ଶ୍ରୀମନ୍ଦିର ନୀତି ବନ୍ଦକୁ ନେଇ ମୁହଁ ଖୋଲିଲେ ଗଜପତି ! କହିଲେ ସରକାର କରନ୍ତୁ ହସ୍ତକ୍ଷେପ ।
ପୁରୀରେ ସେବାୟତ-ପୋଲିସ ମୁହାଁମୁହିଁ ଘଟଣାକୁ ନେଇ ଏ ଯାଏଁ ଖୋଲିନି ଶ୍ରୀମନ୍ଦିର । ନୀତି ବିଳମ୍ବ ଯୋଗୁଁ ମହାପ୍ରଭୁ ରହିଛନ୍ତି ଓପାସ । ଅଚଳାବସ୍ଥା ଦୂର ପାଇଁ ସେବାୟତ ଓ ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କ ମଧ୍ୟରେ ହୋଇଥିବା ଆଲୋଚନା ବିଫଳ ହୋଇଛି । ଏନେଇ ଗଜପତି ମହାରାଜା ନିଜର ମତ ପ୍ରକାଶ କରି କହିଛନ୍ତି ଅଗଣିତ ଭକ୍ତଙ୍କୁ ମହାପ୍ରଭୁଙ୍କ ଦର୍ଶନରୁ ବଞ୍ôଚତ କରାନଯାଉ । ଶ୍ରୀମନ୍ଦିରର ମହାନ୍ ପରମ୍ପରାରେ କଳଙ୍କ ନ ଲାଗୁ । ମହାପ୍ରଭୁଙ୍କ ସେବା ଠାରୁ ଆଉ କୌଣସି ପ୍ରସଙ୍ଗ ବଡ ନୁହେଁ । ଏହି ପ୍ରସଙ୍ଗରେ ସରକାର ହସ୍ତକ୍ଷେପ କରନ୍ତୁ । ମହାପ୍ରଭୁଙ୍କ ନୀତି ଯଥାଶୀଘ୍ର ଆରମ୍ଭ କରିବା ପାଇଁ ଆହ୍ୱାନ୍ ଦେଇଛନ୍ତି ଗଜପତି ମହାରାଜା ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ଶ୍ରୀଜିଉଙ୍କୁ ଦର୍ଶନ ନକରି ଶହ ଶହ ଭକ୍ତ ଫେରିବାକୁ ବାଧ୍ୟ ହେଉଛନ୍ତି କିନ୍ତୁ ଜିଦରେ ଅଟଳ ରହିଛନ୍ତି ସେବାୟତ । ଶ୍ରୀମନ୍ଦିରର ଭିତର ଦ୍ୱାର ଖୋଲିନଥିବାରୁ ଭକ୍ତମାନେ ଅସନ୍ତୋଷ ପ୍ରକାଶ କରି ବ୍ୟାରିକେଡ ଭାଙ୍ଗି ଧସେଇ ପଶିଛନ୍ତି । ସେବାୟତଙ୍କ ସହ ଆଲୋଚନା ପରେ ଶ୍ରୀମନ୍ଦିର ମୁଖ୍ୟ ପ୍ରଶାସକ କହିଛନ୍ତି ସେବାୟତ ନିଜ ବିବେକ ଅନୁସାରେ କାମ କରନ୍ତୁ । ଗତକାଲି ମନ୍ଦିର ଦର୍ଶନ ପାଇଁ ଶ୍ରଦ୍ଧାଳୁଙ୍କୁ ନେଇ ଯାଉଥିବା ସେବାୟତ ଓ ପୋଲିସ ଧସ୍ତାଧସ୍ତି ହୋଇଥିଲେ । ସେହି ଦୃଶ୍ୟ ସିସିଟିଭିରେ ମଧ୍ୟ କଏଦ ହୋଇଛି । ସୂଚନା ଅନୁସାରେ ଭିତର ସେବାୟତ ତାଙ୍କ ଶ୍ରଦ୍ଧାଳୁଙ୍କୁ ନେଇ ମହାପ୍ରଭୁଙ୍କ ଦର୍ଶନ ପାଇଁ ଶ୍ରୀମନ୍ଦିରକୁ ଯାଉଥିଲେ ।
ଏହି ସମୟରେ ଯାତ୍ରୀ ଜଣଙ୍କ ବିଦେଶୀ ବୋଲି ସନ୍ଦେହ କରି ପୋଲିସ ଅଟକାଇଥିଲା । ଯାତ୍ରୀଙ୍କ ସପକ୍ଷରେ ଯୁକ୍ତିବାଢି ସେବାୟତ କହିଥିଲେ ସେ ବିଦେଶୀ ନୁହନ୍ତି ବଙ୍ଗାଳି ଭାଷାରେ କଥା ହେଉଛନ୍ତି । ତେବେ ସଂପୃକ୍ତ ଶ୍ରଦ୍ଧାଳୁ ପରିଚୟ ପତ୍ର ଦେଇନପାରିବାରୁ ମନ୍ଦିର ଭିତରକୁ ଛାଡିନଥିଲା ପୁଲିସ । ଆଉ ଏହାକୁ ନେଇ କିଛି ସମୟ ପାଇଁ ପୋଲିସ ଓ ସେବାୟତଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା । ପରେ ପୋଲିସ- ସେବାୟତ ମୁହାଁମୁହିଁ ହୋଇଥିଲେ । ଏହି ପୁରା ଦୃଶ୍ୟ କଏଦ ହୋଇଥିଲା ସିସିଟିଭିରେ ।