ସଂକ୍ରମଣ ରୋକିବା ପାଇଁ ନିଆଗଲା ପଦକ୍ଷେପ । ଟ୍ୱିନସିଟି ସମେତ ଗଂଜାମ, ଗଜପତି, ସୁନ୍ଦରଗଡ଼ ଆଦି ବିଭିନ୍ନ ଜିଲ୍ଲାରେ ଗଶେଶ ପୂଜା ଉପରେ କଟକଣା ଲଗାଇଲେ ପ୍ରଶାସନ ।
କନକ ବ୍ୟୁରୋ: ହାଇକୋର୍ଟରେ ପହଂଚିଛି ଟ୍ୱିନ୍ ସିଟି ଗଣେଶ ପୂଜା ମାମଲା । କଟକରେ ଗଣେଶ ପୂଜା କରିବା ଦାବିରେ ଜନସ୍ୱାର୍ଥ ମାମଲା ରୁଜୁ କରିଛନ୍ତି କଟକ ବୁଢା ଗଣେଶ ପୂଜା କମିଟି ସଭାପତି ଶିବେନ୍ଦ୍ର କୁମାର ହାତି । ପୂଜା ବନ୍ଦ କରିବା ପାଇଁ ପ୍ରଶାସନ ଦେଇଥିବା ନିର୍ଦେଶନାମାକୁ ଚ୍ୟାଲେଂଜ କରି କରୋନା କଟକଣା ସହ ପୂଜା କରାଇବା ପାଇଁ ଅନୁମତି ଦେବାକୁ ନିବେଦନ କରିଛନ୍ତି ଆବେଦନକାରୀଙ୍କ ଓକିଲ ବିଭୂତି ଭୂଷଣ ଚୌଧୁରୀ । । ଆବେଦନକାରୀଙ୍କ ମତରେ ପୂଜା ପାର୍ବଣ ଓ ପରମ୍ପରା ପାଳନ ପ୍ରତ୍ୟେକ ବ୍ୟକ୍ତିଙ୍କ ମୌଳିକ ଅଧିକାର ହେଉଛି । ତେଣୁ କରୋନା କଟକଣା ଭିତରେ କଟକର ୧୭ଟି ସ୍ଥାନରେ ବୁଢା ଗଣେଶ ପୂଜା କରାଇବା ସହ ସାର୍ବଜନନୀନ ପୂଜା ପାଳନ ପାଇଁ ଅନୁମତି ପ୍ରଦାନ କରିବାକୁ କୋର୍ଟଙ୍କୁ ଆବେଦନ କରିଛନ୍ତି ଆଇନଜୀବୀ ।
Kanak News is now on WhatsApp
Join and get latest news updates delivered to you via WhatsApp
ସେପଟେ କରୋନା ସଂକ୍ରମଣକୁ ରୋକିବା ପାଇଁ କଟକ, ଭୁବନେଶ୍ହର ସମେତ ବିଭିନ୍ନ ଜିଲ୍ଲାରେ ଏବର୍ଷ ହେବ ନାହିଁ ଗଣେଶ ପୂଜା । ଗଂଜାମ ଜିଲ୍ଲାରେ ଗଣେଶ ପୂଜା ପାଳନ ଉପରେ କଟକଣା ଲଗାଇଛନ୍ତି ଜିଲ୍ଲାପାଳ ବିଜୟ ଅମୃତା କୁଲାଙ୍ଗେ । କରୋନା ସଂକ୍ରମଣକୁ ଦୃଷ୍ଟିରେ ରଖି ସଂପୂର୍ଣ୍ଣ ଭାବେ ପୂଜା ବନ୍ଦ ରଖିବାକୁ ଜିଲ୍ଳାପାଳ ନିର୍ଦ୍ଦେଶ ଦେଇଛନ୍ତି । ପୂର୍ବରୁ କଟକ, ଭୁବନେଶ୍ୱର, ଗଜପତି ଓ ଜଗତସିଂହପୁର, ଗଂଜାମରେ ଗଣେଶ ପୂଜା ପାଳନ ଉପରେ କଟକଣା ଜାରି କରାଯାଇଛି ।