ଆନ୍ଦୋଳନରତ ଚାଷୀଙ୍କ ଅରାଜକତାର ନୂଆ ପ୍ରମାଣ । ଜାନୁଆରୀ ୨୬ ହିଂସାରେ ପୋଲିସ କର୍ମୀଙ୍କୁ ଚାଷୀ ଲାଠିରେ ମାଡ ମାରୁଥିବାର ଭିଡିଓ ଜାରି କଲା ଦିଲ୍ଲୀ ପୋଲିସ ।
କନକ ବ୍ୟୁରୋ: ଜାନୁଆରୀ ୨୬ ସାଧାରଣତନ୍ତ୍ର ଦିବସରେ ଦିଲ୍ଲୀରେ କଣ ଘଟିଲା ତାହା ସମସ୍ତେ ଦେଖିଛନ୍ତି । ଆନ୍ଦୋଳନ ନାଁରେ ଚାଷୀମାନେ କିଭଳି ଅରାଜକତା କଲେ ତାହା ଆପଣ ଟିଭି ପରଦାରେ ଦେଖିଛନ୍ତି । ଆନ୍ଦୋଳନ ନାଁରେ ଚାଷୀଙ୍କ ହିଂସାକାଣ୍ଡର ନୂଆ ନୂଆ ଭିଡିଓ ସାମନାକୁ ଆସୁଛି । ଏହାରି ଭିତରେ ୨୬ ଜାନୁଆରୀରେ ଚାଷୀଙ୍କ ଉତ୍ପାତର ଏକ ନୂଆ ଭିଡିଓ ସାମ୍ନାକୁ ଆଣିଛି ଦିଲ୍ଲୀ ପୋଲିସ । ଚାଷୀଙ୍କ ଉପରେ ପୋଲିସ ବଳପ୍ରୟୋଗ ନେଇ ଅଭିଯୋଗ ଭିତରେ ଏହି ଭିଡିଓ କିଛି ଭିନ୍ନ ତଥ୍ୟ ବୟାନ କରୁଛି ।
Kanak News is now on WhatsApp
Join and get latest news updates delivered to you via WhatsApp
ଏହି ଭିଡିଓରେ ଦେଖିବାକୁ ମିଳୁଛି ଯେ, କିଭଳି ଚାଷୀମାନେ ହାତରେ ଲାଠି ଧରି ପୋଲିସ ଉପରେ ଆକ୍ରମଣ କରୁଛନ୍ତି । ଆଉ ପୋଲିସ କେବଳ ଆତ୍ମରକ୍ଷା ପାଇଁ ପ୍ରୟାସ ଚଳାଇଛି । ହାତରେ ଲାଠି ଧରି ମାଡି ଯାଉଛନ୍ତି ଚାଷୀ । ଶତାଧିକ ଚାଷୀ ଏକାଥରକେ ପୋଲିସ ଉପରେ ଆକ୍ରମଣ କରୁଥିବା ବେଳେ ନିଜ ଆତ୍ମରକ୍ଷା ପାଇଁ ଚେଷ୍ଟା ଚଳାଇଛନ୍ତି ସୁରକ୍ଷାରେ ଥିବା ଦିଲ୍ଲୀ ପୋଲିସ ।
ଲାଲକିଲ୍ଲାରେ ଜାନୁଆରୀ ୨୬ ତାରିଖରେ କିଛି ଚାଷୀ ହାତରେ ମାରଣାସ୍ତ୍ର ଧରିି ହିଂସା କରୁଥିବା ଦେଖିବାକୁ ମିଳିଥିଲା । ଆଉ ଏହି ମାମଲାରେ ମନିନ୍ଦର ସିଂ ମୋନିଙ୍କୁ ଦିଲ୍ଲୀ ପୁଲିସର ସ୍ପେଶାଲ ସେଲ ଗିରଫ କରିବାରେ ସଫଳ ହୋଇଛି । ଦିଲ୍ଲୀସ୍ଥିତ ବାସଭବନରୁ ମନିନ୍ଦରକୁ ଗିରଫ କରାଯିବା ସହ ଦୁଇଟି ଖଣ୍ଡା ମଧ୍ୟ ଜବତ କରିଛି ପୋଲିସ । ଜାନୁଆରୀ ୨୬ ହିଂସା କାଣ୍ଡର ଭିଡିଓ ଓ ଫଟୋ ସାମ୍ନାକୁ ଆସିବା ପରେ ତାଙ୍କୁ ଖୋଜୁଥିଲା ପୋଲିସ ।
ଅପରପକ୍ଷରେ ଟ୍ରାକ୍ଟର ରାଲି ଓ ଚକା ଜାମ ପରେ ଏବେ ଆସନ୍ତାକାଲି ୧୮ ତାରିଖରେ ଦେଶବ୍ୟାପି ୪ ଘଂଟିଆ ରେଳରୋକ କରବାକୁ ନିଷ୍ପତି ନେଇଛି ଚାଷୀ ସଂଗଠନ । ଦିନ ୧୨ଟାରୁ ୪ ଟା ପର୍ଯ୍ୟନ୍ତ ରେଳରୋକ କରିବା ପାଇଁ ଚାଷୀ ସଂଗଠନ ଘୋଷଣା କରିଛନ୍ତି ।