ଆଜି ବ୍ୟବସାୟୀ ସଂଘର ଭାରତ ବନ୍ଦ : ଓଡ଼ିଶାରେ ବି ବନ୍ଦ ରହିବ ଦୋକାନ ବଜାର
ସାମିଲ ହେବେ ଦେଶର ୮ କୋଟି ଓ ଓଡ଼ିଶାର ୨୦ ଲକ୍ଷ ବ୍ୟବସାୟୀ; ପ୍ରଭାବିତ ହେବନି ଯାତାୟତ
କନକ ବ୍ୟୁରୋ : ଆଜି ସର୍ବଭାରତୀୟ ବନ୍ଦ ଡାକରା ଦେଇଛନ୍ତି ବ୍ୟବସାୟୀ ସଂଘ । ଫୁଟପାଥଠୁ ଆରମ୍ଭ କରି ଇଣ୍ଡଷ୍ଟ୍ରିଜ ଯାଏଁ ସବୁ ବନ୍ଦ ରହିବ । ଓଡିଶାର ପ୍ରାୟ ୨୦ ଲକ୍ଷ ବ୍ୟବସାୟୀ ଏହି ବନ୍ଦ ଡାକରାରେ ସାମିଲ ହେବେ । ଜିଏସଟି ନିୟମ ପରିବର୍ତନ, ଅନଲାଇନ ବ୍ୟବସାୟ ଉପରେ ଆଇନ ଆଣିବା ଏବଂ ଖାଦ୍ୟ ନିରପତା ମାନ ଆଇନକୁ ପରିବର୍ତନ କରିବା ଦାବିରେ ଏହି ବନ୍ଦ ଡାକରା ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ଆଜିର ବନ୍ଦ ପାଳନ ସମୟରେ ଗାଡି ଚଳାଚଳ ସ୍ୱାଭାବିକ ରହିବ ବୋଲି ସୂଚନା ଦେଇଛି ଓଡିଶା ବ୍ୟବସାୟୀ ମହାସଂଘ । ସେପଟେ ବନ୍ଦ ଡାକରାକୁ ଆଖିରେ ରଖି ଭୁବନେଶ୍ୱରର ବ୍ୟାପକ ବ୍ୟବସ୍ଥା ଗ୍ରହଣ କରାଯିବ ବୋଲି କହିଛି କମିସନରେଟ ପୁଲି୍ସ । ବଡ ବଡ ମାର୍କେଟରେ ପୁଲିସ ଫୋର୍ସ ମୁତୟନ ହେବେ ବୋଲି କହିଛନ୍ତି ଡିସିପି ।
ଏହି ବନ୍ଦ ବେଳେ ଆପଣ ହୁଏତ ଅସୁବିଧାର ସମ୍ମୁଖୀନ ହୋଇପାରନ୍ତି । ପ୍ରଥମେ ଜାଣନ୍ତୁ କେଉଁ କାରଣ ପାଇଁ ଭାରତ ବନ୍ଦ ହେଉଛି । ଏହା ପଛରେ ବଳିଷ୍ଠ ଯୁକ୍ତି ରହିଛି କି ? ବ୍ୟବସାୟୀମାନେ ୨, ୩ଟି କାରଣ ଦର୍ଶାଇଛନ୍ତି । ପ୍ରଥମ କଥା ହେଉଛି ଜିଏସଟିର ସରଳୀକରଣ । ବ୍ୟବସାୟୀ ସଂଘର ଯୁକ୍ତି ହେଲା ଜିଏସଟିର ରୁପରେଖରେ ପରିବର୍ତନ ହୋଇଯାଇଛି । ୨୦୧୭ ଜୁଲାଇରେ ସରକାର ଜିଏସଟି ଆଣିଥିଲେ । କିନ୍ତୁ ମୂଳ ଜିଏସଟିରେ ଯାହା ଥିଲା ଏବେ ସେଥିରେ ପରିବର୍ତନ ହୋଇଥିବା କହୁଛି ବ୍ୟବସାୟୀ ସଂଘ ।
୨୦୧୭ ମସିହାରୁ ଏଯାଏଁ ମୂଳ ଜିଏସଟିରେ ୯୫୦ଥର ସଂଶୋଧନ କରାଗଲାଣି । ତେଣୁ ମୂଳ ଜିଏସଟିର ରୁପରେଖ ଯାହା ଥିଲା ଏବେ ସେୟା ନାହିଁ । ଦ୍ୱିତୀୟରେ ଜିଏସଟି ବ୍ୟତୀତ ଅନଲାଇନ ବିକ୍ରିକୁ ନେଇ ମଧ୍ୟ ପ୍ରଶ୍ନ ଉଠାଇଛି ବ୍ୟବସାୟୀ ସଂଘ । ଏଥିରେ କୌଣସି ନିତିନିୟମ ନାହିଁ । ତେଣୁ ତୁରନ୍ତ ଏହାକୁ ନିୟମ ପରିସରକୁ ଆଣିବା ପାଇଁ ଦାବି କରୁଛି ବ୍ୟବସାୟୀ ସଂଘ ।