୩୫ ମାସ ଚାଲିବ କୃଷକ ଆନ୍ଦୋଳନ, ସରକାର ଚାହିଁଲେ ଦିଲ୍ଲୀରେ ୫ ଲକ୍ଷ ଟ୍ରାକ୍ଟର ସହ ରାଲି କରିବେ କୃଷକ : ରାକେଶ ଟିକାୟତ
କନକ ବ୍ୟୁରୋ :ଦିଲ୍ଲୀ ଜୟପୁର ସୀମାରେ ଚାଲିଥିବା କୃଷକ ଆନ୍ଦୋଳନ ସ୍ଥଳରେ ଶନିବାର ପହଂଚିଥିଲେ ଭାରତୀୟ କିଷାନ ୟୁନିୟନର ନେତା ରାକେଶ ଟିକାୟତ । ସେ କହିଛନ୍ତି କି, ସରକାର ତାଙ୍କ ଜିଦରେ ଅଟଳ ଥିବାରୁ କୃଷକ ଆନ୍ଦୋଳନ ଆହୁରି ୩୫ ମାସ ପର୍ଯ୍ୟନ୍ତ ଚାଲିବ । ସରକାର ସର୍ତ୍ତ ସହିତ ଆଲୋଚନା କରିବାକୁ ଚାହୁଁଥିବା ବେଳେ କୃଷକ ମାନେ କେବଳ ଆଇନ ରଦ୍ଦ କରିବା ସର୍ତ୍ତରେ ଆଲୋଚନା କରିବାକୁ ପ୍ରସ୍ତୁତ ଅଛନ୍ତି ବୋଲି ଟିକାୟତ ଗଣମାଧ୍ୟମକୁ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କୃଷକ ଆନ୍ଦୋଳନକୁ ନେଇ ହରିଆଣା ସରକାରଙ୍କ କଠୋରତା ଉପରେ ଟିକାୟତ କହିଛନ୍ତି କି, କୃଷକମାନେ ହରିଆଣା ସରକାରଙ୍କ ଶେଷ କଠୋରତା ପର୍ଯ୍ୟନ୍ତ ଅପେକ୍ଷା କରିଛନ୍ତି । କୃଷକମାନେ କୌଣସି ପରିସ୍ଥିତିରେ ଡରିବେ ନାହିଁ । ଆନ୍ଦୋଳନ ସ୍ଥଳରେ କୃଷକମାନଙ୍କ ସଂଖ୍ୟା କମୁଥିବା ନେଇ ପ୍ରଶ୍ନ ଉପରେ ଟିକାୟତ କହିଛନ୍ତି କି, ସରକାର ଯଦି କୃଷକମାନଙ୍କର ଶକ୍ତି ଦେଖିବାକୁ ଚାହୁଁଛନ୍ତି ତେବେ କହିଲେ ଦିଲ୍ଲୀରେ ୫ ଲକ୍ଷ ଟ୍ରାକ୍ଟର ସହ ପୁଣିଥରେ ରାଲି କରିବାକୁ ସେମାନେ ପ୍ରସ୍ତୁତ ।
ଅନ୍ୟପଟେ କୃଷକ ଆନ୍ଦୋଳନର ଅନ୍ୟ ପ୍ରମୁଖ ଗୁରୁନାମ ଚଢୁନି ଅଲଗା ହେବା ପ୍ରସଙ୍ଗରେ ଟିକାୟତ କହିଛନ୍ତି କି, ବିଚାର ଅଲଗା ହେବା କାରଣରୁ ଏଭଳି ହୋଇଛି । କିଷାନ ମୋର୍ଚ୍ଚା ନିର୍ବାଚନ ଲଢିବା ସପକ୍ଷରେ ନଥିବା ବେଳେ ଚଢୁନି ନିର୍ବାଚନ ଲଢିବାକୁ ଚାହୁଁଥିଲେ । ସେ ପୁଣି ତାଙ୍କ ବିଚାର ବଦଳାଇ ଖୁବଶୀଘ୍ର ଆମ ସହ ଯୋଡି ହେବେ ବୋଲି ଆଶା କରିଛନ୍ତି ଟିକାୟତ । ଏହାସହ ବିଜେପି ସାଂସଦ ମିନାକ୍ଷୀ ଲେଖିଙ୍କ ବୟାନ ଉପରେ ବି ଟିକାୟତ ଜବାବ ରଖିଛନ୍ତି । ସେ କହିଛନ୍ତି କି, କୃଷକମାନେ ମହିଳା ମାନଙ୍କୁ ସମ୍ମାନ କରନ୍ତି, ମାତ୍ର କିଛି ଲୋକଙ୍କ ଦ୍ୱାରା ଏଭଳି କରାଯାଉଛି, ହେଲେ ହକ୍ ପାଇଁ କୃଷକମାନେ ତାଙ୍କ ଲଢେଇ ଜାରି ରଖିବେ ।
ଅନ୍ୟପଟେ ସରକାରଙ୍କୁ ଘେରିବାକୁ କୃଷକମାନେ ଜନ୍ତର-ମନ୍ତ୍ରର ଠାରେ କିଷାନ ସଂସଦ ଆରମ୍ଭ କରିଛନ୍ତି । ଦୈନିକ ୨୦୦ କୃଷକ ପ୍ରତିନିଧୀଙ୍କ ଦ୍ୱାରା ସଂସଦ ପରିଚାଳନା କରାଯାଉଛି । ସାଧାରଣ ସଂସଦ ଭଳି କିଷାନ ସଂସଦରେ ବି ବାଚଷ୍ପତ୍ତି, ଉପବାଚଷ୍ପତ୍ତି ନିର୍ବାଚିତ କରାଯାଇ ଦୈନିକ କୃଷି ଆଇନ ଉପରେ ଆଲୋଚନା ହେଉଛି ।