ଶିକ୍ଷକତାରୁ ଅବସର ପରେ ଚାଷ କାମରେ ଦେଇଛନ୍ତି ମନ । ଗଞ୍ଜାମ ଖଲ୍ଲିକୋଟ ବ୍ଲକ ପୁସ୍ତପୁର ଗ୍ରାମର ପ୍ରସନ୍ନ କୁମାରଙ୍କ ଚାଷକୁ ନେଇ ଚର୍ଚ୍ଚା ।
କନକ ବ୍ୟୁରୋ: ଗଞ୍ଜାମ ଜିଲ୍ଲା ଖଲ୍ଲିକୋଟ ବ୍ଲକ ପୁସ୍ତପୁର ଗ୍ରାମର ପ୍ରସନ୍ନ କୁମାର ଦାଶ । ସେ ଥିଲେ ହାଇସ୍କୁଲର ହିନ୍ଦୀ ଶିକ୍ଷକ । ଗତ ବର୍ଷ ଅବସର ନେବା ପରେ ଏବେ ଚାଷ କାମକୁ ଆପଣେଇ ନେଇଛନ୍ତି । ମଥୁରା ପଞ୍ଚୟତ ଭରଷା ନିକଟ ପାହାଡ ପାଦଦେଶରେ ଥିବା ୧୬ ଭରଣ ଜାଗାରେ ଚାଷ କରିଛନ୍ତି ଭଳିକି ଭଳି ପନିପରିବା । ସରକାରଙ୍କ ସହାୟତାରେ ବୋରିଙ୍ଗ ଟିଏ କରି ଚାଷ ଅନୁପଯୋଗୀ ଜମିକୁ ଚାଷ ଉପଯୋଗୀ କରିପାରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବହୁ ଦିନ ଆଗରୁ ଚାଷ କାମ ପ୍ରତି ରୁଚି ରଖିଥିବା ପ୍ରସନ୍ନ ଚାକିରି କାଳରେ ଚାଷ ବାସ ପାଇଁ ସମୟ ପାଇ ପାରୁନଥିଲେ । ତେବେ ଗତ ବର୍ଷ ଚାକିରିରୁ ଅବସର ନେବା ପରେ ଏବେ କେଉଁ ସମୟରେ କେଉଁ ଚାଷ ହେବ ତାହା ପ୍ରତି ଧ୍ୟାନ ଦେଉଛନ୍ତି । ଆଉ ତାଙ୍କର ଏହି ଚେଷ୍ଟା ବଳରେ ଟାଙ୍ଗରା ଭୂଇଁରେ ଫଳେଇ ପାରିଛନ୍ତି ବାଇଗଣ, ଭେଣ୍ଡି, କାକୁଡି, ତୋରଡା, ଗୁଆର, ପୋଟଳ, ଝୁଡୁଙ୍ଗ, ଅମୃତ ଭଣ୍ଡା, ସଜନା, ମକା, ବୋଇତାଳୁ ଓ କଦଳୀ ଭଳି ବିଭିନ୍ନ ପନିପରିବା । ଆଉ ତାଙ୍କ ଫାର୍ମ ଭିତରେ ରହିଛି ପିଜୁଳି, ଲେମ୍ବୁ ତେଜପତ୍ର, ଡାଲଚିନି, ଆମ୍ବ, ପଣସ ଭଳି ବିଭିନ୍ନ ପକାରର ଫଳ ଗଛ । କେବଳ ଏତିକି ନୁହଁ କୁକୁଡା ଚାଷ ମଧ୍ୟ କରିଛନ୍ତି ସେ ।
ପ୍ରସନ୍ନଙ୍କ ଫାର୍ମରେ ହେଉଥିବା ବିଭିନ୍ନ ଚାଷବାସକୁ ରକ୍ଷଣାବେକ୍ଷଣ କରିବା ପାଇଁ ତାଙ୍କ ସହ ରହିଛନ୍ତି ଆଉ ୬ଜଣ କର୍ମଚାରୀ । ପନିପରିବା ତୋଳିବା ପାଣି ଦେବା ପସନ୍ନଙ୍କ ଅନୁପସ୍ଥିତିରେ କୁକୁଡା ଓ ଲାଗିଥିବା ଫସଲର ଯତ୍ନ ନେବା ଭଳି କାମ କରିଥାନ୍ତି । ଫାର୍ମରୁ ପନିପରିବା ତୋଳିବା ପରେ ସେ ନିକଟସ୍ଥ ବଜାର ଖଲ୍ଲିକୋଟ ,ପୁସ୍ତପୁର,ବେଗୁନିଆପଡା ଓ କୋଦଳାରେ ବିକ୍ରି କରିଥାନ୍ତି ।