କନକ ବ୍ୟୁରୋ : ଦୀର୍ଘ ୧ ବର୍ଷରୁ ଉର୍ଦ୍ଧ ହେବ କେନ୍ଦ୍ର ସରକାରଙ୍କ ଦ୍ୱାରା ପାରିତ ୩ ଟି କୃଷି ଆଇନକୁ ବିରୋଧ କରି କୃଷକମାନେ ଧାରଣାରେ ବସିଥିଲେ । ଏନେଇ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସଂସଦରେ ପାରିତ ହୋଇଥିବା ୩ ଟି କଅଷି ଆଇନକୁ ପ୍ରତ୍ୟାହାର କରିନେବାକୁ ଘୋଷଣା କରିଥିବା ବେଳେ ଏହାକୁ ନେଇ ରାଜନୀତି ସରଗରମ ହେବାରେ ଲାଗିଛି । ବିରୋଧୀ ଏହାକୁ ନିର୍ବାଚନୀ ଚାଲ ବୋଲି କହୁଥିବା ବେଳେ ଏହାକୁ ବି ସମର୍ଥନ କରିଛନ୍ତି ସୁପ୍ରିମ କୋର୍ଟ ପ୍ୟାନେଲର ଜଣେ ସଦସ୍ୟ । ଏସବୁ ଭିତରେ ପଞ୍ଜାବର ପୂର୍ବତନ ମୁଖ୍ୟମନ୍ତ୍ରୀ କ୍ୟାପଟେନ ଅମରିନ୍ଦର ସିଂ ନୂଆ ଦଳ ଗଠନ କରିବା ଓ ବିଜେପି ସହିତ ମେଣ୍ଟ କରିବାକୁ ନେଇ ଚାଲିଥିବା ଚର୍ଚ୍ଚା ଉପରେ ମନ୍ତବ୍ୟ ରଖିଛନ୍ତି । କ୍ୟାପଟେନ କହିଛନ୍ତି କି ପ୍ରଧାନମନ୍ତ୍ରୀଙ୍କ ପାଖରେ ତାଙ୍କର ଗୋଟିଏ ସର୍ତ୍ତ ଥିଲା କି କୃଷି ଆଇନ ପ୍ରତ୍ୟାହାର । ଏବେ ପ୍ରଧାନମନ୍ତ୍ରୀ ଏହା ଘୋଷଣା କରିସାରିଥିବାରୁ ବିଜେପି ସହ ମେଣ୍ଟ କରିବାରେ ତାଙ୍କର କୌଣସି ଅସୁବିଧା ନାହିଁ ବୋଲି ସେ ସ୍ପଷ୍ଟ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ କ୍ୟାପଟେନ କହିଛନ୍ତି କି ଆଜି ପବିତ୍ର ଗୁରୁ ପୂର୍ଣ୍ଣମୀ ଅବସରରେ ପ୍ରଧାନମନ୍ତ୍ରୀ ପଞ୍ଜାବବାସୀଙ୍କୁ ଏକ ପୁରସ୍କାର ଦେଇଛନ୍ତି । ପ୍ରଧାନମନ୍ତ୍ରୀ କ୍ଷମା ମାଗିଥିବାରୁ ଆନ୍ଦୋଳନରେ ସାମିଲ ଥିବା ପଞ୍ଜାବର ଚାଷୀମାନେ ଏବେ ଘରକୁ ଫେରିଆସିବାକୁ କ୍ୟାପଟେନ ଆହ୍ୱାନ ଦେଇଛନ୍ତି ।
ଏହା ପୂର୍ବରୁ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବା ପରେ କ୍ୟାପଟେନ ଦିଲ୍ଲୀ ଯାଇ ଗୃହମନ୍ତ୍ରୀ ଅମିତ ଶାହାଙ୍କୁ ବି ଭେଟ କରିଥିଲେ । ଏହି କ୍ରମରେ କୃଷି ଆଇନକୁ ନେଇ ବି ଚର୍ଚ୍ଚା ହୋଇଥିଲା । ସେପଟେ ପଞ୍ଜାବର ଅକାଳୀ ଦଳ ଏହି କୃଷି ଆଇନକୁ ବିରୋଧ କରି ଏନଡିଏରୁ ସମର୍ଥନ ପ୍ରତ୍ୟାହାର କରିଥିବା ବେଳେ ଏବେ ପୁଣିଥରେ ବିଜେପି ସହିତ ମେଣ୍ଟ କରିପାରେ ବୋଲି ଚର୍ଚ୍ଚା ହେଉଛି । ଏଭଳି ହେଲେ ପଞ୍ଜାବ ରାଜନୀତିରେ ପୁଣି ନୂଆ ସମିକରଣ ଦେଖିବାକୁ ମିଳିବ ।