ଦେଶରେ ସଫଳ ହୋଇଛି ପ୍ରଥମ ପର୍ଯ୍ୟାୟ ଟିକାକରଣ: ସ୍ୱାସ୍ଥ୍ୟ ମନ୍ତ୍ରାଳୟର ସୂଚନା, ୩ହଜାର ୩ଶହ ୫୧ଟି ସାଇଟରେ ୧ଲକ୍ଷ ୬୫ହଜାର ୭୧୪ଜଣଙ୍କୁ ଦିଆଯାଇଛି ଟିକା
ସେପଟେ ରାଜ୍ୟରେ ଦିଆଯାଇଛି ୮୫ ପ୍ରତିଶତ ଟିକା
କନକ ବ୍ୟୁରୋ : ଦେଶରେ ସଫଳ ହୋଇଛି ପ୍ରଥମ ପର୍ଯ୍ୟାୟ ଟିକାକରଣ । ସ୍ୱାସ୍ଥ୍ୟ ମନ୍ତ୍ରାଳୟ ଏନେଇ ସୂଚନା ଦେଇଛି । ସାରା ଦେଶରେ ୩ହଜାର ୩ଶହ ୫୧ଟି ସାଇଟରେ ଟିକାକରଣ କରାଯାଇଛି । ପ୍ରାଥମିକ ସୂଚନା ଅନୁସାରେ ପ୍ରଥମ ପର୍ଯ୍ୟାୟରେ ଦେଶରେ ୧ଲକ୍ଷ ୬୫ହଜାର ୭୧୪ଜଣଙ୍କୁ ଦିଆଯାଇଛି ଟିକା । ତେବେ ଭ୍ୟାକସିନ ନେବା ପରେ କୌଣସି ପାଶ୍ୱର୍ ପ୍ରତିକ୍ରୀୟା ନଥିବା ସୂଚନା ଦେଇଛନ୍ତି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟର ଅତିରିକ୍ତ ସଚିବ ମନୋହର ଅଗନାନୀ । ଦେଶରେ ୩ହଜାର ୩ଶହ ୫୧ଟି କେନ୍ଦ୍ରରେ ହୋଇଥିବା ଟିକାକରଣରେ ୧୬ହଜାର ୭୫୫ଜଣ ନିୟୋଜିତ ହୋଇଥିଲେ । ସଂଧ୍ୟା ସାଢେ ୫ଟା ସୁଦ୍ଧା ୧ଲକ୍ଷ ୬୫ହଜାର ୭୧୪ଜଣଙ୍କୁ ଟିକା ଦିଆଯାଇଛି । ୧୧ଟି ରାଜ୍ୟରେ କୋଭିସିଲ୍ଡ ଓ କୋଭାକ୍ସିନ ଦୁଇଟି ଯାକ ଟିକା ଦିଆଯାଇଥିବା ବେଳେ ଅନ୍ୟ ରାଜ୍ୟ ଓ କେନ୍ଦ୍ରଶାସିତ ଅଂଚଳ ଗୁଡିକରେ କେବଳ କୋଭିସିଲ୍ଡ ଟିକା ଦ୍ୱାରା ଟିକାକରଣ କରାଯାଇଥିବା କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ସୂଚନା ଦେଇଛି ।
Kanak News is now on WhatsApp
Join and get latest news updates delivered to you via WhatsApp
ସେହିଭଳି ଓଡିଶାରେ ଗତକାଲି ପ୍ରଥମ ଦିନରେ ୮୫ ପ୍ରତିଶତରୁ ଅଧିକ କୋଭିଡ ଟିକାକରଣ ହୋଇଥିବା ରାଜ୍ୟ ସ୍ୱାସ୍ଥ୍ୟ ବିଭାଗ ପକ୍ଷରୁ ସୂଚନା ମିଳିଛି । ଆଗଧାଡିର କୋଭିଡ ଯୋଦ୍ଧାଙ୍କୁ କରୋନା ଟିକା ବା ମହୌଷଧୀ ଦିଆଯାଇଛି । ରାଜ୍ୟର ୧୬୧ଟି ଟିକାକରଣ କେନ୍ଦ୍ରରେ ସଫେଇ କର୍ମୀଚାରୀ, ସ୍ୱାସ୍ଥ୍ୟକର୍ମୀ, ଆଶା, ଅଙ୍ଗନୱାଡିଙ୍କୁ ଟିକା ଦିଆଯାଇଛି । ତେବେ ଆଜି ରାଜ୍ୟରେ ଟିକାକରଣ ବନ୍ଦ ରଖାଯିବ । ମୁଖ୍ୟତଃ ଏହି ପ୍ରଥମ ଦିନ ଟିକା କରଣ ବ୍ୟବସ୍ଥାର ସମୀକ୍ଷା କରାଯିବ ଏବଂ ସୋମବାରଠାରୁ ଏହି କାର୍ଯ୍ୟକ୍ରମ ପୁଣି ଜାରି ରହିବ ବୋଲି ସ୍ୱାସ୍ଥ୍ୟ ବିଭାଗ ପକ୍ଷରୁ ସୂଚନା ଦିଆଯାଇଛି । ନିର୍ଧାରିତ ସମସ୍ତ ତାଲିକାଭୁକ୍ତ ଟିକା ଗ୍ରହଣକାରୀଙ୍କୁ ଟିକା ଦେବା ଶେଷ ହେବାଯାଏଁ ଏହି କାର୍ଯ୍ୟକ୍ରମ ଜାରି ରହିବ ।