ମଣ୍ଡି ସମସ୍ୟାକୁ ନେଇ ଜୋର ଧରିଲାଣି ଅସନ୍ତୋଷ । ଧାନ ବିକ୍ରି ଦାବିରେ ଗଞ୍ଜାମ, କେନ୍ଦୁଝରରେ ରାସ୍ତାକୁ ଓହ୍ଲାଇଲେ ଚାଷୀ ।
କନକ ବ୍ୟୁରୋ: ରାଜ୍ୟରେ ମଣ୍ଡି ସମସ୍ୟାକୁ ନେଇ ଏବେ ଉଠୁଛି ପଡୁଛି ବିଧାନସଭା । ବିରୋଧୀମାନେ ଏହି ପ୍ରସଙ୍ଗକୁ ନେଇ ଶାସକ ଦଳକୁ ଘେରୁଥିବାବେଳେ, ଶାସକ ଦଳର ସାଂସଦମାନେ ମଧ୍ୟ ଏହି ପ୍ରସଙ୍ଗକୁ ନେଇ କେନ୍ଦ୍ରମନ୍ତ୍ରୀଙ୍କ ପାଖରେ ଫେରାଦ ହୋଇଛନ୍ତି । ତେବେ ଏସବୁ ଭିତରେ ରାଜ୍ୟର ବିଭିନ୍ନ ଅଂଚଳରୁ ଚାଷୀ ଦୁର୍ଦ୍ଦଶାର ବାସ୍ତବ ଚିତ୍ର ସାମନାକୁ ଆସିଛି ।
Kanak News is now on WhatsApp
Join and get latest news updates delivered to you via WhatsApp
ଢ଼େଙ୍କାନାଳ କଙ୍କଡ଼ାହାଡ଼ ବ୍ଲକ୍ ପଙ୍ଗାତିରା ମଣ୍ଡିରେ ଧାନ ବିକ୍ରି କରିପାରିନଥିବା ଚାଷୀମାନେ କାମାକ୍ଷାନଗର ଉପଜିଲ୍ଲାପାଳଙ୍କୁ ଦେଇଛନ୍ତି ଦାବି ପତ୍ର । ଚାଷୀମାନେ ସେବା ସମବାୟ ସମିତିରେ ନାମ ପଞ୍ଜିକରଣ କରିଛନ୍ତି, ଧାନ ବିିକିବା ପାଇଁ ଟୋକନ ବି ପାଇଛନ୍ତି କିନ୍ତୁ ଧାନ ବିକ୍ରି କରିପାରୁନାହାନ୍ତି । ଗାଁର ପ୍ରାୟ ୧୫୦ରୁ ଅଧିକ ଚାଷୀଙ୍କ ଧାନ ବିକ୍ରି ହୋଇପାରି ନାହିଁ । ଏହି ସମସ୍ୟାକୁ ନେଇ ଆଜି ଚାଷୀମାନେ ଉପଜିଲ୍ଲାପାଳ ବିଷ୍ଣୁ ପ୍ରସାଦ ଆଚାର୍ଯ୍ୟଙ୍କୁ ଭେଟି ଦାବି ପତ୍ର ଦେଇଛନ୍ତି । ଅନ୍ୟପଟେ ଚାଷୀଙ୍କ ସମସ୍ୟା ସଂପର୍କରେ ଆଲୋଚନା କରାଯିବ ବୋଲି ଉପଜିଲ୍ଲାପାଳ କହିଛନ୍ତି ।
ସେହିପରି ଧାନ କିଣାକୁ ନେଇ ଗଂଜାମ ଜିଲ୍ଲାର ଚାଷୀ ରାସ୍ତାରୋକ କରିଛନ୍ତି । ହୁମା ପଂଚାୟତର ଚାଷୀ ମଣ୍ଡିରେ ଧାନ ବିକ୍ରି କରି ନପାରି ରାସ୍ତାରୋକ କରିଛନ୍ତି । ସେପଟେ କେନ୍ଦୁଝର ଜିଲ୍ଲା ତେଲକୋଇରେ ମଧ୍ୟ ଧାନ ବିକ୍ରି ହୋଇନଥିବାରୁ ଧାରଣାକୁ ଓହ୍ଲାଇଛନ୍ତି ଚାଷୀ । ଜଗମୋହନ ଛକରେ ଧାନବସ୍ତା ରଖି ମୁଖ୍ୟ ରାସ୍ତା ଅବରୋଧ କରିଛନ୍ତି ଚାଷୀ । ଯାହାଫଳରେ ଯାତାୟତ ଠପ ହୋଇପଡ଼ିଛି । ଏହାସହ କଲିକତା- ମୁମ୍ବାଇ ରାସ୍ତାର ଦୁଇ ପାଶ୍ୱର୍ରେ ଶହ ଶହ ଗାଡ଼ି ଅଟକି ରହିଛି । ଘଟଣା ସ୍ଥଳରେ ପୋଲିସ ପହଂଚି ଚାଷୀଙ୍କୁ ବୁଝାସୁଝା କରିଛି ।