ଦେଶରେ କରୋନା ଭୟ ଭିତରେ କେମିତି ଖୋଲିବ ସ୍କୁଲ ? ଖୁବଶୀଘ୍ର କେନ୍ଦ୍ର ସରକାର ଜାରି କରିପାରନ୍ତି ନୂଆ ଗାଇଡ଼ଲାଇନ୍
କନକ ବ୍ୟୁରୋ : ଦେଶରେ କରୋନା ସଂକ୍ରମଣ ହ୍ରାସ ପାଇବାରେ ଲାଗିଛି । ଏପରି ସ୍ଥିତିରେ ସ୍କୁଲ ଖୋଲିବା ପାଇଁ ଚିନ୍ତା କରୁଛନ୍ତି କେନ୍ଦ୍ର ସରକାର । ଏଥିପାଇଁ ସରକାର ଖୁବ୍ ଶୀଘ୍ର ଗାଇଡ଼ଲାଇନ୍ ଜାରି କରିପାରନ୍ତି । କରୋନା କଟକଣା କଡ଼ାକଡ଼ି ପାଳନ ସହ ସ୍କୁଲ ଖୋଲିବାକୁ ଚାହୁଁଛନ୍ତି କେନ୍ଦ୍ର ସରକାର । ୧୫ ବର୍ଷରୁ ଅଧିକ ବୟସ୍କ ପିଲାଙ୍କୁ କରୋନା ଟିକା ଦିଆଯାଉଥିବାର ସ୍କୁଲ ଖୋଲିବା ପାଇଁ ସରକାର ଯୋଜନା କରୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସାରା ଦେଶରେ ସ୍କୁଲ ଖୋଲିବା ପାଇଁ ଜାତୀୟ ପରାମର୍ଶଦାତା କମିଟିର ମତାମତ ଲୋଡିଛନ୍ତି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ମନସୁଖ ମାଣ୍ଡବ୍ୟ । କରୋନା ମହାମାରୀ ସବୁ ବର୍ଗର ପିଲାଙ୍କୁ ପ୍ରଭାବିତ କରିଛି । ହେଲେ ପିଲାଙ୍କ କ୍ଷେତ୍ରରେ ମୃତ୍ୟୁ ହାର ଓ ଗୁରୁତର ସଂଖ୍ୟା କମ୍ ରହିଛି । ତେଣୁ ଏବେ ପିଲାଙ୍କ ପାଇଁ ସ୍କୁଲ ଖୋଲିବାର ସମୟ ଆସି ଯାଇଛି ବୋଲି ମତ ଦେଉଛନ୍ତି ଶିକ୍ଷାବିତ୍ । କରୋନା ମହାମାରୀ ଆସିବା ପରଠାରୁ ମାର୍ଚ୍ଚ ୨୦୨୦ରୁ ସାରା ଦେଶରେ ଶ୍ରେଣୀଗୃହ ପାଠପଢା ବନ୍ଦ ରହିଛି । ଏହାରି ଭିତରେ କିଛି ରାଜ୍ୟ ଆଂଶିକ ସ୍କୁଲ ଖୋଲୁଛନ୍ତି ।
କିନ୍ତୁ ସଂକ୍ରମଣ ବଢିବା ପରେ ପୁଣି ସ୍କୁଲ ବନ୍ଦ କରି ଦେଉଛନ୍ତି । ସ୍କୁଲ ଖୋଲିବା ପାଇଁ ରାଜ୍ୟମାନେ ସଂପୂର୍ଣ୍ଣ ପ୍ରସ୍ତୁତ କି ନୁହଁ ତାହା ସୁନିଶ୍ଚିତ କରିବାକୁ ପଡ଼ିବ ବୋଲି କୁହାଯାଇଛି । ଦେଶରେ ଏବେ ଟିକାକରଣକୁ ଜୋରଦାର କରାଯାଇଛି । ଜାନୁଆରୀ ୩ ତାରିଖରୁ ୧୫ରୁ ୧୮ ବର୍ଷ ପିଲାଙ୍କୁ ଟିକାକରଣ ଆରମ୍ଭ ହୋଇଛି । ବର୍ତମାନ ସୁଦ୍ଧା ଦେଶରେ ୯୫ ପ୍ରତିଶତ ଲୋକ କରୋନା ଟିକାର ପ୍ରଥମ ଡୋଜ୍ ନେଇ ସାରିଲେଣି ।