କନକ ବ୍ୟୁରୋ : ବିଜେପୁର ବିଗୁଲ ବାଜିବା ପରେ ଉଭୟ ବିଜେପି –ବିଜେଡି ପରସ୍ପରର ଶତ୍ରୁ ପାଲଟି ଯାଇଛନ୍ତି । କେହି କାହାକୁ ଆଡ ଆଖିରେ ମଧ୍ୟ ଚାହୁଁନାହନ୍ତି । କେବଳ ବିଜେପୁର ନୁହେଁ କୁନ୍ଦୁଲି ପ୍ରସଙ୍ଗ, ମହାନଦୀ ପ୍ରସଙ୍ଗରେ ଉଭୟ ଦଳ ମୁହାଁମୁହିଁ ହେଉଥିବା ବେଳେ ଆରୋପ ପ୍ରତ୍ୟାରୋପ ମଧ୍ୟ ବନ୍ଦ ହେଉନାହିଁ । ତେବେ ଏସବୁ ଭିତରେ ଏବେ ସାମ୍ନାକୁ ଆସିଛି ଦୁଇଟି ଫଟୋ ଯାହାକୁ ନେଇ ଆରମ୍ଭ ହୋଇଛି ଚର୍ଚ୍ଚା । ଗୋଟିଏ ଫଟୋ ରାଜ୍ୟ ରାଜଧାନୀରୁ ଆସିଥିବା ବେଳେ ଅନ୍ୟ ଫଟୋଟି ନୂଆଦିଲ୍ଲୀରୁ ଆସିଛି । ଉଭୟ ଫଟୋରେ ଗୋଟିଏ ସମାନତା ଦେଖିବାକୁ ମିଳିଛି । ଯାହା ସାଧାରଣ ଲୋକଙ୍କୁ ଆଲୋଚନା ପାଇଁ ଖୋରାକ ଯୋଗାଇଛି । କାରଣ ରାଜ୍ୟ ରାଜନୀତିର ଦୁଇ ଶତ୍ରୁ ବିଜେପି-ବିଜେଡି ଦଳର ନେତାଙ୍କ ଅନ୍ତରଙ୍ଗ ମୁହୂର୍ତ୍ତର ଫଟୋକୁ ନେଇ ଆରମ୍ଭ ହୋଇଛି ଚର୍ଚ୍ଚା ।
Kanak News is now on WhatsApp
Join and get latest news updates delivered to you via WhatsApp
ରାଜନୈତିକ ବିଚାର ବିଭେଦ ଥିବା ଦୁଇଟି ଦଳର ନେତାଙ୍କୁ ଏକାଠି ଦେଖିଲେ ଆମ ମନରେ ଅନେକ ପ୍ରଶ୍ନ ଉଠେ । ଏହା ସ୍ୱାଭାବିକ ମଧ୍ୟ । କାରଣ ପ୍ରସଙ୍ଗ ଥାଉ କି ନଥାଉ ପରସ୍ପର ବିରୋଧୀ ବୟାନବାଜି କରୁଥିବା ନେତା ଏକାଠି ହେବା ଖୁବ ବିରଳ । ଆଉ ଏଭଳି ଏକ ଚିତ୍ର ଆଜି ସାମ୍ନାକୁ ଆସିଛି ସଂସଦର ସେଂଟ୍ରାଲ ହଲରୁ । କ୍ୟାମେରାର ଗୋଟିଏ ଫ୍ରେମରେ ଏକାଠି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହ ବିଜେଡି ସଂସଦୀୟ ଦଳ ନେତା ଭର୍ତୃହରି ମହତାବ, ସାଂସଦ ତଥାଗତ ଶତପଥୀ, କଳିକେଶ ନାରାୟଣ ସିଂଦେଓ ଏବଂ ପ୍ରତାପ ଦେବ । ବର୍ତମାନ ରାଜ୍ୟ ରାଜନୀତି ଯେଉଁ ତିକ୍ତତା ଭିତରେ ଗତି କରୁଛି ଠିକ ସେତିକିବେଳେ ଏହି ନେତାମାନେ ଅତି ସହଜ ଢଙ୍ଗରେ ବସିଥିବାର ଦେଖିବାକୁ ମିଳିଛି ।
ପଂଚାୟତ ନିର୍ବାଚନ ସମୟରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଖୁବ କଟୁ ସମାଲୋଚନା କରିଥିଲେ ତଥାଗତ ଶତପଥୀ । ଏପରିକି ଓଡିଶାରୁ ଜଣେ ମାତ୍ର କେନ୍ଦ୍ରମନ୍ତ୍ରୀ ଥିବା ସେ ଜାଣନ୍ତି ଓ ଧର୍ମେନ୍ଦ୍ର ପ୍ରଧାନ କିଏ ସେ ଜାଣିନ୍ତି ନାହିଁ ବୋଲି କହିଥିଲେ ତଥାଗତ । ସେ ହୁଏତ ବିହାରରୁ କେନ୍ଦ୍ରମନ୍ତ୍ରୀ ଥାଇପାରନ୍ତି ବୋଲି କହିବାକୁ ପଛାଇ ନଥିଲେ । ସେପଟେ ବର୍ତମାନ ବିଜେଡିର ଶତ୍ରୁ ନମ୍ବର ୱାନ ଧର୍ମେନ୍ଦ୍ର ପ୍ରଧାନଙ୍କୁ ପ୍ରସଙ୍ଗ ଭିତିରେ ବାରମ୍ବାର କଟାକ୍ଷ କରିଆସିଛନ୍ତି ପ୍ରତାପ ଦେବ । ହେଲେ ଭର୍ତୃହରି ମହତାବ କିନ୍ତୁ ଅନେକ ସମୟରେ ବିଜେପି, ମୋଦି ଓ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ପ୍ରଶଂସା କରିବାକୁ ପଛାଇ ନାହାନ୍ତି । ରାଜ୍ୟରେ ବିଜେଡି-ବିଜେପି ତିକ୍ତ ରାଜନୈତିକ ପ୍ରତିଦ୍ୱନ୍ଦିତା ଭିତରେ ଏହି ନେତାମାନେ ଏକାଠି ବସିବାକୁ ନେଇ କି ସନ୍ଦେସ ଆସୁଛି । ନା ଏହାକୁ କେବଳ ଏକ ଅବସର କାଟିବାର ସମୟ ବୋଲି ଧରିନିଆଯିବା ଉଚିତ । ଏହି ଫଟୋକୁ ନିଜ ଟ୍ୱିଟର ଆକାଉଂଟରେ ପୋଷ୍ଟ କରିବା ସହ ବନ୍ଧୁତାର ଏକ ମୁହୂର୍ତ ବୋଲି ଲେଖିଛନ୍ତି ସାଂସଦ ତଥାଗତ ଶତପଥୀ ।
କେବଳ ଏହି ଗୋଟିଏ ଫଟୋ ନୁହେଁ ଆଜି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କ ଅଫିସରେ ମଧ୍ୟ ଏକ ବିରଳ ଦୃଶ୍ୟ କ୍ୟାମେରାରେ କଏଦ ହୋଇଛି । ବିଜେପୁର ଉପନିର୍ବାଚନ ନେଇ ହୋଇଥିବା ସର୍ବଦଳୀୟ ବୈଠକ ପରେ ବିଜେଡିର ଭୁବନେଶ୍ୱର ଉତ୍ତର ବିଧାୟକ ପ୍ରିୟଦର୍ଶୀ ମିଶ୍ର ଓ ବିଜେପିର ମୁଖପାତ୍ର ସଜ୍ଜନ ଶର୍ମାଙ୍କୁ ଏକ ଭିନ୍ନ ଭଙ୍ଗୀରେ ଦେଖିବାକୁ ମିଳିଥିଲା । ଉଭୟ ପରସ୍ପରର ହାତକୁ ଧରି ବେଶ କିଛି ସମୟ ଧରି କୌଣସି ଗୁରୁତ୍ୱପୂର୍ଣ୍ଣ ବିଷୟରେ ଆଲୋଚନା କରୁଥିଲେ । ପ୍ରିୟଦର୍ଶଙ୍କ ହାତ ସଜ୍ଜନ ଏପରି ଭାବେ ଧରିଥିଲେ ଯେ ଲାଗୁଥିଲା ତାଙ୍କ ହାତ ଛାଡିବା ମୁଡରେ ସେ ନାହାନ୍ତି ।ତେବେ ଏହି ସମୟରେ ପ୍ରିୟଦର୍ଶୀଙ୍କ ପାଖରେ ବିଜେପିର ଅନେକ ନେତାଙ୍କୁ ଦେଖିବାକୁ ମିଳିଥିଲା । ଖାସ କରି ଯେଉଁମାନେ ନବୀନଙ୍କ ବିରୋଧରେ ଅଧିକାଂଶ ସମୟ ନାରାବାଜି କରିଥାନ୍ତି । ରାଜନୈତିକ ଶତ୍ରୁ ଦଳ ବିଜେପି ନେତାଙ୍କ ସହ ଅଧିକ ସମୟ ବିତାଇଲେ କାଳେ ସୁପ୍ରିମୋଙ୍କ ନିକଟକୁ ଭୂଲ ମେସେଜ ଯିବ ତାହା ପୂର୍ବରୁ ସର୍ତକ ହୋଇଯାଇଥିଲେ ପ୍ରିୟଦର୍ଶୀ । ବିଜେପି ନେତାଙ୍କ କଥାରେ ମୁରୁକି ହସା ଦେଇ ଚୁପଚାପ ସେଠାରୁ ଖସି ଆସିଥିଲେ । ତେବେ ଅବସର ବିନୋଦନ ବଦଳରେ ଯଦି ରାଜ୍ୟର ବିକାଶ ପାଇଁ ନେତା ମାନେ ଏକାଠି ହୁଅନ୍ତେ ତେବେ ମହାନଦୀ ବିବାଦ ଭଳି ଅନେକ ବିବାଦର ସମାଧାନର ବାଟ ବାହାରି ପାରନ୍ତା ।