କନକ ବ୍ୟୁରୋ : ପାଖା ପାଖି ୩ ମାସ ହେବ ଦିଲ୍ଲୀର ବିଭିନ୍ନ ସୀମାରେ ଚାଲିଥିବା କୃଷକ ଆନ୍ଦୋଳନରେ ଏବେ ସଂଖ୍ୟା କମିବାରେ ଲାଗିଛି । ଆନ୍ଦୋଳନରତ କୃଷକ ମାନେ ଧିରେ ଧିରେ ଟେଣ୍ଟ ଭାଙ୍ଗି ନିଜ ନିଜ ଘରକୁ ଫେରୁଥିବା ଦେଖିବାକୁ ମିଳିଛି । ଏନେଇ ଆନ୍ଦୋଳନ କମଜୋର ହେଉଥିବା ଆଲୋଚନା ହେଉଥିବା ବେଳେ କୃଷକ ନେତା ମାନେ କହିଛନ୍ତି କି କୃଷକ ମାନେ ସେମାନଙ୍କ ଆନ୍ଦୋଳନ ପାଇଁ ନୂଆ ରଣନୀତି ପ୍ରସ୍ତୁତ କରୁଛନ୍ତି । ତେଣୁ ଦିଲ୍ଲୀ ସୀମାରେ ଆନ୍ଦୋଳନ ଜାରି ରହିଥିବା ବେଳେ କୃଷକ ମାନେ ସେମାନଙ୍କ ନିଜ ନିଜ ଅଞ୍ଚଳକୁ ଯାଇ ଅନ୍ଦୋଳନକୁ ବିସ୍ତାର କରିବା କଥା ଚିନ୍ତା କରୁଛନ୍ତି । ତେଣୁ ଅଧିକାଂଶ କୃଷକ ସେମାନଙ୍କ ଅଞ୍ଚଳକୁ ଫେରି ଯାଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ଦେଶସାରା ମହାପଂଚାୟତ ଆୟୋଜନ କରିବା ଲକ୍ଷ୍ୟ ନେଇ ଚାଷୀ ନେତା ରାକେଶ ଟିକାୟତ ଯୋଜନା କରୁଥିବା ଜଣାପଡିଛି । କୃଷକ ନେତା ରାକେଶ ଟିକାୟତଙ୍କ କହିବା ମୁତାବକ ଯେତେବେଳେ ଚାହିଁବେ ସେତେବେଳେ ଦିଲ୍ଲୀ ସୀମାରେ କୃଷକ ମାନଙ୍କୁ ଏକଜୁଟ୍ କରାଯାଇ ପାରିବ । ହେଲେ ଦେଶ ସାରା କୃଷି ଆଇନକୁ ବିରୋଧ କରାଯିବା ଲାଗି ମହାପଞ୍ଚାୟତ ଜରୁରୀ ବୋଲି ସେ ମତ ଦେଇଛନ୍ତି । ସେ ଆହୁରି କହିଛନ୍ତି କି ସରକାର ଯେଭଳି ଭାବେ ଟାଳଟୁଳ ନୀତି ଅବଲମ୍ବନ କରୁଛନ୍ତି ସେଥିରୁ ସ୍ପଷ୍ଟ ହେଉଛି ଯେ ସହଜରେ ଏହାର ସମାଧାନ ହେବ ନାହିଁ । ଆନ୍ଦୋଳନ ପୁରା ଲମ୍ବା ସମୟ ପର୍ଯ୍ୟନ୍ତ ଚାଲୁ ରଖିବା ଉର୍ଦ୍ଦେଶ୍ୟ ନେଇ ଦିଲ୍ଲୀ ସୀମାରୁ ଆନ୍ଦୋଳନରତ ଚାଷୀଙ୍କ ସଂଖ୍ୟା କମାଇବା ପାଇଁ କୃଷକ ମୋର୍ଚ୍ଚା ପକ୍ଷରୁ ନିଷ୍ପତ୍ତି ନିଆଯାଇଥିବା ଶ୍ରୀ ଟିକାୟତ କହିଛନ୍ତି ।
କହିରଖୁ କି ନୂତନ କୃଷିବିଲ କୁ ବିରୋଧ କରି ଦିଲ୍ଲୀ, ହରିଆଣା, ପଞ୍ଜାବ ଓ ରାଜସ୍ଥାନ ସୀମାରେ କୃଷକ ମାନେ ଦୀର୍ଘ ଦିନ ହେବ ଆନ୍ଦୋଳନ ଜାରି ରଖିଛନ୍ତି । ଏହାରି ମଧ୍ୟରେ ସରକାର ଓ କୃଷକ ସଂଗଠନ ମାନଙ୍କ ସହ ୧୧ ଥର ଆଲୋଚନା ହୋଇଥିଲେ ବି ଆଲୋଚନାରୁ କିଛି ସୁଫଳ ମିଳିପାରି ନାହିଁ । ସରକାର ଆଇନ ପ୍ରତ୍ୟାହାର କରିବାକୁ ସିଧା ସଳଖ ମନା କରିଦେଇଥିବା ବେଳେ ଆଇନ ପ୍ରତ୍ୟାହାର ନ ହେବା ଯାଏ ଆନ୍ଦୋଳନ ଜାରି ରହିବ ବୋଲି ରୋକ୍ ଠୁକ୍ ଶୁଣାଇ ଦେଇଛନ୍ତି ଚାଷୀ ସଂଗଠନ ମାନେ । ଏହାରି ମଧ୍ୟରେ ଆନ୍ଦୋଳନ ସ୍ଥଳରେ ବିଭିନ୍ନ କାରଣକୁ ନେଇ ୨୦୦ ରୁ ଅଧିକ କୃଷକଙ୍କ ଜୀବନ ଗଲାଣି ।