ଆସାମ, ମଣିପୁର, ଆନ୍ଧ୍ରପ୍ରଦେଶ ଓ କଲିକତାକୁ ରପ୍ତାନୀ ହେଉଛି କଣାସ ଅଞ୍ଚଳର ଦେଶୀ ସୁଖୁଆ: ଲୁଣା ନଦୀପଠା ହୋଇଛି ଶୁଖୁଆ ଖଳା
କନକ ବ୍ୟୁରୋ: ଚର୍ଚ୍ଚାରେ କଣାସ ଅଂଚଳର ଦେଶୀ ଶୁଖୁଆ । ବକୁଳିସାହି ଗାଁ ନିକଟସ୍ଥ ଲୁଣା ନଦୀବନ୍ଧରେ ଶୁଖୁଆ ପ୍ରସ୍ତୁତି ପାଇଁ କରାଯାଇଛି ଶୁଖୁଆ ଖଳା । ନଦୀପଠାରେ ଛୋଟ ଛୋଟ ବେଡ ପ୍ରସ୍ତୁତ କରି ଶୁଖୁଆ ଶୁଖଉଛନ୍ତି ବ୍ୟବସାୟୀ । ଗାଁ ଗହଳିର ନଦୀ ଓ ପୋଖରିର ମଧୁର ଜଳର ଚୁନା ମାଛ ସଂଗ୍ରହ କରି ଶୁଖୁଆ ପ୍ରସ୍ତୁତ କରି ଏହାକୁ ରାଜ୍ୟ ତଥା ରାଜ୍ୟ ବାହାରକୁ ରପ୍ତାନୀ କରାଯାଉଛି । ଏହା ଦ୍ୱାରା ପାଖାପାଖି ୨୦ରୁ ୨୫ଜଣ ରୋଜଗାର କରିପାରୁଛନ୍ତି । ଏଠାରୁ ପ୍ରସ୍ତୁତ ହେଉଥିବା ଶୁଖୁଆ କେବଳ ଓଡ଼ିଶା ନୁହେଁ ଆସାମ, ମଣିପୁର, ଆନ୍ଧ୍ର ପ୍ରଦେଶ, କଲିକତାକୁ ମଧ୍ୟ ରପ୍ତାନୀ କରାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ଗଣିଆ, କେରାଣ୍ଡି, ମିନ, କାଂଜିଆ, ଗଡ଼ିଶା, ଫଳି ଭଳି ଅନେକ ଛୋଟ ଛୋଟ ଚୁନା ମାଛ କିଲୋ ପ୍ରତି ୪୦ ଟଙ୍କାରେ କିଣି ରାଜ୍ୟ ବାହାରକୁ ୨୫୦ ଟଙ୍କାରେ ବିକ୍ରି କରାଯାଉଛି । ୪କିଲୋ କଂଚା ମାଛରୁ ଏକ କିଲୋ ଶୁଖୁଆ ପ୍ରସ୍ତୁତ ହୋଇଥାଏ । ପ୍ରଥମେ କଂଚା ମାଛରୁ କାତି ଛଡ଼ାଇ ସେଥିରେ ଲୁଣ ଦେଇ ୧୨ ଘଂଟା ପର୍ଯ୍ୟନ୍ତ ଭିଜାଇ ରଖିବାକୁ ପଡ଼ିଥାଏ । ଏହା ପରେ ଖରାରେ ୩ଦିନ ପର୍ଯ୍ୟନ୍ତ ଶୁଖାଇ ରଖିବା ପରେ ସମ୍ପୂର୍ଣ୍ଣ ପ୍ରସ୍ତୁତ ହୁଏ ଦେଶୀ ଶୁଖୁଆ । ଏହାଦ୍ୱାରା କିଛି ରୋଜଗାର ମିଳିପାରୁଥିବାରୁ ଖୁସି ପ୍ରକାଶ କରିଛନ୍ତି କର୍ମଚାରୀ ।
କୁଇଂଟାଲ କୁଇଂଟାଲ ଶୁଖୁଆ ଟ୍ରେନ ଯୋଗେ କଣାସ ଅଂଚଳରୁ ରାଜ୍ୟ ବାହାରକୁ ରପ୍ତାନୀ କରାଯାଉଛି । ଦୀର୍ଘ ୫ ବର୍ଷ ହେଲା କଣାସ ଅଂଚଳର ବନମାଳି ପରିଡ଼ା ଦେଶୀ ଶୁଖୁଆ ପ୍ରସ୍ତୁତ କରି ଅନେକ ଲୋକଙ୍କୁ ରୋଜଗାରକ୍ଷମ କରାଇପାରିଛନ୍ତି ।