ଜୀବନ ସହ ସଂଘର୍ଷ କରୁଛନ୍ତି ପୂର୍ବତନ ଭାରତୀୟ କ୍ରିକେଟର । ଚିକିତ୍ସା ପାଇଁ ପାଖରେ ଅର୍ଥ ନାହିଁ, ସହାୟତା କରିବାକୁ ଅପିଲ କଲେ କ୍ରୀଡା ସାମ୍ବାଦିକ ।
କନକ ବ୍ୟୁରୋ : ଭାରତୀୟ କ୍ରିକେଟ ଟିମର ପୂର୍ବତନ ୱିକେଟକିପର ଏବେ ଜୀବନଯୁଦ୍ଧରେ ସଂଘର୍ଷ କରୁଛନ୍ତି । ଯେଉଁଠି ଏବେ କ୍ରିକେଟ ଖେଳୁଥିବା ଖେଳାଳୀ କୋଟି କୋଟି ଟଙ୍କା ଅର୍ଥ ଉପାର୍ଜନ କରୁଛନ୍ତି, ବିଳାସମୟ ଜୀବନ କାଟୁଛନ୍ତି । ସେଭଳିସ୍ଥଳେ ପୂର୍ବତନ କ୍ରିକେଟର ବିଜୟ ଯାଦବ ଅର୍ଥ ଅଭାବରୁ ଚିକିତ୍ସିତ ହେବାରୁ ବଞ୍ଚିତ ହେବାକୁ ଯାଉଛନ୍ତି । ବିଜୟଙ୍କର କିଡନୀ ସମସ୍ୟା ଥିବା ବେଳେ ଏବେ ଡାଇଲିସିସ ଚାଲିଛି । ଯେଉଁଥିପାଇଁ ବିପୁଳ ଅର୍ଥର ଆବଶ୍ୟକତା ରହିଛି । କିନ୍ତୁ ଏବେ ବିଜୟଙ୍କ ପାଖେ ଏତେ ଟଙ୍କା ନାହିଁ ଯାହାଫଳରେ ତାଙ୍କର ଭଲଭାବେ ଚିକିତ୍ସା ହୋଇପାରିବ । ଇଏ ସେହି ବିଜୟ ଯାଦବ ଯିଏ ୧୯୯୩ ହିରୋ କପ ସେମିଫାଇନାଲରେ ଦକ୍ଷିଣ ଆଫ୍ରିକା ବିପକ୍ଷ ମ୍ୟାଚରେ ଶେଷ ଓଭର ସଚିନ ପକାନ୍ତୁ ବୋଲି ପରାମର୍ଶ ଦେଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ବିଜୟ ଯାଦବଙ୍କର ୨୦୦୬ ମସିହାରେ ଫରିଦାବାଦରେ କାର ଦୁର୍ଘଟଣା ହୋଇଥିଲା । ଯେଉଁଥିରେ ବିଜୟ ଗୁରୁତର ଆହତ ହୋଇଥିଲେ । ସେବେଠାରୁ ବିଭିନ୍ନ ସ୍ୱାସ୍ଥ୍ୟ ସମସ୍ୟାରେ ପୀଡିତ ରହୁଥିଲେ ବିଜୟ । ଏପରିକି ଏହି ଦୁର୍ଘଟଣାରେ ସେ ନିଜର ୧୧ ବର୍ଷର ଝିଅକୁ ବି ସବୁଦିନ ପାଇଁ ହରାଇଥିଲେ । ଆଉ ଏହାପରେ ତାଙ୍କର ଦୁଇ ଥର ହୃଦଘାତ ମଧ୍ୟ ହୋଇଛି । ଏସବୁ ଭିତରେ ଏବେ କିଡନୀ ସମ୍ପୂର୍ଣ୍ଣ ରୂପେ ଖରାପ ହେବା କାରଣରୁ ହସ୍ପିଟାଲରେ ଚିକିତ୍ସିତ ହେଉଛନ୍ତି ବିଜୟ । କିନ୍ତୁ ଆଗକୁ ଉନ୍ନତ ମାନର ଚିକିତ୍ସା ପାଇଁ ବିଜୟଙ୍କ ପାଖରେ ଅର୍ଥର ଅଭାବ ରହିଛି । ଯେଉଁଥିପାଇଁ କ୍ରୀଡା ସାମ୍ବାଦିକ ବିଜୟ ଲୋକପଲ୍ଲୀ ଏକ ଟ୍ୱିଟ୍ କରି ଆର୍ଥିକ ସହାୟତା କରିବାକୁ ଅପିଲ କରିଛନ୍ତି ।
Former India wicketkeeper in desperate need of financial help for treatment of kidney failure. Has been on dialysis and suffered two heartattacks. He was the one to suggest that Sachin Tendulkar should bowl the last over against South Africa in the 1993 Hero Cup semifinal. pic.twitter.com/AlPY3cv7qf
— Vijay Lokapally 🇮🇳 (@vijaylokapally) May 7, 2022
ବିଜୟ ଯାଦବ ଭାରତ ପାଇଁ ୧୯ଟି ଦିନିକିଆ ଓ ଗୋଟିଏ ଟେଷ୍ଟ ମ୍ୟାଚ୍ ଖେଳିଛନ୍ତି । କିନ୍ତୁ ୧୯୯୧ରେ ହରିୟାଣାକୁ ରଣଜୀ ଚାମ୍ପିୟନ କରିଥିବାରୁ ବେଶ ଚର୍ଚ୍ଚାରେ ଥିଲେ ବିଜୟ । ସେହି ସିଜନରେ ବିଜୟ ୨୪ଟି କ୍ୟାଚ୍ ସହ ୬ଟି ଷ୍ଟମ୍ପି କରିଥିଲେ । ଆଉ ଏହି ପ୍ରଦର୍ଶନ ଆଧାରରେ ୧୯୯୨-୯୩ରେ ଦକ୍ଷିଣ ଆଫ୍ରିକାରେ ହୋଇଥିବା ସିରିଜ୍ ପାଇଁ ବିଜୟଙ୍କୁ ଟିମରେ ଚୟନ କରାଯାଇଥିଲା ।