଗର ଉନ୍ନୟନମନ୍ତ୍ରୀ ଉଷା ଦେବୀ । ଏହି ବିଲ୍ ପାସ୍ ହେଲେ ଆପାର୍ଟମେଣ୍ଟ ପଞ୍ଜିକରଣ ପାଇଁ ବାଟ ଫିଟିବ ବୋଲି କୁହାଯାଉଥିଲା । ମାମଲା ହାଇକୋର୍ଟ ଯିବା ପରେ ଗତବର୍ଷଠାରୁ ଆପାର୍ଟମେଣ୍ଟ ରେଜିଷ୍ଟ୍ରେସନ ବନ୍ଦ ଥିଲା । କିନ୍ତୁ ବିନା ଆଲୋଚନାରେ ବିଲକୁ ପ୍ରତ୍ୟାହାର କରିନେଇଛନ୍ତି ସରକାର ।
Kanak News is now on WhatsApp
Join and get latest news updates delivered to you via WhatsApp
ବିମଳେନ୍ଦୁ ପ୍ରଧାନ ନାମକ ଭୁବନେଶ୍ୱରର ଜଣେ ଆପାର୍ଟମେଣ୍ଟ ମାଲିକ, ୨୦୨୧ ଓଡ଼ିଶା ଆପାର୍ଟମେଣ୍ଟ ଓନରସିପ୍ ଆମେଣ୍ଡମେଣ୍ଟ ରୁଲ୍ସକୁ ଚ୍ୟାଲେଞ୍ଜ୍ କରିିଥିଲେ । ଏହା ରିଅଲ୍ ଇଷ୍ଟେଟ୍ ରେଗୁଲେସନ୍ ଓ ଡେଭେଲୋପ୍ମେଣ୍ଟ ଆକ୍ଟ-୨୦୧୬ ବା ରେରାର ବିରୋଧାଚରଣ କରୁଥିବା ଅଭିଯୋଗ କରି ହାଇକୋର୍ଟରେ ପିଟିସନ୍ ଦାୟର କରିଥିଲେ । ଆବେଦନକାରୀଙ୍କ ପକ୍ଷରୁ ଆଇନଜୀବୀ ମୋହିତ ଅଗ୍ରୱାଲ ହାଇକୋର୍ଟରେ ଯୁକ୍ତି ଉପସ୍ଥାପନ କରିଥିଲେ । ଗତ ବର୍ଷ ମେ’ ମାସରେ ସାଧାରଣ ସ୍ଥାନଗୁଡ଼ିକୁ ଆପାର୍ଟମେଣ୍ଟ ମାଲିକ ସଂଘକୁ ହସ୍ତାନ୍ତର କରାନଗଲେ ସେଲ୍ ଡିଡ୍ ପଂଜିକରଣକୁ ସ୍ଥଗିତ ରଖିବାକୁ ନିର୍ଦ୍ଦେଶ ଦେଇଥିଲେ ହାଇକୋର୍ଟ ।
ବିଧାନସଭା ଅଧିବେଶନରେ ରେରା-କମ୍ପ୍ଲିଆଣ୍ଟ ଆପାର୍ଟମେଣ୍ଟ ବିଲ୍ ଆଣିବାକୁ ରାଜ୍ୟ ସରକାରଙ୍କୁ କହିଥିଲେ ହାଇକୋର୍ଟ । ୬ ଦିନ ପୂର୍ବରୁ ବିଧାନସଭାକୁ ବନ୍ଦ କରିବାକୁ ସହଜରେ ଗ୍ରହଣ କରିପାରିନାହାନ୍ତି ବିରୋଧୀ । ଉଭୟ ବିଜେପି ଓ କଂଗ୍ରେସ କକ୍ଷତ୍ୟାଗ କରିଥିବାବେଳେ ବିଜେପି ଗାନ୍ଧିମୂର୍ତି ତଳେ ଧାରଣା ଦେଇଥିଲେ । ବିଜେଡି କହିଛି ଗୃହରେ ଗୁରୁତ୍ୱପୂଣ୍ଣ କାର୍ଯ୍ୟ ନଥିବାରୁ ବିଧାନସଭାକୁ ବନ୍ଦ କରାଯାଇଛି ।